អគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងព័ត៌មាន សហការជាមួយអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុ បានរៀបចំសិក្ខាសាលាស្តីពី ថវិកាសមិទ្ធកម្ម រយៈពេល២ថ្ងៃ នៅថ្ងៃទី១១-១២ ខែមីនា ឆ្នាំ២០២៤ នៅខេត្តសៀមរាប គោលបំណងបង្កើននូវចំណេះដឹងថ្មីៗជូនដល់មន្ត្រីទទួលបន្ទុកថវិកាទាំងថ្នាក់ជាតិ និងថ្នាក់ក្រោមជាតិពាក់ព័ន្ធ នឹងការរៀបចំរចនាសម័ន្ធកម្មវិធី ការកំណត់សូចនាករ ការរៀបចំអង្គភាពថវិកា និងការវិភាជថវិកា ឱ្យចំកម្មវិធី និងគោលដៅអទិភាពជាដើម ដើម្បីបង្កើនគុណភាពនៃការវិភាជថវិកា និងរៀបចំសូចនាករសមិទ្ធកម្មគន្លឹះ។
ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុក្រសួងព័ត៌មាន មានប្រសាសន៍ថា ថវិកាសមិទ្ធកម្មមិនមែនមានភាពខុសគ្នា ខ្លាំងជាមួយនឹងថវិកាកម្មវិធីដែលក្រសួងកំពុងអនុវត្តនាពេលបច្ចុប្បន្ននោះទេ ថវិកាសមិទ្ធកម្មគឺជាការរៀបចំកញ្ចប់ថវិកា មានការផ្សារភ្ជាប់ជាមួយនឹងព័ត៌មាន សមិទ្ធកម្មដែលគ្រោងនឹងសម្រេច ឬសម្រេចបាននាគ្រាកន្លងមក។ ថវិកាសមិទ្ធកម្មអាចផ្ដល់ភាពបត់បែនក្នុងការ បង្កើតរចនាសម័ន្ធកម្មវិធីដោយផ្អែក ឬមិនផ្អែកទាំងស្រុងទៅលើរចនាសម័ន្ទរដ្ឋបាល ប៉ុន្តែតម្រូវឱ្យមានការ វាស់វែងប្រសិទ្ធភាព និងស័ក្តសិទ្ធភាពនៃកម្មវិធីតាមរយៈសូចនាករសមិទ្ធកម្មដោយផ្សារភ្ជាប់រវាងលទ្ធផលក្នុងឆ្នាំ និងលទ្ធផលចុងក្រោយឱ្យបានច្បាស់លាស់។
មានប្រសាសន៍ក្នុងឱកាសនោះ ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន បានមានប្រសាសន៍ថា សិក្ខាសាលានាពេលនេះ គឺជាវេទិកាដ៏ពិសេសសម្រាប់គ្រប់មន្ត្រីទទួលបន្ទុកថវិកាទាំងអស់របស់អង្គភាពចំណុះឱ្យក្រសួងព័ត៌មាន ដើម្បីលើកកម្ពស់សមត្ថភាពបំពេញការងារប្រចាំថ្ងៃរបស់ខ្លួន។ ការកែទម្រង់ការគ្រប់គ្រងហិរញ្ញវត្ថុសាធារណៈ គឺជាយន្តការដ៏សំខាន់ ដែលជួយទ្រទ្រង់ដល់ដំណើរការ កំណែទម្រង់ស្ថាប័នទាំងមូលប្រកបដោយប្រសិទ្ធិភាព ការពង្រឹងគុណភាពអភិបាលកិច្ចល្អ និង ការកសាងប្រព័ន្ធហិរញ្ញវត្ថុសាធារណៈរឹងមាំមួយ ដែលអនុញ្ញាតឱ្យរាជដ្ឋាភិបាលអាចលើកកម្ពស់ ជីវភាព និងបម្រើសេវាសាធារណៈជូនប្រជាជនបានកាន់តែប្រសើរឡើង។ ការអនុវត្តកម្មវិធីកែទម្រង់ការ គ្រប់គ្រងហិរញ្ញវត្ថុសាធារណៈត្រូវបានចាប់ផ្ដើមតាំងពីឆ្នាំ២០០៤ ក្នុងគោលដៅប្រែក្លាយប្រព័ន្ធ គ្រប់គ្រងហិរញ្ញវត្ថុសាធារណៈនៅកម្ពុជាជាជំហ៊ានៗ ឆ្ពោះទៅកាន់ប្រព័ន្ធថវិកាផ្តោតលើលទ្ធផល ឬ សមិទ្ធកម្មនឹងវិមជ្ឈការ ស្របតាមស្តង់ដា និងឧត្តមានុវត្តអន្តរជាតិ។
ឯកឧត្ដម នេត្រ ភក្ត្រា បញ្ជាក់ថា ថវិកាសមិទ្ធកម្ម គឺជាការរៀបចំកញ្ចប់ថវិកា ដោយមានការផ្សារភ្ជាប់ទៅនឹងសមិទ្ធកម្មដែលក្រសួងបានស្នើឡើង ឬបានសម្រេចកន្លងមក។ ក្នុងន័យនេះ សូមឱ្យការរៀបចំថវិកាសមិទ្ធកម្មរបស់យើងត្រូវបង្កើនការយកចិត្តទុកដាក់ផ្តោតលើអាទិភាពគោលនយោបាយរបស់រាជរដ្ឋាភិបាល ដែលមានចរិកផ្សារភ្ជាប់ជាមួយគោលនយោបាយជាតិ និងថវិកាសមិទ្ធកម្មរយៈខ្លី និងមធ្យមរបស់ក្រសួង ត្រូវបន្ស៊ីគ្នាជាមួយគោលនយោបាយរបស់ក្រសួង ហើយក្រសួងព័ត៌មាន នឹងបន្តរៀបចំផែនការយុទ្ធសាស្ត្រ របស់ខ្លួនដើម្បីតម្រង់ទិសដៅការងារឱ្យកាន់តែប្រសើរ និងមានប្រសិទ្ធិភាព។
ឯកឧត្តមរដ្ឋមន្ត្រី បានបង្ហាញថា បច្ចុប្បន្នវិស័យព័ត៌មាន បានដើរតួនាទីយ៉ាងសំខាន់នៅក្នុងការវិភាគ ការវាយតម្លៃ ការឆ្លើយតបដើម្បីបំភ្លឺមតិសាធារណៈ។ ដូច្នេះសូមកុំមើលកុំមើលស្ថាប័នព័ត៌មាន ត្រឹមតែជាស្ថាប័នប្រមូលម្តុំ និងចែកចាយព័ត៌មាន។ វិស័យព័ត៌មានគឺជាអំណាចទី៤ ដូច្នេះនៅក្នុងអណត្តិទី៧នេះ ក្រសួងបានចាប់ផ្តើមធ្វើសេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់ក្រសួងព័ត៌មានឡើងវិញ ដោយបន្ស៊ីទៅនឹងអ្វីដែលជាការវិវត្តន៍របស់សង្គមបច្ចុប្បន្ន។ ក្នុងនោះក៏មានការបំពាក់មុខងារថ្មីរបស់ក្រសួង ជាមួយនឹងតម្រូវការធនធានមនុស្ស សម្រាប់បំពេញប្រអប់ការងាររបស់ក្រសួងឲ្យសក្តិសមជាអំណាចទី៤របស់រដ្ឋ។ ដូចនេះសូមអ្នកទាំងអស់គ្នាកុំមើលឃើញក្រសួងព័ត៌មាន ត្រឹមតែជាក្រសួងប្រមូលព័ត៌មាន និងផ្សព្វផ្សាយព័ត៌មានទៅវិញ។ ក៏ប៉ុន្តែអ្នកទាំងអស់គ្នាត្រូវមើលតួនាទីរបស់ក្រសួងព័ត៌មាននេះ គឺជាស្ថាប័នមួយយ៉ាងសំខាន់របស់រាជរដ្ឋាភិបាលនៅក្នុងការគ្រប់គ្រងសាធារណៈមតិ និងគ្រប់គ្រងព័ត៌មាន៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
