នៅរសៀលថ្ងៃទី២៩ ខែកុម្ភៈ ឆ្នាំ២០២៤នេះ តំណាងក្រុមប្រឹក្សាខេត្ត និងរដ្ឋបាលខេត្តសៀមរាប ព្រមទាំងមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស ក្នុងខេត្តសៀមរាប បានអបអរសាទរ ជាមួយនឹងក្បួនដង្ហែកិត្តិយសយ៉ាងអធិកអធម ដល់ជ័យលាភី អង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល ឆ្នាំ២០២៣ ដែលក្នុងនោះ មណ្ឌលសុខភាពគោកចក ស្ថិតក្នុងសង្កាត់គោកចក ទទួលបានជ័យលាភីលេខ២ អនុវិទ្យាមិត្តភាពកម្ពុជា-ជប៉ុន ព្រះឥន្ទកោសា ស្ថិតក្នុងសង្កាត់ស្លក្រាម ទទួលបានជ័យលាភីលេខ២ សាលាបឋមសិក្សាវត្តបូព៌ ក្នុងសង្កាត់សាលាកំរើក ទទួលបានចំណាត់ថ្នាក់លេខ៣ និងសាលាបឋមសិក្សា ក្រវ៉ាន់ ក្នុងសង្កាត់នគរធំ ទទួលបានចំណាត់ថ្នាក់លេខ៦។
អញ្ជើញជាអធិបតីក្នុងពិធីដង្ហែក្បួននោះ លោកស្រី ម៉ននី រងី្ស អភិបាលរងខេត្ត តំណាង ឯកឧត្តម ប្រាក់ សោភ័ណអភិបាលខេត្តសៀមរាប បង្ហាញថា ការវាយតម្លៃ និង ការទទួលស្គាល់អង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល ដោយរាជរដ្ឋាភិបាលកម្ពុជានៅពេលនេះ មានគោលបំណង ដើម្បីលើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈ សំដៅបម្រើប្រជាពលរដ្ឋ ក្នុងមូលដ្ឋានឲ្យកាន់តែប្រសើរឡើង។ លោកស្រីបន្តថា ដើម្បីបន្តជម្រុញការធ្វើកំណែទម្រង់វិស័យអប់រំ លើកកម្ពស់ការសិក្សារបស់សិស្ស និងរួមចំណែកអភិវឌ្ឍន៍ធនធានមនុស្ស ដែលជាវិស័យអាទិភាព ដំណាក់កាលទី១ នៃ យុទ្ធសាស្ត្របញ្ចកោណរបស់រាជរដ្ឋាភិបាល ក្នុងនីតិកាលទី៧ នៃរដ្ឋសភានេះ សម្ដេចធិបតី ហ៊ុន ម៉ាណែត បានប្រកាសដាក់ឲ្យអនុវត្តន៍ជាផ្លូវការទូទាំងប្រទេស នូវស្តង់ដាសាលារៀនគំរូចំនួន៥ ដើម្បីលើកកម្ពស់គុណភាពបង្រៀន និងលទ្ធផលសិក្សាសិស្ស រួមមានស្តង់ដា ទី១.លទ្ធផលសិក្សារបស់សិស្ស ស្តង់ដាទី២.ការបង្រៀននិងរៀន ស្តង់ដាទី៣.ការចូលរួមរបស់សហគមន៍ ស្ដង់ដាទី៤.ដំណើរប្រតិបត្តិការនិងរដ្ឋបាលសាលារៀន ស្តង់ដាទី៥. គណនេយ្យភាពរបស់សាលារៀន ។
លោក ស្រីអភិបាលរងខេត្ត បានថ្លែងកោតសរសើរដល់អង្គភាពសាធារណៈរបស់ខេត្តទាំងអស់ ដែលខិតខំអភិវឌ្ឍន៍អង្គភាពរបស់ខ្លួន និងបំពេញលក្ខក្ខណ្ឌ ដើម្បីចូលរួមវាយតម្លៃនៅថ្នាក់ជាតិទាំង ៦អង្គភាព នាពេលកន្លងទៅ។ បើទោះបីជា មិនមានអង្គភាពណាទទួលបានជ័យលាភីលេខ១ ក៏ពិតមែន ប៉ុន្តែវាក៏ជាមោទនភាពដ៏ធំធេង ដែលខេត្តសៀមរាបទទួលបាន ជ័យលាភីចំនួន៤ នៃអង្គភាពសរុបចំនួន ៦របស់ខេត្ត ដែលបានចូលរួមវាយតម្លៃនៅថ្នាក់ជាតិ។
ព័ត៌មានជាតិ ថ្មីៗ
គួរជម្រាបថា ការទទួលស្គាល់ជ័យលាភីរបស់អង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាល ឆ្នាំ២០២៣ និង ប្រកាសដាក់ឲ្យអនុវត្តសម្រាប់ឆ្នាំ២០២៤ បានប្រារព្ធឡើងនៅរាជធានីភ្នំពេញ កាលពីថ្ងៃទី២២ ខែកុម្ភៈ ឆ្នាំ២០២៤ ក្រោមអធិបតីដ៏ខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
គួររំលឹកដែរថា ការវាយតម្លៃ និងការទទួលស្គាល់អង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាល ត្រូវបានដាក់ឲ្យអនុវត្តដោយអនុក្រឹត្យលេខ ៥៤ អនក្រ.បក ចុះថ្ងៃទី៣០ ខែមេសា ឆ្នាំ ២០១៨ ប៉ុន្តែកម្មវិធីនេះត្រូវបានអាក់ខានទៅវិញ នៅអំឡុងពេលនៃការរីករាលដាលនៃជំងឺកូវីដ-១៩។
អត្ថបទ និងរូបភាព៖ យូ វង្ស និងជា ស្រស់
កែសម្រួល៖ សេង ផល្លី
