នៅរសៀលថ្ងៃទី២៦ ខែកុម្ភៈ ឆ្នាំ២០២៤ ខ្សែភាពយន្តអប់រំខ្លីនៃយុទ្ធនាការ “តើអ្នកអាចឃើញខ្ញុំទេ?” បានធ្វើការចាក់បញ្ចាំងជាផ្លូវការ នៅសាលរោងកុនផ្សារទំនើប Heritage Walk ក្រុងសៀមរាប ក្រោមអធិបតីភាព លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស។
ការផ្សព្វផ្សាយខ្សែភាពយន្តអប់រំខ្លីនេះ ក្នុងគោលបំណងបង្ហាញ ពីអំពើជួញដូរមនុស្ស និងការធ្វើអាជីវកម្មផ្លូវភេទ ដែលជាបរិបទសាកល និងនៅតែបន្តកើតមានជារៀងរាល់ថ្ងៃ។ បទល្មើសទាំងអស់នេះ អាស្រ័យលើកត្តាសំខាន់ៗ ចំនួន ៣ គឺ ការអប់រំសង្គម ការអនុវត្តច្បាប់ និង ការឆក់ឱកាសពីជនល្មើស។ រូបភាពនៃអំពើជួញដូរមនុស្ស មិនត្រឹមតែជាការជួញដូរ ឬកេងប្រវ័ញ្ច ដែលកើតឡើង ដោយផ្ទាល់នៅតាមសហគមន៍ដែលយើងរស់នៅប៉ុណ្ណោះទេ ប៉ុន្តែវាក៏កើតឡើងនៅតាមប្រព័ន្ធអនឡាញផងដែរ។
ថ្លែងក្នុងឱកាសនោះ លោកជំទាវ ជូ ប៊ុនអេង លើកឡើងថា ក្នុងយុគសម័យទំនើបនាពេលបច្ចុប្បន្ន ការយល់ដឹងរបស់បុគ្គលគ្រប់រូប ជាពិសសសយុវជន និង កុមារ ពីល្បិចអូសទាញ លួងលោម បោកញ្ឆោតរបស់ជនខិលខូច គឺជាលក្ខខណ្ឌចាំបាច់មួយសម្រាប់ធានាសុវត្ថិភាព និងការពារភាពសុខដុមរមនារបស់ពួកគេ។ សម្រាប់ការងារប្រយុទ្ធប្រឆាំងអំពើជួញដូរមនុស្ស ការផ្សព្វផ្សាយ អប់រំ គឺជាយុទ្ធសាស្រ្តគន្លឹះ ក្នុងនោះក៏ទាមទារឱ្យមានការចូលរួមពីគ្រប់ភាគីពាក់ព័ន្ធនានា រួមមានមន្រ្តីរាជការ សង្គមស៊ីវិល សាធារណជនទូទៅ ក៏ដូចជាមជ្ឈដ្ឋានយុវជនខ្លួនឯង ផ្សព្វផ្សាយអប់រំបន្ត ឲ្យបានដល់ពួកគាត់ យល់ដឹងអំពីបញ្ហាដ៏អយុត្តិធម៌នេះផងដែរ។
ដូច្នេះ លោកជំទាវ បានជំរុញដល់ថ្នាក់ដឹកនាំមន្ទីរ អង្គភាព ថ្នាក់ដឹកនាំស្ថាប័ន លោកនាយក នាយិកា លោកគ្រូ អ្នកគ្រូ និងប្អូនៗ សូមចូលរួមក្នុងការចែករំលែក និងផ្សព្វផ្សាយ ខ្សែភាពយន្តអប់រំដ៏មានអត្ថន័យ ដែលផលិតដោយ គណៈកម្មាធិការជាតិប្រយុទ្ធអំពើជួញដូរមនុស្ស និង អង្គការមូលនិធិA21 នាពេលនេះ ឲ្យបានកាន់តែទូលំទូលាយទៅដល់ប្រជាពលរដ្ឋគ្រប់ គ្រប់ស្រទាប់វណ្ណៈ ជាពិសេសសជនដែលងាយរងគ្រោះ ដើម្បីឲ្យពួកគាត់ទទួលបានការយល់ដឹងស្តីពី ការរៀបការដោយបង្ខំ និងការកេងប្រវ័ញ្ចផ្លូវភេទតាមអនឡាញ ដែលជាកង្វល់មួយ ដែលត្រូវតែដោះស្រាយ ព្រោះវាអាចប៉ះពាល់ និងកើតឡើងចំពោះគ្រួសារ សាច់ញាតិ ឬមិត្តភក្តិរបស់អ្នកទាំងអស់គ្នា។
លោកជំទាវ ជូ ប៊ុនអេង ក៏បានថ្លែងអំណរគុណដល់ អង្គការមូលនិធិ A21កម្ពុជា សម្រាប់កិច្ចសហការ ក្នុងភាពជាដៃគូ ជាមួយលេខាធិការដ្ឋានប្រយុទ្ធប្រឆាំងអំពើជួញដូរមនុស្សខេត្ត នឹងរដ្ឋបាលខេត្ត ដើម្បីប្រយុទ្ធប្រឆាំងអំពើជួញដូរមនុស្ស នាពេលកន្លងមក និងសូមបន្តផ្សព្វផ្សាយយុទ្ធនាការនេះ ឲ្យបានកាន់តែទូលំទូលាយបន្ថែមទៀត នៅទូទាំងខេត្តសៀមរាប និងទូទាំងប្រទេស។
អត្ថបទ៖ ស៊ាន សុផាត
កែសម្រួល៖ សេង ផល្លី
