លោក ពិន ប្រាកដ អភិបាលរងខេត្តសៀមរាប មានប្រសាសន៍ថា គ្រោះថ្នាក់អគ្គិភ័យ ជាគ្រោះមហន្តរាយធ្ងន់ធ្ងរជាង គ្រោះលិចទូកកណ្តាលទន្លេ ឬសមុទ្ររាប់សិបដង ព្រោះវាមិនត្រឹមតែឆេះឆាបអស់រលីងនូវទ្រព្យសម្បត្តិ ដែលខិតខំរកស៊ី សន្សំទុកជាយូរឆ្នាំមកហើយនោះទេ តែថែមទាំងបានឆក់យកនូវជីវិតកូនចៅ ប្តីសី ព្រមទាំងសមាជិកគ្រួសារមួយចំនួនទៀត ដែលធ្វើឱ្យជនរងគ្រោះមានការរន្ធត់ និងសង្វេគយ៉ាងខ្លាំង ដូចដែលពាក្យចាស់បុរាណខ្មែរបានពោលថា «ស៊ូស្លាប់បា កុំឱ្យស្លាប់មេ ស៊ូលិចទូកកណ្តាលទន្លេ កុំឱ្យភ្លើងឆេះផ្ទះ» ហេតុនេះ ក្នុងនាមអាជ្ញាធរខេត្តសៀមរាប សូមណែនាំ និង ក្រើនរំលឹក ដល់បងប្អូនប្រជាពលរដ្ឋទាំងអស់ក្នុងខេត្ត ត្រូវយកចិត្តទុកដាក់ប្រុងប្រយ័ត្នជាប់ជានិច្ច ដោយមិនត្រូវធ្វេសប្រហែសជាមួយគ្រោះអគ្គិភ័យឡើយ ។
លោក ពិន ប្រាកដ មានប្រសាសន៍បែបនេះ នៅឱកាសអញ្ជើញជាអធិបតី ក្នុងពិធីប្រារព្ធទិវាជាតិបង្ការ និងពន្លត់អគ្គិភ័យ លើកទី៨ នាថ្ងៃទី២៧ ខែកុម្ភៈ ឆ្នាំ២០២៤ ដែលរៀបចំឡើងនៅក្នុងក្រុងសៀមរាប ។
លោកអភិបាលរងខេត្ត បានបន្តថា ការប្រារព្ធពិធីជាតិបង្ការ និងពន្លត់អគ្គិភ័យ លើកទី៨នេះ គឺសំដៅរំលឹកឱ្យប្រជាពលរដ្ឋយើង នៅទូទាំងប្រទេសមានការយល់ដឹង និងចងចាំបានថា អគ្គិភ័យ ជាគ្រោះថ្នាក់កាចសាហាវមួយ ដែលអាចបំផ្លាញអាយុជីវិត និងទ្រព្យសម្បត្តិប្រជាពលរដ្ឋបានគ្រប់ពេលប្រសិនបើមានការធ្វេសប្រហែស ឬគ្មានការប្រុងប្រយ័ត្ន ដូច្នេះក្នុងនាមគណៈបញ្ជាការឯកភាពខេត្តសៀមរាប សូមផ្តាំផ្ញើដល់អង្គភាពពាក់ព័ន្ធទាំងអស់ ត្រូវរៀបចំផែនការសកម្មភាពចុះផ្សព្វផ្សាយអប់រំប្រជាពលរដ្ឋ ពាក់ព័ន្ធនឹងវិធីសាស្រ្តបង្ការ និងពន្លត់អគ្គិភ័យ ជាពិសេសត្រូវចុះផ្សព្វផ្សាយអប់រំអំពីច្បាប់ស្តីពីការបង្ការ និងពន្លត់អគ្គិភ័យនៅតាមសហគមន៍ សាលារៀន គ្រឹះស្ថានសាធារណៈ គ្រឹះស្ថានឯកជន និងនៅតាមទីតាំងដែលមានអគារខ្ពស់ៗ និងទីប្រជុំជនតាមបណ្តាក្រុង-ស្រុកក្នុងខេត្ត និង ត្រូវចាត់តាំងឱ្យមានកម្លាំងនគរបាលបង្ការ និងពន្លត់អគ្គិភ័យប្រចាំការ ២៤ម៉ោងលើ២៤ម៉ោង ដើម្បីធានាដល់ការឆ្លើយតបទៅនឹងតម្រូវការជាក់ស្តែងបានទាន់ពេលវេលា ដោយត្រូវត្រៀមរថយន្ត ឧបករណ៍ និងសម្ភារៈ ដើម្បីធ្វើអន្តរាគមន៍ជួយសង្គ្រោះ និងពន្លត់អគ្គិភ័យ ដោយគ្រប់រថយន្តពន្លត់អគ្គិភ័យទាំងអស់ត្រូវមានប្រេងឥន្ធនៈក្នុងធុង និងមានទឹកក្នុងស៊ីទែនឱ្យបានគ្រប់គ្រាន់ និង ត្រូវផ្សព្វផ្សាយជាសាធារណៈនូវលេខទូរសព្ទប្រចាំការ ដើម្បីសាធារណជនងាយស្រួល ទំនាក់ទំនង នៅពេលមានករណីអគ្គិភ័យកើតមានឡើងជាយថាហេតុណាមួយ ។
លោកឧត្តមសេនីយត្រី ឌុត ខុន ស្នងការរង ទទួលបន្ទុកជំនួយការដឹកនាំការិយាល័យបង្ការ ពន្លត់អគ្គីភ័យនិង សង្រ្គោះនៃស្នងការដ្ឋាននគរបាលខេត្តសៀមរាប បានឲ្យដឹងថា ពេញមួយឆ្នាំ២០២៣ គ្រោះអគ្គិភ័យបានកើតឡើងនៅក្នុងខេត្តសៀមរាប ចំនួន៥៣ដង ដោយឆក់យកជីវិតមនុស្សម្នាក់ និងបំផ្លាញផ្ទះពលរដ្ឋអស់៣១ខ្នង ។
លោក ឌុត ខុន បានឲ្យដឹងថា ក្រោមការដឹកនាំរបស់រាជរដ្ឋាភិបាលកម្ពុជា កន្លងមកនេះមានការរីកចម្រើនគ្រប់វិស័ ហើយតម្រូវការប្រើប្រាស់ចរន្តអគ្គិសនីក៏មានការកើនឡើងជាបន្តបន្ទាប់ ដែលវាបានក្លាយទៅជាគ្រោះថ្នាក់មួយបណ្តាលមកពីការឆ្លងចរន្តអគ្គិសនី ហើយករណីគ្រោះថ្នាក់មួយនេះ បានបំផ្លាញទ្រព្យសម្បត្តិ និងអាយុជីវិតរបស់ប្រជាពលរដ្ឋ ដោយវាក៏ក្លាយទៅជាបន្ទុកដ៏ធំរបស់រាជរដ្ឋាភិបាលផងដែរ ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក លីវ សាន្ត
