ប្រជាពលរដ្ឋប្រមាណជិត ៥០គ្រួសារ នៃប្រជាពលរដ្ឋសរុប ២០០គ្រួសារ ដែលបានផ្ដិតមេដៃស្នើសុំផ្លាស់ប្ដូរមេភូមិលោក មួង មាន មេភូមិអារញ្ញ ស្ថិតក្នុងសង្កាត់សៀមរាប ក្រុងសៀមរាប បានសម្រេចទទួលយកការសម្របសម្រួលពីលោក ម៉ៃ សាម៉េត ចៅសង្កាត់សៀមរាប នៅរសៀលថ្ងៃទី២១ ខែកុម្ភៈ ឆ្នាំ២០២៤។
ការសម្របសម្រួលនេះ លោក ចៅសង្កាត់សៀមរាប លើកឡើងថា កន្លងមកស្នាមមេដៃ របស់ប្រជាពលរដ្ឋនៅក្នុងលិខិតស្នើសុំផ្លាស់ប្ដូរមភូមិនេះ មានចំនួនតែ ១២៣ស្នាមមេដៃ នៃអ្នកស្នើសុំសរុប ២០០នាក់ប៉ុណ្ណោះ។ ក្នុងនោះស្នាមមេដៃមួយចំនួន មើលក្រយ៉ៅដៃមិនច្បាស់។ គិតមកដល់ពេលនេះ ពុំទាន់ការដាក់ស្នាមមេដៃជាថ្មី តាមការស្នើសុំរបស់អាជ្ញាធរសង្កាត់ឡើយ។
ដោយឡែក ចំពោះ ការអនុវត្តការងាររបស់លោក មេភូមិអារញ្ញ កន្លងមក លោកចៅសង្កាត់ សៀមរាប បានធ្វើការពិនិត្យ និងសាកសួរ រកឃើញថា ពិតជាមានការខ្វះការយកចិត្តទុកដាក់ និងអាកប្បកិរិយាមិនសមរម្យដូចការលើកឡើងរបស់ប្រជាពលរដ្ឋមែន។ ប៉ុន្តែ ការខ្វះចន្លោះក្នុងការបំពេញការងារនេះ នៅមិនទាន់ធ្ងន់ធ្ងរ រហូតដល់ការដកតួនាទីភារកិច្ចរបស់លោកឡើយ។ ទន្ទឹមនោះ ក្រុមប្រឹក្សាសង្កាត់ នឹងហៅលោកមេភូមិអារញ្ញ ធ្វើកិច្ចសន្យា បញ្ឈប់ភាពអសកម្មរបស់ខ្លួនបន្តទៀត ក្នុងករណីលោកមេភូមិ នៅមិនអនុវត្តន៍តាមកិច្ចសន្យា ប្រជាពលរដ្ឋអាចធ្វើសំណើសុំផ្លាស់ប្តូរមេភូមិជាថ្មី ឬដាក់ពិន័យបន្ថែមឲ្យកាន់តែធ្ងន់។
គួរជម្រាបថា យោងតាមសេចក្ដីណែនាំរបស់ក្រសួងមហាផ្ទៃ ចំពោះការដកមុខតំណែងមេភូមិ ត្រូវករណីណាមួយ ក្នុងចំណោមករណីចំនួន៧ រួមមាន៖១.សាម៉ីខ្លួនទទួលមរណភាព ទី២.សាម៉ីខ្លួនដាក់ពាក្យលាឈប់ពីតំណែងជាលាយល៏ក្ខអក្សរ ទី៣.សាម៉ីខ្លួនបាត់បង់សម្បទាវិជ្ជាជីវៈដោយមានលិខិតបញ្ជាក់ពីភ្នាក់ងារមានសមត្ថកិច្ច ទី៤.សាម៉ីខ្លួនត្រូវបានលុបឈ្មោះចេញពីបញ្ជីឈ្មោះអ្នកបោះឆ្នោតនៃឃុំ-សង្កាត់ខ្លួន ទិ៥.សាម៉ីខ្លួនត្រូវតុលាការផ្តន្ទាទោសពីបទឧក្រិដ្ឋ ឬមជ្ឈឹមណាមួយ ទី៦.សាម៉ីខ្លួនផ្លាស់ប្តូរទីលំនៅ និងទី៧.សាម៉ីខ្លួនមានកំហុសឆ្គងក្នុងការងារ ហើយត្រូវបញ្ឈប់ពីមុខតំណែងដោយក្រុមប្រឹក្សាឃុំ-សង្កាត់របស់ខ្លួន៕
អត្ថបទ និងរូបភាព ៖ យូ វង្ស និង អ៊ុន ណារាជ្យ
កែសម្រួល ៖ សេង ផល្លី
