ថ្ងៃទី២០ ខែ កុម្ភៈ ឆ្នាំ២០២៤ ក្រុមការងារចម្រុះ នៃរដ្ឋបាលខេត្តសៀមរាប ដឹកនាំដោយលោក នាក់ ណេរ៉ុន អភិបាលរងខេត្តសៀមរាប បានចុះពិនិត្យការរៀបចំសោភណ្ឌភាព និងការតម្លើងភ្លើងលម្អ របស់ម្ចាស់ទីតាំងប្រកបអាជីវកម្ម នៅក្នុងតំបន់ ផាប់ស្ទ្រីត (Pub Street) ដើម្បីចូលរួមទាក់ទាញភ្ញៀវទេសចរណ៍ និងចូលមកកម្សាន្តក្នុងតំបន់នេះឱ្យកាន់តែច្រើនបន្ថែមទៀត។
ក្នុងកិច្ចពិភាក្សា ជាមួយវិស័យឯកជន ដែលប្រកបរបរនៅក្នុងតំបន់ ផាប់ស្ទ្រីត (Pub Street) មន្ត្រីជំនាញ សាលាខេត្ត មន្ទីរ អង្គភាព និងរដ្ឋបាលសាលាក្រុង បានលើកឡើងថា កន្លងមក បណ្ដាវិស័យឯកជន បានស្នើមករដ្ឋបាលខេត្ត ដើម្បីរៀបចំតម្លើងការតាំងលម្អ ដែលមានជើងបង្គោលទម្រផ្សេងៗ ដែលការតម្លើងមួយចំនួននោះ ពុំបានជូនដំណឹងមកក្រុមការងារបច្ចេកទេសខេត្ត ដែលនាំឱ្យមានផលប៉ះពាល់ដល់អ្នកទេសចរ និងទទួលការណែនាំឱ្យរុះរើចេញ ដែលធ្វើឱ្យខាតបង់ប្រាក់កាស។ មួយវិញទៀត ការតាំងលម្អដែលហួសសុពលភាពស្នើសុំ វិស័យឯកជន ពុំធ្វើការរុះរើឱ្យបានទាន់ពេលវេលា ដែលជាហេតុអាចបង្កឱ្យមានផលប៉ះពាល់ផ្សេងៗ តាមលក្ខណៈបច្ចេកទេស។
លើកឡើងក្នុងកិច្ចពិភាក្សានោះ លោក នាក់ ណេរ៉ុន គូសបញ្ជាក់ថា ចំពោះការដាក់តាំងលម្អដែលហួសសុពលភាព ម្ចាស់អាជីវកម្ម ឬក្រុមហ៊ុនសហការ គួរធ្វើរុះរើជាមុន ដើម្បីអាចស្នើសុំតម្លើងជាថ្មី។ លោក បន្តថា ចំពោះការតម្លើង ការតាំងលម្អសោភណ្ឌភាពនេះដែរ ម្ចាស់អាជីវកម្ម ឬក្រុមហ៊ុនសហការ ត្រូវមានកិច្ចសហការជាមួយមន្ទីរជំនាញ គិតគូរពីបច្ចេកទេសមុនការតម្លើង ដូចជា ការចាប់ជើងបង្គោល ដែលមិនប៉ះពាល់ដល់ហេដ្ឋារចនាសម្ព័ន្ធ ការតចរន្តអគ្គិសនី ដែលបញ្ចៀសនូវហានិភ័យទាំងក្នុងរដូវប្រាំង និងវស្សា ជាពិសេសវិស័យឯកជន គួរបង្កើតគំនិតរចនាការតាំងលម្អ ដែលរំលេចនូវវប្បធម៌ និងអត្តសញ្ញាណខ្មែរ។ ព្រោះតំបន់នេះ ជាទីតាំងដ៏មានប្រជាប្រិយភាព ក្នុងការផ្សព្វផ្សាយវប្បធម៌ជាតិ។
ព័ត៌មានជាតិ ថ្មីៗ
លោក អភិបាលរងខេត្ត ក៏បានបញ្ជាក់ផងដែរថា ការចុះពិនិត្យ និងពិភាក្សាលើការរៀបចំសោភណ្ឌភាព និងការតម្លើងភ្លើងលម្អនាពេលនេះ គឺដើម្បីប្រមូលនូវចំណុចវិជ្ជមាន និងផលប៉ះពាល់ផ្សេងៗ ពីមន្ត្រីជំនាញ និងវិស័យឯកជន សម្រាប់ដាក់ជូនឯកឧត្តម អភិបាលខេត្ត ធ្វើការពិនិត្យ និងសម្រេច។
អត្ថបទ និងរូបភាព៖ ទ្រា ពន្លឺ
កែសម្រួល៖ សេង ផល្លី
