នៅរសៀលថ្ងៃទី១៣ ខែមីនា ឆ្នាំ២០២៤នេះ អាជ្ញាធរខេត្តសៀមរាប បានរៀបចំកិច្ចប្រជុំស្ដីពីការត្រៀមរៀបចំអនុគណៈកម្មការខ្លឹមសារពិធីការ និងព័ត៌មាន សម្រាប់បុណញយទន្លេលើកទី៨ ឆ្នាំ២០២៤ នៅខេត្តសៀមរាប ដឹកនាំដោយលោក លី សារី និង លោក ង៉ូវ សេងកាក់ អភិបាលរងខេត្ត ដោយមានការចូលរួមពីអ្នកពាក់ពាន្ធមួយចំនួនទៀត។
នៅក្នុងកិច្ចប្រជុំនេះ លោក មករា ពិសិដ្ឋ នាយកទីចាត់ការទំនាក់ទំនងអន្តរជាតិ ខេត្តសៀមរាប បានធ្វើរបាយការណ៍ពីការរៀបចំពិធី និងដំណើរការនៃការប្រព្រឹត្តិទៅនៃពិធីបុណ្យទន្លេលើកទី៨ នៅខេត្តសៀមរាប ដោយមានកម្មវិធីជាច្រើន ហើយការងារមួយចំនួនក្រុមការងារក៏បានត្រៀមខ្លួនរួចជាស្រេច ហើយការងារមួយចំនួនទៀត ក្រុមការងារក៏កំពុងបន្តពន្លឿន ធ្វើយ៉ាងណាឲ្យកម្មវិធីប្រព្រឹត្តិទៅតាមការគ្រោងទុក។ ក្នុងនោះដែរក៏សូមឲ្យអ្នកពាក់ព័ន្ធចូលរួមពិនិត្យ តាមដានដោយយកចិត្តទុកដាក់ ដើម្បីឲ្យពិធីនេះប្រព្រឹត្តិទៅដោយរលូន និងជោគជ័យ។ ជាមួយគ្នានោះ មន្ទីរព័ត៌មានខេត្តក៏បានធ្វើរបាយការណ៍ ពីការរៀបចំត្រៀមនៅក្នុងពិធីដ៏ធំនេះ ដោយបានត្រៀមខ្លួនរួចជាស្រេច ក្នុងការផ្សព្វផ្សាយ និងតាមដានព័ត៌មាន និងកម្មវិធីនានានៅក្នុងព្រឹត្តិការណ៍នេះផងដែរ។
មានប្រសាសន៍ក្នុងឱកាសនោះ លោក លី សារី បានជំរុញដល់ក្រុមការងារត្រូវពិនិត្យឲ្យបានគ្រប់ជ្រុងជ្រោយ ក្នុងការត្រៀមទទួលបដិសណ្ឋារកិច្ចចំពោះវត្តមានថ្នាក់ដឹកនាំជាតិ អន្តរជាតិ ជាពិសេសភ្ញៀវទេសចរណ៍ និងបងប្អូនប្រជាពលរដ្ឋទាំងអស់ ដែលបានចូលរួមក្នុងព្រឹត្តិការណ៍ដ៏ធំនៅខេត្តទេសចរណ៍ប្រវត្តសាស្រ្តយើងនេះ ដែលជាព្រឹត្តិការណ៍ថ្មី ហើយវាក៏ជាឱកាសក្នុងការទាក់ទាញភ្ញៀវទេសចរណ៍ចូលមកទស្សនាក្នុងខេត្តសៀមរាបទៀងផង។ ជាមួយគ្នានោះ ពិធីបុណ្យទន្លេនៅខេត្ដសៀមរាប ជាលើកទីមួយ រយៈពេលបីថ្ងៃ មានរៀបចំកម្មវិធីជាច្រើន ហើយយើងជឿជាក់ថា នឹងមានអ្នកទេសចរមកចូលរួមកំសាន្តច្រើន ជួយជំរុញដល់សេដ្ឋកិច្ចដល់ប្រជាពលរដ្ឋ ក៏ដូចប្រតិបត្ដិករទេសចរណ៍ក្នុងខេត្តទៀតផង។
ក្នុងនោះដែរ លោក ង៉ូវ សេងកាក់ ក៏បានណែនាំដល់ក្រុមការងារទាំងអស់ ត្រូវយកចិត្តទុកដាក់ខ្ពស់លើបញ្ហាការងារដែលក្រុមការងារយើងមានបទពិសោធន៍ពីបណ្តាកម្មវិធីមួយចំនួន ដែលបានកើតឡើងកន្លងមក ធ្វើយ៉ាងណាកុំឲ្យមានការធ្វេសប្រហែស ធ្វើយ៉ាងណាចូលរួមអនុវត្តការងារឲ្យព្រឹត្តិការណ៍នេះដំណើរការបានទៅតាមការព្រោងទុក។ ក្នុងនោះដែរ សម្រាប់មន្ទីរព័ត៌មានខេត្ត ត្រូវសហការផ្សព្វផ្សាយទាំងមុន និងពេលដំណើរការព្រឹត្តិការណ៍នេះឲ្យបានទូលំទូលាយទៅដល់សាធារណៈជនទូទៅ ហើយក៏ជាការផ្សព្វផ្សាយឲ្យទាក់ទាញអារម្មណ៍ដល់ភ្ញៀវទេសចរជាតិ អន្តរជាតិ ចូលមកទស្សនាកម្សាន្ត នូវសម្បត្តិវប្បធម៌ខ្មែរយើង ដែលសម្បូរទៅដោយប្រាង្គប្រាសាទ រមណីដ្ឋានធម្មជាតិ នៅលើទឹកដីប្រវត្តិសាស្ត្រសៀមរាប ដែលជាទីក្រុងគោលដៅភ្ញៀវទេសចរ នៅលើពិភពលោកផងដែរ។
សូមជម្រាបថា ពិធីបុណ្យទន្លេលើកទី៨ នៅខេត្តសៀមរាបនេះ នឹងប្រារព្ធឡើងចាប់ពីថ្ងៃទី១៥ ដល់ថ្ងៃទី១៧ ខែមីនា ឆ្នាំ២០២៤ខាងមុខនេះ ចាប់ពីស្ពានព្រះរាជដំណាក់ រហូតដល់រង្វង់មូលវត្តដំណាក់ក្រុងសៀមរាប ក្រោមប្រធានបទ “ទន្លេដើម្បីសន្តិភាពដោយមានការអភិវឌ្ឍ’’ ដោយមានការសម្តែងសិល្បៈ ការប្រគុំតន្ត្រី ចូលរួមពី ក្រុមសិល្បករ សិល្បការិនី តារាចំរៀងជាតិ និងអន្តរជាតិល្បីៗ ព្រមទាំងមានការអុចកាំជ្រួចទៀតផង៕
អត្ថបទ និងរូបភាព៖ លោក អ៊ុន ណារាជ្យ
