ថ្ងៃទី២៧ ខែកុម្ភៈ ឆ្នាំ ២០២៤ ត្រូវបានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី កំណត់ជាថ្ងៃកាន់ទុក្ខផ្លូវការ នៃការចូលទិវង្គតសម្តេចព្រះមហាសង្ឃរាជ ទេព វង្ស ដោយតម្រូវឱ្យគ្រប់ស្ថាប័ន និងប្រជាជនទូទាំងប្រទេសបង្ហូតទង់ជាតិ និងទង់សាសនា ត្រឹមពាក់កណ្តាលដង។ ទន្ទឹមនោះ នៅរសៀលថ្ងៃម្សិលមិញនេះដែរ នៅតាមបណ្ដាវត្តចំនួន ២៦១វត្ត និងអាស្រម ចំនួន ១៨ ក្នុងខេត្តសៀមរាប ក៏បានរៀបចំពិធីវាយគង ទូងស្គរ សូត្រមន្ត បង្សុកូល ឧទ្ទិសថ្វាយព្រះរាជវិញ្ញាណក្ខន្ឋ ព្រះសព ដែលបង្ហាញពីការសោកស្តាយ អាឡោះអាល័យចំពោះការបាត់បង់ធនធានមនុស្ស ដ៏សំខាន់របស់កម្ពុជា។
តាមការឱ្យដឹងតាមប្រព័ន្ធទំនាក់ទំនងតេឡេក្រាម នៅល្ងាចម្សិលមិញនេះ លោក វណ្ណ ប៊ុនណា ប្រធានមន្ទីរធម្មការនិងសាសនាខេត្តសៀមរាប បញ្ជាក់ថា៖ ក្រោយពីទទួលបានសារាចរណែនាំរបស់រាជរដ្ឋាភិបាល ក៏ដូចជាសេចក្តីប្រគេនដំណឹងរបស់គណៈសង្ឃនាយក មន្ទីរបានណែនាំដល់វត្តទាំង ២៦១វត្ត និងអាស្រមទាំង១៨ ក្នុងទូទាំងខេត្ត សូមនិមន្តអនុវត្ត វាយគង ទូងស្គរ និងបង្ហូតទង់ជាតិ ទង់សាសនាត្រឹមពាក់កណ្តាលដង។
ព្រះគ្រូ ហ៊ាក់ គឹមហ៊ត់ ព្រះចៅធីការវត្តអារញ្ញសាគរ មានសង្ឃដីកាថា នៅអារញ្ញសាគរ មានការចូលរួមព្រះសង្ឃ គណៈកម្មការវត្ត ដូនជីតាជី ប្រជាពុទ្ឋបរិស័ទចំណុះជើងវត្ត និងលោកគ្រូ អ្នកគ្រូ សិស្សានុសិស្សយ៉ាងច្រើនកុះករ បានមកបូជាផ្កាភ្ញី ធូបទៀន នមស្សកាសមាទានសីល សូត្រមន្ត បង្សុកូល ដែលជាការសម្តែងនូវទុក្ខក្រៀមក្រំ អាឡោះអាល័យជាទីបំផុត។
សូមជម្រាបថា សម្ដេចព្រះអគ្គមហាសង្ឃរាជាធិបតី ព្រះនាម ទេព វង្ស គណៈមហានិកាយនៃព្រះរាជាណាចក្រកម្ពុជាប្រសូត្រនៅថ្ងៃទី១២ ខែមករា ឆ្នាំវក គ.ស.១៩៣២ នៅឃុំជ្រាវ ស្រុកប្រាសាទបាគង ខេត្តសៀមរាប។ បិតាព្រះអង្គនាម ទេព ឈិត មាតានាម ប៉ិច អាត់ ។ ព្រះអង្គសាងព្រះផ្នួសលើកទី១នៅឆ្នាំរោង គ.ស.១៩៥២ នៅវត្តរាជបូណ៌ ខេត្តសៀមរាប។សាងព្រះផ្នួសលើកទី២ នៅថ្ងៃ១៩ កញ្ញា ឆ្នាំ១៩៧៩ នៅវត្តឧណ្ណាលោមក្រុងភ្នំពេញ។ នៅឆ្នាំ១៩៧៩ ដដែលបានឡើងនាទីជាព្រះវិន័យធរ ប្រធានសង្ឃ និងជាព្រះឧបជ្ឈាហ៍ទូទាំងប្រទេស បន្តពីព្រះគ្រូមហាថេរ ព្រះនាមកើត វ៉ាយ។ព្រះវិន័យធរ ទេព វង្ស ទ្រង់ជាព្រះឧបជ្ឈាហ៍ធំជាងគេដែលបានបំបួសរាល់ព្រះថេរចាស់ៗដែលជាអតីតព្រះថេរសម័យមុន ដែលបានផ្សឹកក្នុងសម័យខ្មែរក្រហម ហើយរស់រានជីវិតក្រោយរបបខ្មែរក្រហម និងបានចូលមកបួសបំពេញឧបសម្បទាជាផ្លូវការឡើងវិញក្នុងសំណាក់ព្រះវិន័យធរ ទេព វង្ស នៅវត្តឧណ្ណាលោម នាឆ្នាំ១៩៧៩។
អត្ថបទ និងរូបភាព៖ យូ វង្ស
កែសម្រួល៖ សេង ផល្លី
