មន្ទីរពេទ្យកុមារគន្ធបុប្ផាទី៣ ដែលស្ថិតនៅក្នុងខេត្ដសៀមរាប មិនត្រឹមតែជាមន្ទីរពេទ្យ ពិនិត្យ និងព្យាបាលជំងឹកុមារក្រោមអាយុ ១៥ឆ្នាំ ដោយមិនគិតថ្លៃប៉ុណ្ណោះទេ ប៉ុន្តែរយៈពេល ២៥ឆ្នាំកន្លងមកនេះ មន្ទីរពេទ្យសប្បុរសធម៌មួយនេះ ក៏មានទទួលពិនិត្យ និងព្យាបាលស្ត្រីមានផ្ទៃពោះ ព្រមទាំងសម្រាលកូនដោយមិនគិតថ្លៃ ប្រកបដោយគុណភាព និងវិជ្ជាជីវៈខ្ពស់ផងដែរ។ នេះបើតាមរបាយការណ៍ របស់មន្ទីរពេទ្យកុមារគន្ធបុប្ផាទី៣ ដែលចេញផ្សាយកាលពីពាក់កណ្ដាលខែកុម្ភៈ ឆ្នាំ២០២៤។
របាយការណ៍ដដែលនេះ ក៏បានបញ្ជាក់ផងដែរថា រយៈពេល ២៥ឆ្នាំមកនេះ មានទារកប្រមាណជិត ៤០ម៉ឹននាក់ ត្រូវវបានសម្រាល ប្រកបដោយសុវត្ថិភាព ជាមួយនឹងស្ថានភាពសុខភាពខុសៗគ្នា។ ជារៀងរាល់ថ្ងៃ មន្ទីរពេទ្យកុមារមួយនេះ ផ្ដល់សេវាពិនិត្យ ពិគ្រោះ ព្យាបាលផ្នែកជំងឺក្រៅ និងសម្រាកព្យាបាល ជាមធ្យមពី ២ ២០០ ទៅ៣ ០០០នាក់។ ដោយឡែក ផ្នែកសម្ភពជាមធ្យមចាប់ពី ៣៥០ ទៅ៥០០នាក់។ មន្ទីរពេទ្យនេះដែរ មានមន្ត្រីសុខាភិបាល និងបុគ្គលិកសរុប ១ ៣៥៨នាក់។
បើតាមការឱ្យដឹងពី លោកវេជ្ជបណ្ឌិត Philip Robinson ប្រធានក្រុមប្រឹក្សាមូលនិធិគន្ធបុប្ផាស្វីស មានប្រសាសន៍ថា ក្រោយពីមរណភាព របស់លោកវេជ្ជបណ្ឌិត Beat Richner ស្ថាបនិក នៃមន្ទីរពេទ្យគន្ធបុប្ផា មូលនិធិគន្ធបុប្ផាស្វីស បានចាប់ផ្តើមគិតគូរតម្រង់ទិសដៅ និងរៀបចំអ្នកបន្តវេន ស្វែងរកមូលនិធិ ដែលមាន ប្រធានក្រុមប្រឹក្សាមូលនិធិគន្ធបុប្ផាស្វីស ដែលជាអ្នកទទួលខុសត្រូវលើមូលនិធិជំនាន់ទី៣ និងមានតួនាទី បន្តស្វែងរកសប្បុរសជន និងកៀរគរថវិកាជួយគាំទ្រមូលនិធិ។ លោកបញ្ជាក់ថា មូលនិធិគន្ធបុប្ផាស្វីស បានប្តេជ្ញាគាំទ្រដល់មន្ទីរពេទ្យគន្ធបុប្ផា តាមរយៈការរៀបចំផែនការសកម្មភាពផ្សេងៗ ដើម្បីធ្វើឱ្យមន្ទីរពេទ្យមួយនេះ នៅតែអាចបន្តដំណើរទៅមុខបានយូរអង្វែង។
អត្ថបទ និងរូបភាព៖ បូ សាវី
កែសម្រួល៖ សេង ផល្លី
