មានប្រសាសន៍ក្នុងឱកាសបើកវគ្គផ្សព្វផ្សាយការងារនយោបាយ ចិត្តសាស្ត្រ នៅទីបញ្ជាការដ្ឋានកងរាជអាវុធហត្ថខេត្តសៀមរាប នាព្រឹកថ្ងៃទី១៧ ខែ ឧសភា ឆ្នាំ២០១៩នេះ ឯកឧត្ដមឧត្តមសេនីយ៍ឯក ប្រាក់ សិទ្ធិ មេបញ្ជាការរងកងរាជអាវុធហត្ថលើផ្ទៃប្រទេស បានបញ្ជាក់ថា សភាពការណ៍នយោបាយនៅកម្ពុជា បាននឹងកំពុងមានការអភិវឌ្ឍរីកចម្រើនទៅមុខ ដោយឈរលើមូលដ្ឋានសេដ្ឋកិច្ចច្បាស់លាស់របស់ប្រទេស និង ការវិវត្តន៍កាន់តែទៅមុខទៀតផង ដែលសមិទ្ធផលទាំងនេះ បានស្តែងចេញឡើងពីកត្តាសន្តិភាព ព្រោះបានធ្វើឲ្យប្រទេសជាតិយើងមានឱកាស និង មានកាលានុវត្តភាព ឈានទៅការអភិវឌ្ឍសេដ្ឋកិច្ចជាតិ ដូច្នេះ សូមឲ្យកងកម្លាំងទាំងអស់ ត្រូវបង្កើនយកចិត្តទុកដាក់ ក្នុងការការពាររាជរដ្ឋាភិបាលស្របច្បាប់ ដែលកើតចេញឡើងពីការបោះឆ្នោតរបស់ប្រជាពលរដ្ឋកម្ពុជា ព្រមទាំងគោរពឲ្យខាងតែបាន នូវបទបញ្ជារបស់កងយោធពលខេមរភូមិន្ទ ក៏ដូចបទបញ្ជាការរបស់ប្រមុខរាជរដ្ឋាភិបាល និង ត្រូវបង្កើនការយកចិត្តទុកដាក់រាល់សភាពការណ៍ផ្សេងៗ ដែលបានបំពុលសង្គមនៅតាមប្រព័ន្ធផ្សព្វផ្សាយ និង គេហទំព័រ ដែលបង្កឲ្យមានអសន្តិសុខក្នុងសង្គមជាតិ ។
ឯកឧត្ដមឧត្តមសេនីយ៍ឯក ប្រាក់ សិទ្ធិ បានបញ្ជាក់ទៀតថា សំខាន់មួយទៀត មន្ត្រីកងទ័ពទាំងអស់ នៅក្នុងអង្គភាពចំណុះទាំងអស់ គឺត្រូវតែមានការប្រុងប្រយ័ត្នគ្រប់ពេលវិនាទី មិនត្រូវធ្វេសប្រហែសនោះឡើយ ជាពិសេសត្រូវពង្រឹងដល់កងកម្លាំងលើការហ្វឹកហ្វឺន , រៀនសូត្រនូវចិត្តសាស្ត្រ យុទ្ធវិធីរបស់កងទ័ពនៅតាមអង្គភាពរបស់ខ្លួន ដើម្បីបង្កើននូវសមត្ថភាពរបស់ខ្លួន តាមរយៈនៃការសិក្សា ការស្វែងយល់ ការបណ្តុះបណ្តាល ព្រមទាំងបង្កើនការហ្វឹកហ្វឺនឲ្យបានជាប្រចាំ និង ត្រូវពាំនាំនូវចំណេះដឹងដែលខ្លួនទទួលបានពីការវគ្គ ផ្សព្វផ្សាយនាពេលនេះ យកទៅធ្វើការផ្សព្វផ្សាយបន្តដល់កងកម្លាំងក្នុងអង្គភាពរបស់ខ្លួន និង ឲ្យបានកាន់តែចូលជ្រៅទៅដល់មូលដ្ឋានផងដែរ ៕
អត្ថបទ និង រូបថត ៖ លោក ស៊ាន សុផាត និង លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
