មានប្រសាសន៍បិទអង្គសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត ដែលបានរៀបចំឡើងនៅខេត្តសៀមរាប លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានវាយតម្លៃខ្ពស់ដល់ក្រសួង ស្ថាប័នពាក់ព័ន្ធ ជាពិសេសចំពោះអាជ្ញាធរដែនដី ប្រធានក្រុមការងារពិសេសថ្នាក់ខេត្តលុបបំបាត់ជំងឺគ្រុនចាញ់ ព្រមទាំងមន្ទីរ អង្គភាពពាក់ព័ន្ធនានា ក៏ដូចជាកងកម្លាំងប្រដាប់អាវុធ អាជ្ញាធរមូលដ្ឋាន អ្នកស្ម័គ្រចិត្តព្យាបាលជំងឺគ្រុនចាញ់ ដៃគូអភិវឌ្ឍ និងដៃគូអនុវត្តនានា ដែលបានយកចិត្តទុកដាក់ខ្ពស់ ចូលរួមយ៉ាងសស្រាក់សស្រាំ ខិតខំប្រឹងប្រែងសហការគ្នាប្រកបដោយស្មារតីទទួលខុសត្រូវខ្ពស់ ដើម្បីឱ្យការប្រតិបត្តិសកម្មភាពការងាររបស់កម្មវិធីជាតិទាំងនេះ បានដំណើរការទៅដោយរលូនជាបន្តបន្ទាប់មកដល់បច្ចុប្បន្ននេះប្រកបដោយសមិទ្ធផលវិជ្ជមានគួរជាទីមោទនៈយ៉ាងខ្លាំង។
លោកជំទាវមានប្រសាសន៍ថា៖ កម្មវិធីជាតិប្រយុទ្ធនឹងជំងឺគ្រុនចាញ់ កម្មវិធីជាតិប្រយុទ្ធនឹងជំងឺគ្រុនឈាម និងកម្មវិធីជាតិប្រយុទ្ធនឹងជំងឺដង្កូវព្រូន គឺជាកម្មវិធីជាតិ ដែលបាននឹងកំពុងតែដើរតួរយ៉ាងចម្បង ក្នុងការចូលរួមចំណែកជាមួយរាជរដ្ឋាភិបាល ក្នុងការលើកកម្ពស់សុខមាលភាពរបស់ប្រជាពលរដ្ឋ តាមរយៈការប្រតិបត្តិការអនុវត្តការងាររបស់ខ្លួនប្រកបដោយស្មារតី និងលទ្ធភាពទទួលខុសត្រូវខ្ពស់ក្នុង បរិបទដែលប្រទេសជាតិកំពុងមានសុខសន្តិភាព ស្ថេរភាពនយោបាយ និងការអភិវឌ្ឍន៍ ដូច្នេះតាមរយៈសន្និបាតនេះ សង្ឃឹមថា៖បណ្តាដៃគូអភិវឌ្ឍនិងអ្នកអនុវត្ត នឹងរួមគ្នាអនុវត្តសកម្មភាពការងាររបស់កម្មវិធីជាតិទាំងបី ឲ្យកាន់តែមានប្រសិទ្ធភាព ដើម្បីបន្តការកាត់បន្ថយអត្រាឈឺ/ស្លាប់ ពិសេសគោលដៅលុបបំបាត់ជំងឺគ្រុនចាញ់របស់រាជរដ្ឋាភិបាល នាឆ្នាំ២០២៥ ។
លោកជំទាវ ក៏បានជំរុញដល់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត ត្រូវបន្តពង្រឹងភាពជាម្ចាស់ ភាពជាអ្នកដឹកនាំ និងនវានុវត្តន៍ ព្រមទាំងសម្របសម្រួលកម្មវិធី តម្រង់ទិសនិងពង្រឹងការប្រតិបត្តិអនុវត្តយុទ្ធសាស្រ្តជាតិទៅថ្នាក់ក្រោមជាតិ និងសហគមន៍ ពិសេស តាមរយៈក្រុមការងារពិសេសលុបបំបាត់ជំងឺគ្រុនចាញ់ថ្នាក់ខេត្ត-ស្រុក និងមន្ទីរសុខាភិបាលនៃរដ្ឋបាលរាជធានី-ខេត្ត។
សូមជំរាបថា៖សន្និបាតនេះ ប្រព្រឹត្តទៅមានរយៈពេលបីថ្ងៃ ចាប់ពីថ្ងៃទី២០ដល់ថ្ងៃទី២៣ខែកុម្ភៈ ឆ្នាំ២០២៤ នៅសណ្ឋាគារប៉ារ៉ាឌីអង្គរខេត្តសៀមរាប ដោយមានសិក្ខាកាមមកពី ក្រសួងសុខាភិបាល ក្រសួងបរិស្ថាន ក្រសួងការពារជាតិ ក្រសួងមហាផ្ទៃ ក្រសួងកិច្ចការនារី ក្រសួងអប់រំ-យុវជន និងកីឡា ក្រសួងធម្មការ និងសាសនា កាកបាទក្រហមកម្ពុជា គណៈអភិបាលខេត្តទទួលបន្ទុកប្រធានក្រុមការងារពិសេសថ្នាក់ខេត្តលុបបំបាត់ជំងឺគ្រុនចាញ់ (PSMET) ប្រធាន/អនុប្រធានមន្ទីរសុខាភិបាល នៃរដ្ឋបាលរាជធានីខេត្តទាំង២៥ អ្នកស្ម័គ្រចិត្តភូមិព្យាបាលគ្រុនចាញ់ រួមទាំងដៃគូសហការអនុវត្ត និងគាំទ្របច្ចេកទេសជាតិ និងអន្តរជាតិ សរុបចំនួន ២៧៣នាក់ ក្នុងនោះស្រ្តីចំនួន៧៧នាក់ ៕
អត្ថបទ និង រូបភាព ៖ លោក យូ វង្ស
កែសម្រួល៖ លោក លីវ សាន្ត
