ខួបអនុស្សារីវយ៍ ៩ឆ្នាំ នៃក្លឹបម៉ូតូ BMW កម្ពុជា និងព្រឹត្តិការណ៍កីឡាទេសចរណ៍ IRON MAN RALLY 2024 មកពីប្រទេសថៃ បានរៃអង្គាសថវិកាសប្បុរសធម៌សរុបចំនួន ៦ ៨០០ដុល្លារអាមេរិក ដើម្បីជូនដល់មន្ទីរពេទ្យកុមារអង្គរ ស្ថិតក្នុងខេត្តសៀមរាប ដែលជាការរួមចំណែកក្នុងជួយសង្គ្រោះជីវិតកុមារកម្ពុជានៅទូទាំងប្រទេស ប្រកបដោយគុណភាព និងមិនគិតថ្លៃ។
ក្នុងមានអាជ្ញាធរខេត្តសៀមរាប លោក ង៉ូវ សេងកាក់ អភិបាលរងខេត្តសៀមរាប បានបង្ហាញនូវស្វាគមន៍យ៉ាងកក់ក្ដៅ ដល់ក្រុមកីឡាទេសចរណ៍ មកពីព្រះរាជាណាចក្រថៃ និងថ្លែងអំណរគុណដល់ក្លឹបម៉ូតូ BMW កម្ពុជា ដែលបានផ្ដួចផ្ដើមឱ្យកើតព្រឹត្តិការណ៍ ដ៏គួរឱ្យចាប់អារម្មណ៍នេះ។ លោក បន្ថែមថា កីឡាទេសចរណ៍ បានក្លាយជាយុទ្ធសាស្រ្តថ្មីនៅក្នុងតំបន់អាស៊ាន និងជាការរួមចំណែកទាក់ទាញភ្ញៀវទេសចរអន្តរជាតិ ឱ្យចូលមកទស្សនាកម្ពុជា ក៏ដូចជាខេត្តសៀមរាប កាន់តែច្រើនឡើងថែមទៀត។ ជាក់ស្ដែង ជារៀងរាល់ឆ្នាំ លើកលែងអំឡុងវិបត្តិកូវីដ១៩ រដ្ឋបាលខេត្តសៀមរាប តែងតែសហការជាមួយក្រសួងទេសចរណ៍ គណៈកម្មាធិការជាតិអូឡាំពិកកម្ពុជា និងភាគីពាក់ព័ន្ធ ដើម្បីរៀបចំទិវារត់ប្រណាំងពាក់កណ្តាលម៉ារ៉ាតុង ២ដងក្នុងមួយឆ្នាំ រួមជាមួយប្រភេទកីឡាទេសចរណ៍ដទៃទៀតផងដែរ។
ឆ្លៀតក្នុងឱកាសនោះ លោក អភិបាលរងខេត្ត ក៏បានថ្លែងអំណរគុណ ដល់ក្លឹបម៉ូតូធំកម្ពុជា និងថៃ ដែលបានយកចិត្តទុកដាក់លើការងារសង្គម ជាពិសេសការជួយលើកកម្ពស់សុខុមាលភាពកុមារកម្ពុជា។ លោក សង្ឃឹមថាក្លឹបម៉ូតូ BMW កម្ពុជា និងក្លឹបម៉ូតូធំថៃ នឹងបន្តរៀបចំព្រឹត្តិការណ៍នេះ នាឆ្នាំក្រោយៗទៀត ដើម្បីចូលរួមផ្សប្វផ្សាយអំពីសក្កានុពលទេសចរណ៍ របស់កម្ពុជា ជាពិសេសខេត្តសៀមរាបឱ្យបានទូលំទូលាយថែមទៀត។
គួរជម្រាបថា ក្នុងឱកាសទទួលទានអាហារសប្បុរសធម៌ នៅក្រុងសៀមរាប នាល្ងាចថ្ងៃទី២៥ ខែកុម្ភៈ ក្លឹបម៉ូតូ BMW កម្ពុជា បានរៃអង្គាសថវិកា សរុបចំនួន ៥៨០០ដុល្លារអារមេរិក រីឯកក្លឹបម៉ូតូធំនៃប្រទេសថៃ រៃអង្គាសថវិកាបានចំនួនសរុប ១០០០ដុល្លារអារមេរិក និងបានយកទៅប្រគល់ជូនមន្ទីរពេទ្យកុមារអង្គរ នៅថ្ងៃទី២៦ ខែកុម្ភៈនេះ។
អត្ថបទ និងរូបភាព៖ យូ វង្ស និង ទ្រា ពន្លឺ
កែសម្រួល៖ សេង ផល្លី
