ដើម្បីអបអរខួបលើកទី៦៩ ថ្ងៃកំណើតកាកបាទក្រហមកម្ពុជា ១៨កុម្ភៈ ១៩៥៥-១៨កុម្ភៈ ២០២៤ នៅព្រឹកថ្ងៃទី១៨ ខែកុម្ភៈ ឆ្នាំ២០២៤នេះ លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំសហការី រួមនឹងអ្នកស្ម័កចិត្ត យុវជនកាបាទក្រហមកម្ពុជាជាង ១០០នាក់ ធ្វើការបោសសម្អាតសំរាម ស្លឹកឈើងាប់ ជម្រះស្មៅ នៅក្នុងឧទ្យានសហស្សវត្សរ៍ កាកបាទក្រហមកម្ពុជា ក្នុងក្រុងសៀមរាប។
លោកជំទាវ ទុយ ជិ ប្រាក់ សោភ័ណ មានប្រសាសន៍ថា ថ្ងៃទី១៨ ខែកុម្ភៈ មិនត្រឹមតែជាថ្ងៃកំណើតកាកបាទក្រហមកម្ពុជាប៉ុណ្ណោះទេ សម្រាប់ខេត្តសៀមរាប ថ្ងៃដ៏មានអត្ថន័យនេះ ក៏ជាថ្ងៃបង្ហាញដល់គ្រប់មជ្ឈដ្ឋានជាតិ អន្តរជាតិ បានយល់កាន់តែច្បាស់ពីអត្ថប្រយោជន៍នៃធនធានធម្មជាតិ និងផលប៉ះពាល់ មកលើភពផែនដី ដែលបណ្ដាលពីការបាត់បង់ធនធានធម្មជាតិ។ ស្មារតីចូលរួមសម្អាតបរិស្ថានធម្មជាតិនៅក្នុងឧទ្យានសហស្សវត្សកាកបាទក្រហមកម្ពុជានាពេលនេះ មិនត្រឹមតែរួមចំណែកថែរក្សាគម្របបៃតងនៃតំបន់រមណីយដ្ឋានអង្គរប៉ុណ្ណោះទេ តែយើងក៏បានបង្ហាញពីឆន្ទៈរបស់កម្ពុជា ក្នុងការចូលរួមកាត់បន្ថយបម្រែបម្រួលអាកាសធាតុ ដែលពិភពលោកកំពុងប្រឈមផងដែរ។
លោកជំទាវ មានប្រសាសន៍ទៀតថា ជារៀងរាល់ឆ្នាំនៅថ្ងៃទី១៨ ខែកុម្ភៈនេះ សាខាកាកបាទក្រហមកម្ពុជាខេត្ត តែងធ្វើពលកម្មសម្អាត និងថែទាំដើមឈើរាប់ពាន់ដើម ដែលសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី សម្តេចកិត្តិព្រឹទ្ធបណ្ឌិតប្រធាន កាកបាទក្រហមកម្ពុជា រួមទាំង សមាជិកព្រឹទ្ធសភា រដ្ឋសភា រាជរដ្ឋាភិបាល និងមន្ត្រីក្នុងខេត្តបានយាង និងអញ្ជើញដាំតាំងពីឆ្នាំ១៩៩៩មក ដោយសុទ្ធចិត្តចេញពីស្មារតីទទួលខុសត្រូវ ការស្រឡាញ់ព្រៃឈើ ស្រឡាញ់ធម្មជាតិ និងបរិស្ថានរបស់យើងទាំងអស់គ្នា។ ពោលគឺគ្មាននរណាម្នាក់រស់នៅដោយមិនបានផ្សាភ្ជាប់ខ្លួនជាមួយបរិស្ថានធម្មជាតិ ក្នុងភពផែនដីយើងនេះបានឡើយ។
លោកជំទាវ ក៏សង្កត់ធ្ងន់ថា ព្រៃឈើគឺជាទ្រព្យសម្បត្តិដ៏មានតម្លៃរួមរបស់ពិភពលោកយើង មានព្រៃឈើ ពិភពលោកមានសម្រស់ មានជីវិត មនុស្ស សត្វ មានខ្យល់បរិសុទ្ធ មានទឹក មានលំនឹងនៃការប្រែប្រួលអាកាសធាតុ មានធនធាន នឹងមានអ្វីៗជាច្រើនទៀត។ ប្រកាសនេះ រាជរដ្ឋាភិបាលកម្ពុជាដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី បានចាត់វិធានការយ៉ាងម៉ឹងម៉ាត់បំផុតពីបញ្ហានេះ ព្រមទាំងអំពាវនាវគ្រប់ស្ថាប័នរដ្ឋ ឯកជន និងប្រជាពលរដ្ឋទាំងអស់ចូលរួមការពារសម្បត្តិធម្មជាតិដ៏មានតម្លៃនេះ។ ក្នុងនោះដែរ លោកជំទាវក៏សូមអំពាវនាវដល់ប្រជាពលរដ្ឋទាំងអស់គ្នា ត្រូវបន្តថែរក្សាព្រៃដែលមានស្រាប់ និងពុះពារដាំបន្តជាប្រចាំ ដើម្បីការពារបរិស្ថានធម្មជាតិរបស់យើង ដើម្បីយើង កូនចៅយើង ប្រទេសជាតិយើង នឹងពិភពលោកយើងនៅគង់វង្សជានិច្ចនិរន្តរ៍។
តាមការឲ្យដឹងពី លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជា ខេត្តសៀមរាប ឧទ្យានសហស្សវត្សរ៍ ក្នុងក្រុងសៀមរាប ស្ថិតនៅតាមបណ្ដោយផ្លូវទៅប្រាសាទអង្គរវត្ត បង្កើតនៅឆ្នាំ១៩៩៩ ក្រោមព្រះរាជអធិបតីភាពដ៏ខ្ពងខ្ពង់បំផុត សម្តេចព្រះមហាក្សត្រី នរោត្តម មុនិនាថ សីហនុ ព្រះប្រធានកិត្តិយសកាកបាទក្រហមកម្ពុជា និងផ្តួចផ្ដើមបង្កើតដោយ ឯកឧត្តម ព្រឹទ្ធាចារ្យ ម៉ី សាមឺឌី អតីតអគ្គលេខាធិការកាកបាទក្រហមកម្ពុជា និង លោកព្រឹទ្ធាចារ្យ ទួន ទេស មន្ត្រីសាខាកាកបាទក្រហមកម្ពុជាខេត្តសៀមរាប ដើមី្បទុកជាប្រវត្តិសាស្ត្រ និងជាកេរ្តិ៍មរតកសម្រាប់កូនចៅជំនាន់ក្រោយ៕
អត្ថបទ និងរូបភាព៖ លោក អ៊ុន ណារាជ្យ
