នៅថ្ងៃទី២៧ ខែកុម្ភៈ ឆ្នាំ២០២៤នេះ សិស្សានុសិស្សសរុបចំនួន ១៩១នាក់ ដែលកំពុងសិក្សានៅសាលាបឋមសិក្សាគោកកក់ភីរ៉ូចាណា ស្ថិតនៅឃុំស្វាយចេក ស្រុកអង្គរធំ ដែលមានចម្ងាយពីក្រុងសៀមរាបប្រមាណជាង២០គីឡូម៉ែត្រ បានទទួលអំណោយជាឯកសណ្ឋាន និងសម្ភារៈសិក្សា ជាជំនួយរបស់ព្រះភិក្ខុនី ឆា អ៊ូ នៃវត្តភីរ៉ូចាណា និងសប្បុរសជននៃសាធារណរដ្ឋប្រទេសកូរ៉េ តាមរយៈអង្គការឡូតធឹសវើល។
តាមការឲ្យដឹងពីអ្នកគ្រូ ញោប សាយឿន ប្រធានកម្រងស្វាយចេក បង្ហាញថា សម្រាប់ឆ្នាំសិក្សា២០២៣ ២០២៤នេះ សាលាបឋមសិក្សានេះ មានសិស្សកំពុងសិក្សាចំនួន ៦ថ្នាក់ ចាប់ពីថ្នាក់ទី១ ដល់ថ្នាក់ទី៦ និងមត្តេយ្យសហគមចំនួន២ថ្នាក់ បែងចែកជាពីរវេនសិក្សា និងគ្រូបង្រៀនចំនួន ៥នាក់។
ព័ត៌មានជាតិ ថ្មីៗ
តំណាងឱ្យសប្បុរសជននៅប្រទេសកូរ៉េ លោក ស៊ីន យ៉ុនសប់ នាយកប្រចាំប្រទេស នៃអង្គការឡូតធឹសវើល បង្ហាញថា ចំពោះសម្ភារៈសិក្សា និងសម្លៀកបំពាក់ ដែលយកមកចែកជូនដល់ប្អូនៗសិស្សានុសិស្សនាពេលនេះ មានគោលបំណងលើកកម្ពស់ការសិក្សានៅតំបន់ជនបទ ជាពិសេសសិស្សានុសិស្សមានជីវភាពខ្វះខាត ដើម្បីរួមមចំណែកបំពេញតម្រូវ របស់ក្មួយៗឲ្យកាន់តែល្អប្រសើរ ក្នុងការសិក្សារៀនសូត្រ និងក្លាយជាធនធានមនុស្សសម្រាប់ប្រទេស។ លោកបន្តថា ក្រៅពីចែកសម្ភារៈសិក្សា និងសម្លៀកបំពាក់ កន្លងមកតាមរយៈអង្គការឡូតធឹសវើល ព្រះសង្ឃ និងសប្បុរសជន នៃប្រទេសកូរ៉េ ក៏បានសាងសង់ជាអគារសិក្សា បង្គន់អនាម័យ ប្រព័ន្ធចម្រោះទឹកស្អាត សួនលម្អ និងផ្តល់ជាសម្ភារសិក្សាដល់សិស្សនៅទីនេះ និងសាលារៀនដែលជួបការខ្វះខាតជាច្រើនទៀតផងដែរ។
សូមបញ្ជាក់ថា សម្លៀកបំពាក់ និងសម្ភារៈសិក្សា ដែលបានចែកជូនសិស្សានុសិស្សនាពេលនោះ ក្នុងម្នាក់ៗទទួលបានកាបូបស្ពាយ១ ខោអាវកីឡា ១ឈុត ឯកសណ្ឋានសិស្ស ១ឈុត និងសម្ភារៈសិក្សាមួយចំនួនទៀតផងដែរ។
អត្ថបទ និងរូបភាព៖ ធន់ ពូថេ និងស៊ុំ គីន
កែសម្រួល៖ សេង ផល្លី
