នៅថ្ងៃទី១៧ ខែមីនា ឆ្នាំ២០២៤ ម្សិលមិញនេះ ឯកឧត្តម អ្នកឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប បានអញ្ជើញសម្ពោធ និងកាត់ឫសសីមាដាក់ឱ្យប្រើប្រាស់នូវសមិទ្ធផលព្រះវិហារថ្មី វត្តទិព្វពិសី ហៅវត្តដំរីឆ្លង ស្ថិតនៅឃុំសង្វើយ ស្រុកជីក្រែង ខេត្តសៀមរាប ដោយមានការនិមន្តចូលរួមពីព្រះមន្ត្រីសង្ឃ ព្រះគ្រូចៅអធិការ អាជ្ញាធរមូលដ្ឋាន លោកគ្រូអ្នកគ្រូសិស្សានុសិស្ស និងបងប្អូនប្រជាពលរដ្ឋជាច្រើននាក់។
ឯកឧត្តម អ្នកឧកញ៉ា សៀង ណាំ មានប្រសាសន៍ថា គ្រប់ការរីកចម្រើនបានរបស់ប្រទេសជាតិលើគ្រប់វិស័យ រួមទាំងវិស័យព្រះពុទ្ធសាសនាចាប់ពីចុងឆ្នាំ១៩៩៨មក គឺអាស្រ័យដោយសារប្រទេសមានសុខសន្តិភាព បានមកពីការអនុវត្តនយោបាយឈ្នះ-ឈ្នះ របស់សម្តេចតេជោ ហ៊ុន សែន និងបន្តមកសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន។ ដូចនេះយើងត្រូវរួមសាមគ្គីគ្នា ការពារ ថែរក្សាសន្តិភាពឱ្យបានរឹងមាំ ដើម្បីភាពសុខសាន្ត និងការបន្តអភិវឌ្ឍរីកចម្រើនរុងរឿងរបស់ប្រទេសជាតិយើងទៅថ្ងៃអនាគត។
ឯកឧត្តមបន្តថា ជាក់ស្ដែងសមិទ្ធផលព្រះវិហារថ្មី ក្នុងវត្តទិព្វពិសី នាពេលនេះ គឺកើតឡើងពីការចូលរួមបរិច្ចាគធនធាន ដោយសទ្ធាជ្រះថ្លាពីសប្បុរសជន និងពុទ្ធបរិស័ទជិតឆ្ងាយដែលបានរួមគ្នាជាកម្លាំងមហាសាមគ្គីមួយដ៏រឹងមាំ បានបរិច្ចាគនូវទ្រព្យធន់ផ្ទាល់ខ្លួន ដើមី្បលើកស្ទួយវិស័យពុទ្ធសាសនា ឱ្យមានការអភិវឌ្ឍរីកចម្រើន ទុកជាផលប្រយោជន៍រួម សម្រាប់ភិក្ខុសង្ឃប្រជាពុទ្ធបរិស័ទ ធ្វើបុណ្យធ្វើទានក្នុងផ្លូវព្រះពុទ្ធសាសនា ដែលជាសាសនារបស់រដ្ឋ និងដើម្បីសម្រេចបាននូវសមិទ្ធផលសម្រាប់តម្កល់ទុកជាសម្បត្តិគរុភណ្ឌ ក្នុងការប្រើប្រាស់ជាប្រយោជន៍រួមរបស់ព្រះសង្ឃ និងពុទ្ធបរិស័ទក្នុងការគោរពប្រតិបត្តិតាមជំនឿបែបព្រះពុទ្ធសាសនា។
ក្នុងឱកាសនោះដែរ ឯកឧត្តម អ្នកឧកញ៉ា សៀង ណាំ ក៏បានចូលរួមដើម្បីកសាងទីវត្តបន្តនូវបច្ច័យចំនួន ១០លានរៀល ហើយសម្រាប់លោកតាលោកយាយ ដែលបានចូលរួមក្នុងពិធីក្នុងម្នាក់ៗទទួលបានក្រណាត់ស១ដុំ ថវិកា១ម៉ឺនរៀល, ប្រជាពលរដ្ឋទទួលបានសារុង១ ,លោកគ្រូអ្នកគ្រូ៥នាក់ ម្នាក់ថវិកា៥០.០០០រៀល សិស្សានុសិស្ស១០០នាក់ ម្នាក់ៗទទួលបានសៀវភៅសរសេរ ២ក្បាល ប៊ិច២ដើម និងថវិកា៥.០០០រៀល៕
អត្ថបទ និងរួបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ