នៅថ្ងៃទី១៤ ខែកុម្ភៈ ឆ្នាំ២០២៤ម្សិលមិញនេះ លោក អ៉ឹង គឹមលាង អភិបាលរងខេត្តសៀមរាប តំណាង ឯកឧត្តម ប្រាក់ សោភ័ណ អភិបាលខេត្ត បានទទួលជួបសម្តែងការគួរសម និងពិភាក្សាការងារគណនេយ្យភាពសង្គមជាមួយលោកស្រី Lisa Peterson នាយិកាអង្គការសុខភាពគ្រួសារអន្តរជាតិ (Fhi360) និងប្រតិភូអមដំណើរ រួមនឹងតំណាងមន្ទីរអង្គភាពពាក់ព័ន្ធក្នុងខេត្តមួយចំនួនទៀត។
មានប្រសាសន៍ក្នុងឱកាសនោះ លោក អ៉ឹង គឹមលាង បានថ្លែងអំណរគុណចំពោះអង្គការសុខភាពគ្រួសារអន្តរជាតិ សម្រាប់ការគាំទ្រលើការអនុវត្តការងារគណនេយ្យភាពសង្គមកម្រិតក្រុងដល់ក្រុងសៀមរាប និងកម្រិតមូលដ្ឋាន មានរដ្ឋបាលសង្កាត់ មណ្ឌលសុខភាព និងសាលាបឋមសិក្សា នាពេលកន្លងមក។
លោកអភិបាលរងខេត្តបន្តថា ការងារគណនេយ្យភាពសង្គមបានធ្វេីឱ្យប្រសើរឡើងនូវការប្រែប្រួលឥរិយាបថក្នុងការបំពេញការងាររបស់អង្គភាពផ្ដល់សេវា គម្លាតរវាងរដ្ឋបាលថ្នាក់ក្រោមជាតិជាមួយប្រជាពលរដ្ឋត្រូវបានកាត់បន្ថយ ការយល់ដឹងពីសិទ្ធិ ស្ដង់ដារ ការបំពេញការងារ ព័ត៌មានពីថវិការបស់វិស័យទាំង៣ និងការដាក់បញ្ជូលផែនការសកម្មភាពរួមទៅក្នុងកម្មវិធីវិនិយោគផងដែរ។
សូមបញ្ជាក់ថា អង្គការសុខភាពគ្រួសារអន្តរជាតិ (Fhi360) គាំទ្រថវិកាដល់អង្គការរ៉ាឆាប្រចាំខេត្តសៀមរាប បានចូលរួមចំណែកគាំទ្រផ្នែកតម្រូវការ លើការអនុវត្តការងារគណនេយ្យភាពសង្គមក្នុងក្រុងសៀមរាប ចាប់ពីឆ្នាំ២០២០មក ដោយសហការជាមួយអង្គភាពផ្ដល់សេវាកម្រិតមូលដ្ឋានគោលដៅ នៅក្នុងសង្កាត់ទាំង១២ មណ្ឌលសុខភាពទាំង១១ និងសាលាបឋមសិក្សាចំនួន២៤ និងសហការអនុវត្ត ISAF-DMK ជាមួយរដ្ឋបាលក្រុងសៀមរាប ចាប់ពីឆ្នាំ២០២៣៕
អត្ថបទ និងរូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
