តាមរយៈលទ្ធផលនៃការប្រឡងមធ្យមសិក្សាទុតិយភូមិ ឬហៅថា ជាប់បាក់ឌុប ក្នុងឆ្នាំសិក្សា២០២២-២០២៣ មានខេត្តសៀមរាប មានអត្រាសិស្សប្រឡងជាប់៨០.៨៩ភាគរយ នៃចំនួនសិស្សសរុបចំនួន ៦៤ ៦៩៤នាក់ ក្នុងនោះទទួលបាននិទ្ទេសA ១៨៨នាក់ នេះបើតាមរបាយការណ៍របស់លោក លី ប៊ុណ្ណា ប្រធានមន្ទីរអប់រំ យុវជន និងកីឡា ខេត្តសៀមរាប ក្នុងពិធីបើកសន្និបាតបូកសរុបការងារអប់រំឆ្នាំ២០២២ -២០២៣ និងលើកទិសដៅការងារឆ្នាំ២០២៣-២០២៤ នាថ្ងៃទី២៨ ខែកុម្ភៈ ឆ្នាំ២០២៣។
របាយការណ៍ដដែលនេះ បញ្ជាក់ថា នៅទូទាំងខេត្តសៀមរាប មានកន្លែងផ្ដល់សេវាអប់រំ រួមមាន មត្តេយសិក្សា រហូតដល់វិទ្យាល័យ រដ្ឋ និងឯកជន សរុប ១៤៧០សាលា កន្លែង និងមានសិស្សសរុប ៣០៨ ៣៧៧នាក់ (ស្រី១៥៥ ២៨៣នាក់)។ ក្នុងនោះ ការអប់រំនៅមធ្យមសិក្សា បានគ្រប់ដណ្ដប់គ្រប់ឃុំ សង្កាត់ ទូទាំងខេត្តសៀមរាប។
សម្រាប់ឆ្នាំសិក្សា២០២៣-២០២៤នេះ លោក លី ប៊ុណ្ណា បង្ហាញថា ការអប់រំលើកុមារតូច ក៏ត្រូវបានយកចិត្តទុកដាក់តាមគ្រប់រូបភាព និងតាមកម្មវិធីផងដែរ។ រីឯការអប់រំក្រៅប្រព័ន្ធ ក៏បានផ្តល់ឱកាសរៀនសូត្រដល់កុមារ និងយុវជនក្រៅសាលា សិស្សបោះបង់ការសិក្សា អនក្ខរជនគ្រប់វ័យ ក៏នឹងជួយឲ្យពួកគេទទួលបានចំណេះដឹង ចំណេះធ្វើ ក្នុងការកែលម្អគុណភាពជីវភាពរស់នៅ ឱ្យកាន់តែប្រសើរឡើង។
អញ្ជើញជាអធិបតី ក្នុងពិធីនោះ លោកស្រី ម៉ននី រង្សី អភិបាលរងខេត្តសៀមរាប បញ្ជាក់ថា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវគោលនយោបាយបញ្ចកោណ ដោយវិស័យអប់រំស្ថិតនៅក្នុងបញ្ចកោណទី១ ដែលសំដៅដល់ការពង្រឹងគុណភាពអប់រំ កីឡា វិទ្យាសាស្ត្រ និងបច្ចេកវិទ្យា។ ជាមួយគ្នានេះ រាជរដ្ឋាភិបាល ក៏បានដាក់ចេញនូវវិធានការគន្លឹះ សម្រាប់ការដោះស្រាយ ក្នុងគោលដៅលើកកម្ពស់គុណភាពអប់រំ ដោយផ្តោតលើគុណភាពសាលារដ្ឋ ចាប់ផ្តើមពីថ្នាក់មតេយ្យ ដល់មធ្យមសិក្សា។ បន្ថែមលើនេះ ការអប់រំក្រៅប្រព័ន្ធ ក៏នៅតែជា ផ្នែកមួយ ត្រូវយកចិត្តទុកដាក់ផងដែរ ដែលជាការរួមចំណែកយ៉ាងសំខាន់ ដល់ការអភិវឌ្ឍរបស់ប្រទេស។
ទន្ទឹមគ្នានេះដែល លោកស្រី ម៉ននី រង្សី ក៏បានជំរុញដល់គ្រប់គ្រឹះស្ថានអប់រំសិក្សា ត្រូវខិតខំធ្វើយ៉ាងជំរុញសកម្មភាពអប់រំកាយ និងកីឡា ក៏ដូចជាការខិតខំប្រែក្លាយសាលា ឲ្យក្លាយជាសាលាបរិស្ថានមេត្រី។ លោកស្រី បន្ថែមថា នៅតាមសាលារៀនមួយចំនួនមានសួនច្បារ សួនបន្លែ និងដើមឈើធំៗ ប៉ុន្តែក៏នៅមានសាលារៀនមួយចំនួនតូច ដែលទើបបង្កើតនៅមិនទាន់មាននៅឡើយ។ ដូច្នេះ សូមគណៈគ្រប់គ្រងសាលា រៀបចំជាបណ្តើរៗ ព្រោះថា ការដាំបន្លែ ការដាំដើមឈើក៏ជាការបណ្តុះគំនិតដល់កុមារតូចៗ និងសិស្សានុសិស្ស និងក្មេងៗជំនាន់ក្រោយ ឲ្យពួកគាត់ចេះចូលរួមស្រឡាញ់ធម្មជាតិ និងថែរក្សាបរិស្ថាន។
អត្ថបទ និងរូបភាព៖ ជា ស្រស់
កែសម្រួល៖ សេង ផល្លី
