ព្រឹត្តិការណ៍កីឡាឆ្លងកាត់ឧបសគ្គ Raid Amazones ដ៏មានប្រជាប្រិយភាពមួយរបស់ពិភពលោក នឹងរៀបចំឡើងជាលើកទី៤ នៅក្នុងខេត្តសៀមរាប រយៈពេល ៥ថ្ងៃ ចាប់ពីថ្ងៃទី១៥ ដល់ថ្ងៃទី២០ ខែមីនា ឆ្នាំ២០២៤ខាងមុខនេះ និងមានកីឡាការិនីអន្តរជាតិប្រមាណជាង២០០នាក់។
ថ្លែងនៅក្នុងកិច្ចប្រជុំ នៅសាលាខេត្តសៀមរាប ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា បញ្ជាក់ថា ព្រឹត្តិការណ៍កីឡាឆ្លងកាត់ឧបសគ្គ Raid Amazones ថ្វីត្បិតតែជាកីឡាដែលមានប្រជាប្រិយភាព ប៉ុន្តែកីឡានេះ ពុំផ្ដោតសំខាន់លើការប្រកួតប្រជែង ដើម្បីដណ្ដើមចំណាត់ថ្នាក់នោះទេ។ ប៉ុន្តែកីឡានេះ ជាកីឡាបែបកម្សាន្ត ដោយអ្នកចូលរួមជាស្ត្រីទាំងអស់ តម្រូវឱ្យឆ្លងកាត់វិញ្ញាសារចំនួន ៣ រួមមាន រត់ឆ្លងកាត់ឧបសគ្គ ប្រណាំងទូកកានូ ជិះកង់ នៅក្នុងតំបន់រមណីដ្ឋានអង្គរ និងនៅតំបន់បឹងទន្លេសាប ដូចជា កំពង់ឃ្លាំង និងចុងឃ្នៀសជាដើម។
ព័ត៌មានជាតិ ថ្មីៗ
ឯកឧត្តម វ៉ាត់ ចំរើន បន្ថែមថា បន្ទាប់ពីបញ្ចប់វិញ្ញាសារប្រកួតទៅតាមថ្ងៃ និងតំបន់នីមួយៗ កីឡាការិនីទាំងអស់ នឹងសិក្សាស្វែងយល់ពីប្រវត្តិសាស្ត្រ ជីវភាពរស់នៅរបស់ប្រជាពលរដ្ឋកម្ពុជា នៅក្នុងតំបន់នីមួយៗ ក្នុងខេត្តសៀមរាប។ ព្រឹត្តិការណ៍កីឡាឆ្លងកាត់ឧបសគ្គ Raid Amazones នៅឆ្នាំនេះ មានកីឡាការិនីចូលរួមប្រមាណជាង ២០០នាក់ ដែល៧០ភាគរយមកពីប្រទេសបារាំង ក្នុងនោះកីឡាការិនីជនជាតិខ្មែរ មានចំនួន ៣ក្រុមផងដែរ។
គួរជម្រាបថា RAID Amazones ជាព្រឹត្តិការណ៍កីឡាអន្តរជាតិមួយដ៏មានប្រជាប្រិយភាព នៅលើពិភពលោក ដែលមានរយៈពេល ជាង២០ឆ្នាំមកហើយ។ កីឡាបែបផ្សងព្រេងនេះ រៀបចំនៅប្រទេសកម្ពុជា ជាលើកដំបូងក្នុងឆ្នាំ២០១៤ លើកទី២ នៅឆ្នាំ២០១៧ និងលើកទី៣ នៅឆ្នាំ២០១៨ និងបានផ្អាកដំណើរការ ដោយវិបត្តិនៃជំងឺកូវីដ១៩។
អត្ថបទ និងរូបភាព៖ ធន់ ពូថេ
កែសម្រួល៖ សេង ផល្លី
