ការបោះឆ្នោតជ្រើសតាំងសមាជិកព្រឹទ្ឋសភា នីតិកាលទី៥ ក្នុងខេត្តសៀមរាប បានបិទបញ្ចប់នៅម៉ោង១១និង៣០នាទី មុនកាលកំណត់ ដោយអង្គបោះឆ្នោតបានចូលរួមបោះគ្រប់ចំនួន នេះលោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប នៅព្រឹកថ្ងៃទី២៥ ខែកុម្ភៈ ឆ្នាំ២០២៤។
លោក នឹម វ៉ាន់សំ បញ្ជាក់ថា៖ ការបោះឆ្នោតអសកលនេះ មានអង្គបោះឆ្នោត ជាសមាជិកសមាជិកា នៃរដ្ឋសភា និងសមាជិក សមាជិកាក្រុមប្រឹក្សាឃុំសង្កាត់ ក្នុងមុខដំណែង។ ជាមួយនោះ អង្គបោះឆ្នោតត្រូវយកជាមួយ នូវឯកសារសម្រាប់បោះឆ្នោត ចំនួន ២ គឺ អត្តសញ្ញាបណ្ណសញ្ជាតិខ្មែរ ដែលមានសុពលភាព និងបណ្ណសម្គាល់ខ្លួន សម្រាប់សម្គាល់ជាសមាជិកសភាក្នុងមុខតំណែង ឬ បណ្ណសម្គាល់ខ្លួនជាសមាជិកក្រុមប្រឹក្សាឃុំ សង្កាត់ក្នុងមុខដំណែង។
លោក នឹម វ៉ាន់សំ បញ្ជាក់បន្ថែមថា៖ សម្រាប់មណ្ឌលខេត្ដសៀមរាប ស្ថិតនៅក្នុងភូមិភាគ៤ មានអង្គបោះឆ្នោតសរុបចំនួន ៦៧៤រូប ក្នុងនោះ មានសមាជិកសភាចំនួន ០៦រូប និងសមាជិកក្រុមប្រឹក្សាឃុំសង្កាត់ចំនួន ៦៦៨រូប និងមានគណបក្សនយោបាយ ចូលរួមបោះឆ្នោតចំនួន៤គណបក្ស។
តាមការលើកឡើង របស់លោក ស៊ន់ សុជាតិ អ្នកសង្កេតការណ៍ មកពីសហភាពសហព័ន្ធយុវជនកម្ពុជា ខេត្តសៀមរាប បានឱ្យដឹងថា ចាប់តាំងពីការចាប់ផ្ដើមបោះឆ្នោតនៅម៉ោង ៧ព្រឹក និងរហូតដល់ការរាប់សន្លឹកឆ្នោត ពុំមានសកម្មភាពមិនប្រក្រតី ឬអំពើហឹង្សាណាមួយកើតឡើងនោះឡើយ។
ដោយឡែក អង្គបោះឆ្នោតមកពីស្រុកជីក្រែង និងស្រុកបន្ទាយស្រី បានលើកឡើងថា ពួកគាត់ពេញចិត្ដការមកបោះឆ្នោតនេះ ព្រោះពួកគាត់បានបំពេញតួនាទីរបស់ខ្លួន ក្នុងការជ្រើសរើសថ្នាក់ដឹកនាំ ដែលពួកគាត់ពេញចិត្ដ។ ពួកគាត់បានបន្ដថា ការបោះឆ្នោតនេះ ពិតជាមានសារៈសំខាន់ ក្នុងការជ្រើសរើសថ្នាក់ដឹកនាំនៅស្ថាប័នព្រឹទ្ធសភា ដែលជាស្ថាប័នកំពូលរបស់ជាតិ។
យោងតាមរបាយការណ៍ របស់គណៈកម្មការរៀបចំការបោះឆ្នោតខេត្តសៀមរាប បានបង្ហាញថា លទ្ធផលបណ្ដោះអាសន្ន នៃការបោះឆ្នោតជ្រើសតាំងសមាជិកព្រឹទ្ធសភានិតិកាលទី៥នេះ គណបក្សប្រជាជនកម្ពុជា ទទួលបាន៥៤៤សំឡេង គណបក្សហ្វុនស៊ិនប៉ិច ទទួលបាន ០១សំឡេង គណបក្សឆន្ទៈខ្មែរ ទទួលបានចំនួន ២២សំឡេង និងគណបក្សកម្លាំងជាតិបានចំនួន១០៧សំឡេង។
អត្ថបទ និងរូបភាព៖ យូវង្ស និង បូ សាវី
កែសម្រួល៖ សេង ផល្លី
