ដោយមានការគាំទ្រពីសាកលវិទ្យាល័យជាតិសិង្ហបុរី នាព្រឹកថ្ងៃទី២២ ខែកម្ភៈ ឆ្នាំ២០២៤ នៅសណ្ឋាគារសោម៉ាទេវី ខេត្តសៀមរាប មន្ទីរពេទ្យកុមារអង្គរ សហការជាមួយមន្ទីរពេទ្យកាល់ម៉ែត បានបើកសិក្ខាសាលាផ្សព្វផ្សាយ រវាងកម្ពុជា-សិង្ហបុរី ក្រោមប្រធានបទ ការគ្រប់គ្រងការប្រើប្រាស់ឱសថប្រឆាំងមេរោគ ក្រោមអធិបតីភាពឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល លោកវេជ្ជបណ្ឌិត អ៊ាប ប៊ុនលឿន អនុប្រធានមន្ទីរសុខាភិបាលនៃរដ្ឋបាលខេត្តសៀមរាប និង លោកវេជ្ជបឋណ្ឌិត ង៉ែត ពិសេស នាយករង នៃមន្ទីរពេទ្យកុមារអង្គរ ។
លោកវេជ្ជបឋណ្ឌិត ង៉ែត ពិសេស នាយករង នៃមន្ទីរពេទ្យកុមារអង្គរ បានឲ្យដឹងថា ជារៀងរាល់ថ្ងៃ មានកុមារប្រមាណ ៣៥០នាក់ មកទទួលការព្យាបាលនៅមន្ទីរពេទ្យកុមារអង្គរ ហើយចាប់តាំងពីមន្ទីរពេទ្យបើកដំណើរការក្នុងឆ្នាំ ១៩៩៩ រហូតមកដល់ពេលបច្ចុប្បន្ននេះ យើងបានផ្ដល់ការព្យាបាលជូនដល់កុមារកម្ពុជាប្រមាណច្រើនជាង ២,៥លានករណី ក្នុងនោះ បានផ្ដល់ការព្យាបាលដល់កុមារកម្ពុជាចាប់ពីទារកទើបនឹងកើតរហូតដល់អាយុ ១៦ឆ្នាំ ដោយរួមបញ្ចូលទាំងជំងឺមាត់ធ្មេញ ជំងឺសង្គ្រោះបន្ទាន់ ជំងឺភ្នែក ជំងឺមហារីក និងជំងឺធ្ងន់ធ្ងរផ្សេងៗទៀត ដែលត្រូវធ្វើការពិនិត្យព្យាបាល និងថែទាំដោយយកចិត្តទុកដាក់ខ្ពស់បំផុត។
លោកវេជ្ជបណ្ឌិត អ៊ាប ប៊ុនលឿន អនុប្រធានមន្ទីរសុខាភិបាលនៃរដ្ឋបាលខេត្តសៀមរាប បានមឲ្យដឹងថា ការរៀបចំសិក្ខាសិលានាពេលនេះ គឺបង្ហាញពីការលើស្ទួយប្រព័ន្ធសុខាភិបាលតាមរយៈការចែករំលែកបទពិសោធន៍ និង ចំណេះដឹងដល់សិក្ខាកាម ដើម្បីយកទៅអនុវត្ត និង ចែករំលែកបន្តដល់លោកគ្រូអ្នកគ្រូពេទ្យផ្សេៗទៀតដែលមិនបានចូលរួមក្នុងពេលនេះ ដើម្បីកាត់បន្ថយអត្រាឈឺ និងអត្រាមរណៈភាពរបស់ប្រជាជនកម្ពុជាឲ្យមានប្រសិទ្ធភាព ស្របតាមផែនការយុទ្ធសាស្រ្តជាតិរបស់ក្រសួងសុខាភិបាលកម្ពុជា ។
ក្នុងឱកាសនោះដែរ អ៊ាប ប៊ុនលឿន បានថ្លែងអំណរគុណដល់មន្ទីរពេទ្យកុមារអង្គរ ដែលមានគំនិតផ្តួចផ្តើមរៀបចំសិក្ខាសិលានេះឡើង ដែលជាប្រធានបទដ៏សំខាន់មួយត្រូវយកចិត្តទុកដាក់ ក្នុងការចូលរួមពង្រឹងនិងបង្កើនចំណេះដឹងនៅតាមមន្ទីរពេទ្យនានានា ពាក់ព័ន្ធនឹងការប្រើប្រាស់ឧសថប្រឆាំងមេរោគ និងសម្រាប់ការព្យាបាលជំងឺផ្សេងៗ ឲ្យបានកាន់តែល្អប្រសើរឡើង ពិសេស គឺការចូលរួមយ៉ាងសកម្មលើកម្មវិធីជួយសង្រ្គោះកុមារកម្ពុជា ក្នុងកាត់បន្ថយអត្រាឈឺនិងអត្រាមរណៈភាព ឲ្យកាន់តែមានប្រសិទ្ធភាព ស្របតាមផែនការយុទ្ធសាស្រ្តជាតិរបស់ក្រសួងសុខាភិបាលកម្ពុជា ។
មានប្រសាសន៍ក្នុងឱកាសនោះ ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានវាយតម្លៃខ្ពស់ចំពោះគុណភាពសេវាថែទាំនៅមន្ទីរពេទ្យកុមារអង្គរនេះ ជាគុណភាពកម្រិតអន្តរជាតិដែលបុគ្គលិកសុទ្ធតែជាអ្នកមានជំនាញខ្ពស់ដែលជាធនធានក្នុងការបន្តចែករំលែក ខណៈដែលសិក្ខាកាមចូលរួមទាំងអស់ សុទ្ធតែមានបទពិសោធន៍ស្រាប់និងទទួលបាននូវបទពិសោធន៍ថ្មីក្នុងការងារការគ្រប់គ្រងការប្រើប្រាស់ឳសថប្រឆាំងមេរោគនេះ ដើម្បីចូលរួមកាត់បន្ថយ អត្រាឈឺនិងអត្រាមរណៈភាពរបស់អ្នកជំងឺ និងយកចំណេះដឹងទាំងអស់នេះទៅផ្សព្វផ្សាយបន្ត នៅតាមមន្ទីរពេទ្យរបសសាមីខ្លួន ។
ឯកឧត្តមសាស្ត្រាចារ្យមានប្រសាសន៍បន្តថា សុខភាពប្រជាពលរដ្ឋ គឺជាកត្តាដ៏ចម្បងសម្រាប់ការអភិវឌ្ឍន៍ធនធានមនុស្ស វឌ្ឍនភាពសង្គម និងសេដ្ឋកិច្ចជាតិ ដែលក្នុងស្មារតីនេះ ក្រសួងសុខាភិបាលបន្តជំរុញការរួមចំណែករបស់មន្ទីរពេទ្យកុមារអង្គរ ក៏ដូចជាដៃគូអភិវឌ្ឍន៍ទាំងអស់ក្នុងការពង្រឹង និងបន្ដអនុវត្តផែនការយុទ្ឋសាស្ត្រវិស័យសុខាភិបាលឱ្យមានប្រសិទ្ឋភាព ក្នុងគោលដៅពង្រឹងសេវាថែទាំសុខភាពសម្រាប់ប្រជាជនកម្ពុជា ដោយគោរពតាមក្រមសីលធម៌វិជ្ជាជីវៈវេជ្ជសាស្ដ្រ ព្រមទាំងពង្រឹងប្រព័ន្ធសុខាភិបាលនៅទូទាំងប្រទេសកម្ពុជា តាមរយៈការបណ្ដុះបណ្ដាលធនធានមនុស្ស និងការអប់រំបន្តជំនាញវេជ្ជសាស្ដ្រ ទាំងមន្ទីរពេទ្យរដ្ឋ និង មន្ទីរពេទ្យឯកជន ៕
អត្ថបទ និង រូបភាព ៖ លោកស្រី កើត សុនី
កែសម្រួល៖ លោក លីវ សាន្ត
