ព្រឹត្តិការណ៍នៃការប្រកួតបាល់ទាត់ពានរង្វាន់កម្រិតយុវជនប្រចាំខេត្តសៀមរាប U17 SIEM REAP YOUTH CUP ឆ្នាំ២០២៤ ត្រូវបានបិទបញ្ចប់ហើយនៅថ្ងៃអាទិត្យចុងសប្ដាហ៍នេះ បន្ទាប់ពីឆ្លងកាត់ការប្រកួតរយៈពេល ២២ថ្ងៃ នាកីឡាដ្ឋានហនុមាន ក្រុងខេត្តសៀមរាប ខណៈម្ចាស់ជើងឯកបានទៅលើក្រុមសៀមរាបយូណាយធីត។
បើតាមគណៈកម្មការរៀបចំការប្រកួត បានឲ្យដឹងថា ព្រឹត្តិការណ៍នេះមានកីឡាករចំនួន៨ក្រុមចូលរួម បែងចែកជា២ពូល មានដូចជា៖ក្រុមសៀមរាបយូណាយធីត, ក្រុមយុវជនដំបងធំ, ក្រុមយុវជនដំរី និងក្រុមយុវជន KGM Cambodia, ក្រុមយុវជនផ្លូវជីវិតយូណាយធីត, ក្រុមយុវជន SRBC FC, ក្រុមយុវជនដើម្បីសង្គម, ក្រុមយុវជនឬស្សីស។ ឆ្លងកាត់ការប្រកួតវិលជុំក្នុងពូល ៣លើកកន្លងមក ដែលធ្វើតាមរយៈរូបមន្តរបស់គណៈកម្មការ SIEM REAP YOUTH CUP ក្រុមកំពូលតារាងនៃពូលទាំងពីរ នឹងចាប់ដៃគ្នាប្រកួតនៅវគ្គផ្តាច់ព្រ័ត្រ។ ជាលទ្ធផលម្ចាស់ជើងឯកបានទៅលើក្រុមសៀមរាបយូណាយធីត ខណៈក្រុមយុវជន SRBC FC ទទួលបានជើងឯករង។
ក្នុងឱកាសបិទបញ្ចប់ពញរឹត្តិការណ៍នេះដែរ លោក សំកុល សុចិត្រា អភិបាលរងខេត្ត បានបញ្ជាក់ថា គោលបំណងធំក្នុងការរៀបចំព្រឹត្តិការណ៍ការប្រកួតកីឡា U17 នេះឡើង គឺជម្រុញដល់យុវជនកម្ពុជាឲ្យមានជំនាញផ្នែកបាល់ទាត់នេះកាន់តែល្អប្រសើរបន្ថែមទៀត។ លើសពីនេះទៅទៀតគឺជម្រុញការលេងបាល់នេះឲ្យកាន់តែខ្លាំង និងមានការប្រកួតប្រជែងគ្នាជាងមុនៗទៅទៀត។ ឆ្លងកាត់ការប្រកួតទាំងនេះ វានឹងធ្វើឲ្យយុវជនកាន់តែមានទំនាក់ទំនងល្អទៅវិញទៅមកបន្ថែមទៀត ជាពិសេសរវាងខេត្ត និងខេត្តក្នុងតំបន់ប្រទេសជិតខាងផងដែរ។ ម៉្យាងទៀតកីឡាបានធ្វើឲ្យយុវជនយើងបានចាកចេញឆ្ងាយពីគ្រឿងញៀន និងធ្វើឲ្យមានកាយសម្បទាសុខភាពមាំមួនទៀតផង។
លោកអភិបាលរងខេត្ត ក៏បានផ្តាំផ្ញើដល់យុវជនទាំងអស់ ត្រូវនាំគ្នាលេងកីឡាព្រោះការលេងកីឡានាំឲ្យមនុស្សជាតិជួបជុំគ្នា ជាពិសេសកីឡាជួយពង្រឹងនូវសាមគ្គីភាពក្នុងសង្គមមនុស្សជាតិ។ កីឡាគ្រប់ប្រភេទ គឺជាការប្រកួតប្រជែងដ៏ស្វិតស្វាញដើម្បីជ័យជម្នះ ប៉ុន្តែគ្រូកីឡាទាំងអស់ កីឡាករកីឡាការិនី ជាទូតដែលនាំឲ្យគ្រប់គ្នាបានស្គាល់គ្នា បានជួបគ្នា បានស្រឡាញ់គ្នា។ កីឡា គឺទីកន្លែងដែលធ្វើឲ្យយើងបានជួបគ្នាលើពិភពលោក ហើយក៏ជាទីសុខសន្តិភាពដែរ។ កីឡានាំមកសន្តិភាព យើងមានសុខសន្តិភាពបានយើងលេងកីឡាបាន៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
