លោកជំទាវ ទុយ ជិ អនុប្រធានគណៈកម្មាធិការសាខាកាកបាទក្រហមកម្ពុជា ខេត្ដសៀមរាប នៅព្រឹកថ្ងៃទី២១ខែកុម្ភៈឆ្នាំ២០២៤នេះ បានដឹកនាំក្រុមការងារ អញ្ជើញចុះសំណេះសំណាល និងសួរសុខទុក្ខ ព្រមទាំងចែកអំណោយស្ដ្រីមាតាទារក និងកុមារ ដើម្បីអបអរសាទរ ទិវាជាតិសុខភាពមាតា ទារក និងកុមារ ដែលធ្វើឡើងនៅមណ្ឌលសុខភាព ពង្រក្រោម ឃុំពង្រងក្រោម ស្រុកជីក្រែង ខេត្ដសៀមរាប ។
លោក បូ ម៉េងទ្រី អភិបាលស្រុកជីក្រែង មានប្រសាសន៍ថា ការចុះមកសំណេះសំណាល សួរសុខទុក្ខ ផ្តល់អំណោយជូនប្រជាពលរដ្ឋជាមាតាដែលមានទារក កុមារ ក្នុងទិវាជាតិសុខភាព មាតា ទារក និងកុមារ នៅមណ្ឌលសុខភាពពង្រក្រោម មានសរុបចំនួន ៨០នាក់ ក្នុងនោះមាតាទារក មកពីឃុំពង្រក្រោមមានចំនួន៥០នាក់ និងឃុំពង្រលើមាតាមានទារក៣០នាក់ ។
លោកក៍បានថ្លែងអំណរគុណយ៉ាងជ្រាលជ្រៅដល់លោកជំទាវ ទុយ ជិ អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងជាអនុប្រធានក្រុមការងារ ឥស្សរជនឆ្នើមថ្នាក់ជាតិ សាខាខេត្តសៀមរាប ព្រមទាំងក្រុមការងាររបស់កាកបាទ ក្រហមកម្ពុជា ដែលបានលះបង់ធនធានថវិកា ពេលវេលាដ៏មានតម្លៃ ចូលរួមទិវាជាតិសុខភាព មាតា ទារក និងកុមារ នាពេលនេះ ។លោកបន្ថែមថា មាតាមានទារក និងកុមារ ដែលតែងតែជឿទុកចិត្ត នាំកុមារមកពិនិត្យ ព្យាបាលជម្ងឺ នៅតាមមន្ទីរពេទ្យរដ្ឋ មណ្ឌលសុខភាពតាមបណ្តាលឃុំ ជាពិសេស មណ្ឌលសុខភាព ពងក្រោម ដែលតែងតែខិតខំបម្រើសេវាជូនប្រជាពលរដ្ឋបានល្អប្រសើរ រហូតដល់ការវាយតម្លៃរបស់ គណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិបានទទួលជ័យលាភីអង្គភាពផ្តល់ សេវាសាធារណៈគំរូក្នុងវិស័យសុខាភិបាលឆ្នាំ២០២៣ ផងដែរ ។លោកថា ទីណាមានការលំបាកទីនោះមានកាកបាទក្រហមជាតិ គឺមិនទុកឱ្យប្រជាពលរដ្ឋណាម្នាក់ស្លាប់ដោយសារអត់អាហារនោះទេ។ ជាមួយគ្នានេះ ការផ្ដល់អំណោយនេះ បានបង្ហាញពីការយកចិត្ត ទុកដាក់របស់រាជរដ្ឋាភិបាលកម្ពុជាដែលដឹកនាំដោយសម្តេចបវរធិបតី ហ៊ុន ម៉ាណែត ជា ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។លោកបន្ដថា កន្លងមកសាខាកាកបាទក្រហមខេត្តសៀមរាប បាននាំយកអំណោយមនុស្សធម៌ មានគ្រឿងឧបភោគ បរិភោគ មកជួយសម្រាលទុក្ខលំបាកខ្លះ ដល់ប្រជាពលរដ្ឋរងគ្រោះងាយរងគ្រោះជាប្រចាំផងដែរ។
នាឱកាសនោះលោកជំទាវ ទុយ ជិ អនុប្រធានគណៈកម្មាធិការសាខាកាកបាទក្រហមកម្ពុជា ខេត្ដសៀមរាប មានប្រសាសន៍ថា ដើម្បីអបអរទិវាជាតិសុខភាពមាតា ទារក និងកុមារ ថ្ងៃទី២១ ខែកុម្ភៈ ឆ្នាំ២០២៤នេះ តាំងនាមឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហម កម្ពុជា ខេត្តសៀមរាប ខ្ញុំសូមពាំនាំការសាកសួរសុខទុក្ខពីឯកឧត្តមប្រធានជូនចំពោះបងប្អូនទាំង អស់ដែលអញ្ជើញចូលរួមក្នុងពិធីនេះ។លោកជំទាវបន្ដថា កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានយកចិត្តទុកដាក់ខ្ពស់ចំពោះសុខភាពបងប្អូនប្រជាពលរដ្ឋជាស្ត្រីដែលជាមាតា ទារក និងកុមារទូទាំងព្រះរាជាណាចក្រកម្ពុជា ។ពិសេសទៅទៀតនោះ ក្នុងគោរមងារជាឥស្សរជនឆ្នើមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិដើម្បីសុខភាពស្ត្រី និងកុមារ នៅកម្ពុជានោះ សម្តេចប្រធាន តែងតែមានសន្តានចិត្តប្រោសប្រណី និងគិតគូរចំពោះទុក្ខលំបាករបស់បងប្អូនប្រជា ពលរដ្ឋជាស្ត្រីដែលកំពុងមានផ្ទៃពោះ ស្ត្រីបំបៅដោះកូន ស្ត្រីមានកូនច្រើន និងស្ត្រីដែលមានផ្ទុក មេរោគអេដស៍/ជំងឺអេដស៍។លោកជំទាវបន្ថែមថា ទិវាជាតិសុខភាពមាតា ទារក និងកុមារ ឆ្នាំ២០២៤នេះ ប្រព្រឹត្តទៅក្រោមប្រធានបទ ពង្រឹង គុណភាពសេវាថែទាំសុខភាពមាតាទារក និងកុមារ ដើម្បីឆ្ពោះទៅសម្រេចបានការគ្របដណ្តប់សុខភាព ជាសាកល” ដែលក្នុងនាមជាស្ត្រី និងមាតាម្នាក់ដែលនោះ លោកជំទាវ មានការចាប់អារម្មណ៍ និងកោត សរសើរជាខ្លាំង ចំពោះស្មារតីទទួលខុសត្រូវរបស់មាតាគ្រប់រូបក្នុងការចិញ្ចឹម និងថែទាំកូនតាំងពី ទារក រហូតដល់ពេញវ័យ ដោយមិនមានពោលពាក្យនឿយហត់បន្តិចសោះឡើយ ដែលនេះ បង្ហាញឱ្យឃើញពីព្រហ្មវិហារធម៌ របស់មាតារួមទាំងបិតាផងដែរ ចំពោះបុត្រធីតាគ្រប់រូប។
លោកជំទាវបន្ថែមថា បច្ចុប្បន្ននេះ ទោះបីអត្រាមរណៈភាពរបស់មាតា និងទារកបានថយចុះក៏ដោយ ប៉ុន្តែសុខ ភាពមាតា ទារក និងកុមារនៅតែជាកង្វល់របស់រាជរដ្ឋាភិបាលកម្ពុជាយើង ដែលទាមទារឱ្យមាតា គ្រប់រូបយកចិត្តទុក្ខដាក់បន្ថែមទៀត ទៅលើការថែទាំសុខភាពផ្ទាល់ខ្លួន និងកូនៗរបស់យើង។ លោកជំទាវ ស្នើរឱ្យ អ្នកម្តាយគ្រប់រូបត្រូវស្វែងរកការផ្តល់ប្រឹក្សាពីមន្ត្រីសុខាភិបាល អ្នកគ្រូពេទ្យឆ្មប ដែល បម្រើការនៅមណ្ឌលសុខភាពជិតផ្ទះរបស់យើងដូចជា ការបំបៅដោះកូន ការតាមដានភាពលូតលាស់ នៃទារក ការចាក់វ៉ាក់សាំងបង្ការជំងឺ និងការប្រើប្រាស់អាហាររូបត្ថម្ភជាដើម៕
