ការប្រកួតកីឡា សិស្សបឋមសិក្សាជ្រើសរើសជើងឯកថ្នាក់ខេត្ត ប្រចាំឆ្នាំសិក្សា២០២៣-២០២៤ ដែលមានរយៈពេល ៧ថ្ងៃកន្លងមកនេះបានបិទបញ្ចប់ជាស្ថាពរហើយ នៅល្ងាចថ្ងៃទី២៥ ខែកុម្ភៈ ឆ្នាំ២០២៤ នាពហុកីឡដ្ឋានខេត្ដសៀមរាប។
លោក ជួន សុខវ៉ាន់ឌី គណៈកម្មការអចិន្ដ្រៃយ៍រៀបចំការប្រកួត បង្ហាញថា នៅឆ្នាំនេះ មានស្រុកចំនួន ១០ បានបញ្ជូន សិស្សានុសិស្សមកចូលរួមប្រកួត លើកីឡាចំនួន ៥ប្រភេទ។ ដោយឡែក ស្រុកដែលពុំបានចូលរួមប្រកួត មានស្រុកជីក្រែង និងស្រុកអង្គរជុំ។ កីឡាចំនួន ៥ប្រភេទ ដែលបានយកមកប្រកួតរួមមាន កីឡាបាល់ទាត់ កីឡាបាល់ទះ កីឡាបាល់បោះ កីឡាអត្ដពលកម្ម និងកីឡាតៃក្ខាន់ដូរ។
តាមរបាយការណ៍លទ្ធផលនៃការប្រកួតទាំង ៥ប្រភេទកីឡា ជ័យលាភីលេខ១ ភាគច្រើន បានទៅលើសាលារដ្ឋ និងឯកជន ស្ថិតក្នុងក្រុងសៀមរាប ប៉ុន្តែក្នុងនោះ ជ័យលាភីលេខ១ ក៏មានស្រុកមួយចំនួនដណ្ដើមបានផងដែរ រួមមាន ស្រុកស្រីស្នំ ដណ្ដើមបានជើងឯក លើវិញ្ញាសារ កីឡាបាល់ទាត់កុមារា – ស្រុកក្រឡាញ់ ដណ្ដើមបានជើងឯក លើវិញ្ញាសារ កីឡាបាល់ទាត់កុមារី – ស្រុកបន្ទាយស្រី ដណ្ដើមបានជើងឯក លើវិញ្ញាសារកីឡាបាល់បោះកុមារី – ស្រុកអង្គរធំ ដណ្ដើមបានជើងឯក លើវិញ្ញាសារ រត់ចម្ងាយ១០០០ម៉ែត្រ កុមារា – ស្រុកស្វាយលើ ដណ្ដើមបានជើងឯក លើវិញ្ញាសារ រត់ចម្ងាយ១០០០ម៉ែត្រ កុមារី។
លោក លី ប៊ុនណា ប្រធានមន្ទីរអប់រំ យុវជន និងកីឡា ខេត្តសៀមរាប បានកោតសរសើរ និងវាយ តម្លៃខ្ពស់ចំពោះការិយាល័យកីឡា ដែលបានខិតខំប្រឹងប្រែងបំពេញភារកិច្ចយ៉ាងសកម្ម និងមានកិច្ចសហការគ្នាបានយ៉ាងល្អជាមួយ អង្គភាពពាក់ព័ន្ធ ដើម្បីរៀបចំការប្រកួតនាពេលនេះ។ លោកបន្ដថា ការលេងកីឡា មានសារៈប្រយោជន៍សម្រាប់មនុស្សគ្រប់វ័យ ក្នុងការទទួលបាននូវសុខភាពល្អ ទាំងផ្លូវ កាយផ្លូវចិត្ត និងជួយឱ្យជៀសផុតពីភាពអសកម្មផ្សេងៗក្នុងសង្គម។ ក្នុងនោះដែរ ការលើកស្ទួយវិស័យកីឡា គឺជារឿងចាំបាច់ ព្រោះថា វិស័យអប់រំកាយ និងកីឡា ជាសមាសភាគ មួយមិនអាចខ្វះ បានក្នុងចំណោមសមាសភាគទាំងប្រាំ នៃវិស័យអប់រំ សំដៅកសាងកាយសម្បទារឹងមាំ មានសុខភាពល្អ បង្កើតចំណងមិត្តភាព ភាតរភាព ឱ្យមាន និរន្តរភាព។
លោកប្រធានមន្ទីរ បានអំពាវនាវដល់មន្ត្រីថ្នាក់ដឹកនាំគ្រប់ការិយាល័យ អប់រំយុវជន និងកីឡា នៃរដ្ឋបាលក្រុង-ស្រុក គ្រប់គ្រឹះស្ថានសិក្សាសាធាណៈ និងឯកជនទូទាំងខេត្ត ចូលរួមបំផុសសកម្មភាពកីឡាឱ្យបានទូលំទូលាយ ជាពិសេស សកម្មភាពអប់រំកាយ និងកីឡា នៅតាម គ្រឹះស្ថានបឋមសិក្សា និងមធ្យមសិក្សា ដើម្បីជាគោលដៅសម្រាប់ មិត្តភាព សាមគ្គីភាព សុខុមាលភាព ទាំងផ្លូវកាយ -ផ្លូវបញ្ញាដល់សិស្សានុសិស្ស និងប្រជាជនរបស់យើង សំដៅលើកការលើកកម្ពស់ “យុវជនម្នាក់លេងកីឡា១ប្រភេទយ៉ាងតិចៗ៕
អត្ថបទ និងរូបភាព៖ បូ សាវី
កែសម្រួល៖ សេង ផល្លី
