នៅថ្ងៃទី០៤ ខែមីនាឆ្នាំ២០២៤នេះ ឧត្តមសេនីយ៍ឯក គង់ ប៊ុនលី មេបញ្ជាការរង បញ្ជាការដ្ឋានអង្គរក្សប្រចាំទិសទី១ ទីបញ្ជាការស្រាលសៀមរាប(ភ្នំបូក) បាននាំយកអំណោយជាគ្រឿងឧបភោគបរិភោគពីនាយឧត្តមសេនីយ៍ កិតិ្តសង្គហបណ្ឌិត ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការដ្ឋានអង្គរក្ស រួមនឹងសហការី មកចែកជូនដល់គ្រួសារប្រជាពលរដ្ឋមានពិការភាព និងមានជីវភាពខ្វះខាតចំនួន ១០គ្រួសាររស់នៅក្នុងក្រុងសៀមរាប និងស្រុកប្រាសាទបាគង ខេត្តសៀមរាប ដើម្បីជួយសម្រាលការលំបាកក្នុងជីវភាពចាំបាច់ប្រចាំថ្ងៃ ដោយក្នុងមួយគ្រួសារទទួលបាន៖ អង្ករ៥០គីឡូក្រាម មី១កេសធំ ត្រីខ២យួរ ទឹកត្រី១យួរ ទឹកស៊ីអ៊ីវ០១យួរ ថវិកា៤៥ម៉ឺនរៀល។
ក្នុងឱកាសនោះ ឧត្តមសេនីយ៍ឯក គង់ ប៊ុនលី បានមានប្រសាសន៍ថា អំណោយដែឡបាននាំយកមកចែកជូននាពេលនេះ គឺជាការជួយសម្រាលទុកលំបាកក្នុងជីវភាពប្រចាំថ្ងៃរបស់បងប្អូនដែលខ្លះមានពិការភាព គ្រួសារខ្លះពុំមានមុខរបរច្បាស់លាស់ មានកូនច្រើន ចាស់ជរា មានជីវភាពលំបាកខ្លាំង ហើយការសម្រេចផ្តល់ជូនទាំង១០គ្រួសារនេះ គឺធ្វើឡើងតាមរយៈសហការគ្នាចុះពិនិត្យស្ថានភាពជាក់ស្តែងនៅតាមខ្នងផ្ទះគ្រួសារនីមួយៗ។
ឧត្តមសេនីយ៍ឯក គង់ ប៊ុនលី បន្តថា ក្នុងនាមយើងជាពុទ្ឋសាសនិកគោរព និងជឿតាមឱវាទព្រះពុទ្ឋ គឺតែងតែប្រកាន់យកតាមនូវគោលធម៌របស់ព្រះសម្មាសម្ពុទ្ឋបរមគ្រូនៃយើង ឱ្យយើងទាំងអស់គ្នាប្រព្រឹត្តិតែអំពើល្អ តាមរយៈការសាមគ្គីជួយគ្នា ចែករំលែកដល់គ្នាទៅវិញទៅមកទៅតាមលទ្ឋភាពដែលយើងអាចធ្វើបានជូនទៅដល់អ្នកទីទ័លខ្វះខាត ជនជរាពិការ និងគ្រួសារមានការលំបាកក្នុងជីវភាពជាក់ស្តែង។ ក្នុងនោះក៏សូមផ្តាំផ្ញើរដល់បងប្អូនទាំងអស់មុននឹងបរិភោគ សូមនឹកឃើញដល់ប្រភពម្ចាស់ទាន ដើម្បីសម្តែងនូវការគោរពដឹងគុណផង និងជាកាយវិការគំរូដ៏ប្រពៃមួយសម្រាប់សង្គមគ្រួសារក៏ដូចជាសង្គមជាតិទាំងមូលផង ដើម្បីឱ្យកូនចៅជំនាន់ក្រោយរៀនសូត្រតាម និងដើម្បីបណ្តុះទឹកចិត្តឱ្យចេះគោរពដឹងគុណ ស្រឡាញ់ថែរក្សាប្រពៃណីទំនៀមទម្លាប់វប្បធម៌សាសនា ដែលបុព្វបុរសខ្មែរយើងតែងតែទូន្មានប្រៀនប្រដៅទុកមកជាយូរមកហើយ។
ឧត្តមសេនីយ៍ឯក រំលឹកថា ភាសិតខ្មែរបានពោលថា ផឹកទឹកត្រូវនឹកដល់ប្រភព ជ្រកម្លប់ត្រូវនឹកដល់អ្នកដាំ យ៉ាងណាម៉ិញវត្ថុទានដែលផ្តល់ជូននេះ កើតឡើងពីឆន្ទៈ និងកើតឡើងពីកត្តាប្រទេសជាតិមានសុខសន្តិភាព បើប្រទេសជាតិគ្មានសន្តិភាពពេញលេញទេ យើងទាំងអស់គ្នាគ្មានឱកាសនឹងបានកសាងជីវភាពគ្រួសារ និងគ្មានឱកាសធ្វើបុណ្យទាន ឬចែករំលែកសង្គហសង្គ្រោះដល់អ្នកខ្វះខាតដូចពេលនេះដែរ ហេះហើយជាវប្បធម៌នៃការចែករំលែក ក្រោមម្លប់នៃដំបូលសន្តិភាពដែលទទួលបានមកដោយការលំបាក និងការលះបង់ខ្ពស់ បំផុតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ជាស្ថាបនិកនិងជាមគ្គុទេសក៍ឯកក្នុងការស្វែងរកសន្តិភាពតាមរយៈ នយោបាយឈ្នះឈ្នះ បាននាំមកនូវការផ្សះផ្សានិងបង្រួបបង្រួបជាតិ ក្រោមឆ័ត្រសន្តិភាពតែមួយ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
