នៅព្រឹកថ្ងៃទី០៧ ខែមីនា ឆ្នាំ២០២៤នេះ ថ្នាក់ដឹកនាំខេត្តសៀមរាប រួមនឹងប្រតិភូគ្រប់ស្ថាប័ន និងកងកម្លាំងប្រដាប់អាវុធក្នុងខេត្ត បានអញ្ជើញចូលគោរពវិញ្ញាណក្ខ័ន្ត និងរំលែកទុក្ខ ជាមួយក្រុមគ្រួសារនៃសព ឧត្តមសេនីយ៍ឯក សូរ្យ ណារ៉ា មេបញ្ជការងយោធភូមិភាគទី៤ ដែលបានទទួលមរណៈភាព កាលពីថ្ងៃទី០២ ខែមីនា ឆ្នាំ២០២៤កន្លងទៅ ក្នុងជន្មាយុ ៦៦ឆ្នាំ ដោយរោគាពាធ ហើយត្រូវបានតំកល់ធ្វើបុណ្យនៅគេហដ្ឋាននៃសព ស្ថិតនៅភូមិធ្លកអណ្តូង សង្កាត់ស្លក្រាម ក្រុង/ខេត្តសៀមរាប។
ក្នុងឱកាសនោះថ្នាក់ដឹកនាំខេត្តសៀមរាប រួមនឹងប្រតិភូគ្រប់ស្ថាប័ន និងកងកម្លាំងប្រដាប់អាវុធក្នុងខេត្ត បានម្ដែងការសោកស្តាយចំពោះការបាត់បង់នូវថ្នាក់ដឹកនាំមួយដ៏ឆ្នើមមួយរូប ពោរពេញទៅដោយ មនសិការស្នេហាជាតិ ក្នុងការដឹកនាំបំពេញកាតព្វកិច្ចការពារ កសាងជាតិមាតុភូមិក្នុងមួយជីវិត ដែលបានធ្វើពលិកម្មគ្រប់បែបយ៉ាង និងការលះបង់ធំធេង ក្នុងបុព្វហេតុជាតិ សាសនា ព្រះមហាក្សត្រ ក្នុងបុព្វហេតុការពារជាតិ មាតុភូមិ និងប្រជាពលរដ្ឋកម្ពុជា។ ឯកឧត្តមជាថ្នាក់ដឹកនាំមួយដ៏ឆ្នើមក្នុងការបញ្ជាដឹកនាំ ក្នុងការបំពេញកាតព្វកិច្ចការពារជាតិមាតុភូមិ ក្នុងរយៈពេល៤៥ឆ្នាំមកនេះ ក្នុងការបម្រើជាតិមាតុភូមិ និងការពារបូរណភាពទឹកដី និងនាំមកនូវសេចក្តីសុខសន្តិភាព សុវត្ថិភាពជូនប្រជាជាតិកម្ពុជាទាំងមូល។
ក្នុងនោះដែរគណៈប្រតិភូក៏បានធ្វើការបូជាទៀនធូក ដើមី្បឧទ្ទិសជូនដល់ដួងវិញ្ញាណក្ខ័ន្តសព សូមឲ្យឯកឧត្តមបានទៅកាន់សុខតិភពថ្មី ព្រមទាំងបែរងាកក្រោយឲ្យពរជ័យដល់ក្រុមគ្រួសារ បងប្អូន កូនចៅ និងថ្នាក់ដឹកនាំគ្រប់ជាន់ថ្នាក់ ក្នុងជួរកងកម្លាំងប្រដាប់អាវុធ មន្ត្រីរាជការ ឲ្យទទួលនូវសេចក្តីសុខ និងឲ្យស្គាល់នូវតែសុខសន្តិភាព សុភមង្គល និងការអភិវឌ្ឍន៍ប្រទេសជាតិលើគ្រប់វិស័យ។
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
