មន្ត្រីជំនាញមកពីក្រសួងពាណិជ្ជកម្ម និងអាជ្ញាធរខេត្តសៀមរាប បានជំរុញដល់អ្នកផលិតស្រាពីអង្ករ ត្រូវព្រឹងការគិតគូរអំពីគុណភាព និងសុវត្ថិភាពអ្នកប្រើប្រាស់ ដើម្បីធ្វើយ៉ាងណាបញ្ជៀសឲ្យបាននូវករណីពុលស្រា ស និងឈានទៅដល់ការពង្រីកទីផ្សារផងដែរ។
ថ្លែងនៅក្នុងសិក្ខាសាលាផ្សព្វផ្សាយច្បាប់ស្តីពីសុវត្ថិភាពម្ហូបអាហារ ច្បាប់ស្តីពីកិច្ចការពារអ្នកប្រើប្រាស់ និងគោលការណ៍ណែនាំមួយចំនួន ពាក់ព័ន្ធនឹងការផលិតស្រាប្រកបដោយសុវត្ថិភាពនៅខេត្តសៀមរាប នាព្រឹកថ្ងៃទី១៩ ខែកុម្ភៈ ឆ្នាំ២០២៤នេះ លោក ឃួន សាវុធ អគ្គនាយករង អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ក.ប.ប. នៃក្រសួងពាណិជ្ជកម្ម បានលើកឡើងថា កន្លងមកនៅក្នុងប្រទេសកម្ពុជាយើងមានករណីពុលស្រា ស បានកើតឡើងជាបន្តបន្ទាប់។ ការកើតឡើងនេះ វាបណ្តាលមកពីអ្នកផលិតមួយចំនួនមិនបានយល់ដឹងអំពីលក្ខណៈបច្ចេកទេសផលិតស្រាឲ្យបានទូលំទូលាយ។
លោក ឃួន សាវុធ បានឲ្យដឹងថា ការផលិតស្រាវាពិតណាស់ថាវានឹងមានលាយឡំជាមួយជាតិពុល ប៉ុន្តែបើយើងយល់ដឹងច្បាស់អំពីបច្ចេកទេសក្នុងការធ្វើយ៉ាងណាឲ្យជាតិពុល ជាពិសេសសារធាតុមេតាណុលឲ្យនៅតិចតួចបំផុតនោះ វានឹងកាត់បន្ថយបាននូវគ្រោះថ្នាក់ដល់អ្នកប្រើប្រាស់។ ក្នុងនោះការពុលស្រា ស ស្រាថ្នាំកន្លងមកនេះ តាមការស្រាវជ្រាវវាកើតចេញពីសារធាតុមេតាណុលដែលអ្នកផលិតបានទិញពីទីផ្សារ។ លោកបញ្ជាក់ថា “អេតាណុល” និង “មេតាណុល” ជាសារធាតុ២ដាច់ដោយឡើងពីគ្នា ប៉ុន្តែវាមានពណ៌ ក្លិន រសជាតិ ប្រហាក់ប្រហែលគ្នាដែលពិបាកបែងចែកដោយការមើលដោយភ្នែកទទេ។ “អេតាណុល”ត្រូវបានគេយកធ្វើមេសម្រាប់ផលិតស្រា ចំណែក “មេតាណុល” ត្រូវបានគេយកវាទៅប្រើក្នុងវិស័យសំណង់ឬប្រើជាឥន្ទនៈសម្រាប់យានយន្ត តែយើងយល់ច្រលំក៏យកវាមកធ្វើជាមេស្រា ដែលជាហេតុបង្កឲ្យមានគ្រោះថ្នាក់ដល់អ្នកទទួលទាន។
មានប្រសាសន៍ក្នុងឱកាសនោះដែរ លោក នាក់ ណេរ៉ុន អភិបាលរងខេត្តសៀមរាប បានបញ្ជាក់ថា ខេត្តសៀមរាប មានសក្តានុពលខ្លាំងលើផ្នែកទេសចរណ៍ និងកសិកម្ម ប៉ុន្តែកន្លងមកវិស័យទាំង២នេះ មិនបានបំពេញឲ្យគេទៅវិញទៅមកនៅឡើយ។ រាជរដ្ឋាភិបាលគ្រប់អណត្តិ តែងតែដាក់ចេញនូវគោលនយោបាយនានា ដើម្បីធ្វើយ៉ាងណាឲ្យវិស័យទាំងពេញជួយបំពេញឲ្យគ្នា និងឲ្យអស់លទ្ធភាព។
លោកនាក់ ណេរ៉ុន បានសង្កត់ធ្ងន់ថា បច្ចុប្បន្ននេះ ជាមធ្យមអ្នកទេសចរបរទេសប្រមាណ៣ពាន់នាក់ បានចូលទិញសំបុត្រចូលទស្សនាក្នុងរមណីយដ្ឋានអង្គរ ហើយតាមរបាយការណ៍អង្គការ GIZ របស់អាល្លឺម៉ង់ បានឲ្យដឹងថា អ្នកទេសចរណ៍ទាំងនោះមិនមែនមកដើម្បីមើលតែប្រាង្គប្រាសាទនោះទេ គឺពួកគេក៏មានបំណងឈ្វេងយល់អំពីរសជាតិម្ហូបអាហាររបស់កម្ពុជាដែរ ហើយប្រាកដណាស់ ក៏មានអ្នកទេសចរមួយចំនួនចង់ភ្លក្សនូវរស់ជាតិស្រា ស ស្រាថ្នាំរបស់ខ្មែរដែរ។ លោកថា ប៉ុន្តែបញ្ហាវានៅត្រង់ថា តើការផលិតរបស់យើងមានគុណភាពបែបណា? តើមានសុវត្ថិភាពឬទេ? ដូច្នេះដើម្បីបញ្ជៀសហានិភ័យដល់សុខភាពអ្នកប្រើប្រាស់ ក៏ដូចជាការពង្រីកការនាំចេញនៅនឹងកន្លែងផងនោះ ទាំងមន្ត្រីជំនាញរបស់ក្រសួងពាណិជ្ជកម្ម និងអាជ្ញាធរខេត្តសៀមរាប បានជំរុញដល់អ្នកផលិតទាំងអស់ត្រូវខិតខំយកចិត្តទុកដាក់ពង្រឹងគុណភាព ពង្រីកការកែច្នៃលើវត្ថុធាតុដើមដែលមានស្រេចឲ្យអស់លទ្ធភាព រួមទាំងធ្វើការប្រកួតប្រជែងដោយសុចរិតភាព រក្សាបាននូវកិត្តិយសរបស់ជាតិ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
