នៅរសៀលថ្ងៃទី១៨ ខែមីនា ឆ្នាំ២០២៤ សាខាកាកបាទក្រហមកម្ពុជាខេត្តសៀមរាប បានរៀបចំពិធីប្រគល់រង្វាន់ជ័យលាភីសម្រាប់ការប្រឡងគំនូរយុវជនកាកបាទក្រហមកម្ពុជា កម្រិតសាខា អបអរខួបលើកទី១៦១ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ឆ្នាំ២០២៤ ក្រោមអធិបតីភាព លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការសាខាក្រហមកម្ពុជាខេត្ត ដោយមានការអញ្ជើញចូលរួមពីថ្នាក់ដឹកនាំ លោកគ្រូអ្នកគ្រូទីប្រឹក្សាយុវជននៃសាខាគោលដៅ និងប្អូនៗបេក្ខជនទាំង៣០នាក់។
លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្ត បានឲ្យដឹងថា ការរៀបចំប្រឡងគំនូរគំនូរយុវជនកាកបាទក្រហម គឺមានបេក្ខជនចូលរួមប្រឡងគំនូរមានចំនួន៣០នាក់ ស្រី១៩នាក់ មកពីវិទ្យាល័យចំនួន៧ រួមមាន៖ វិទ្យាល័យសម្តេចឪ ៤នាក់, វិទ្យាល័យអង្គរ ៦នាក់, វិទ្យាល័យហ៊ុនសែនសៀមរាប ៤នាក់, វិទ្យាល័យហ៊ុនសែនវត្តស្វាយ ៤នាក់, វិទ្យាល័យ១០មករា១៩៧៩ ចំនួន៣នាក់, វិទ្យាល័យបាយ័ន ៤នាក់ និងមកពីវិទ្យាល័យហ៊ុនសែនស្វាយធំ ៥នាក់។ ចំពោះវិធីសាស្ត្រនៃការប្រឡងគំនូរនេះ គឺបេក្ខជនត្រូវគូរគំនូរនៅសាលារៀងៗខ្លួនដោយដោយផ្ដោតលើប្រធានបទ “ រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ ” មានរយៈពេល៣ម៉ោង ពេលគូររួចត្រូវប្រមូលផ្ទាំងគំនូរទាំងនោះយកមកសាខា ដើម្បីគណៈកម្មការពិនិត្យវាយតម្លៃ ជ្រើសរើសជ័យលាភីកម្រិតសាខា។
លោកនាយកប្រតិបត្តិ បានឲ្យដឹងទៀតថា ឆ្លងកាត់នៃការប្រកួតរួចមក ជាលទ្ធផល៖ ជ័យលាភីលេខ១ បានទៅលើយុវតី ថាត រីតា សិស្សថ្នាក់ទី១០A នៃវិទ្យាល័យ ១០មករា១៩៧៩ ,ជ័យលាភីលេខ២ បានទៅលើយុវតី ចាន់ សុជាតា ជាសិស្សថ្នាក់ទី១២R នៃវិទ្យាល័យ ១០មករា១៩៧៩ និងជ័យលាភីលេខ៣ បានទៅលើយុវតី រ័ត្ន លីហ្សា ជាសិស្សថ្នាក់ទី១១C នៃវិទ្យាល័យសម្តេចឪ។
ក្នុងឱកាសនោះដែរ លោកជំទាវ ទុយ ជិ ប្រាក់ សោភ័ណ មានប្រសាសន៍ថា ទោះបីជារូបភាពដែលដាក់តាំងនៅទីនេះ មិនបានល្អសមតាមទ្រង់ទ្រាយដូចមនុស្សធំ ឬអ្នកមានជំនាញគូរក្តី ប៉ុន្តែរូបភាពទាំងនេះបានបង្ហាញពីការរិះគិត និងការខិតខំផ្ចិតផ្ចង់គូររបស់ក្មួយៗទាំងអស់ តាមរយៈការជួយបំផុសណែនាំខ្លឹមសារគំនូរពីសំណាក់លោកគ្រូអ្នកគ្រូទីប្រឹក្សា។ តាមរយៈនេះក្មួយៗបានសាកល្បងទឹកដៃជាវិចិត្រករវ័យក្មេង ពិតជាបានដឹងថាការរិះរកអំពីខ្លឹមសារត្រូវគូរ ការគូរដោយផ្ទាល់លើក្រដាសគំនូរ និងការផាត់ពណ៌នេះមានការងាយស្រួល ឬលំបាកយ៉ាងណានោះ។ ដូច្នេះហើយទើបបច្ចុប្បន្ននេះ ទោះបីមានបច្ចេកវិទ្យារីកចំរើនដោយមានឧបករណ៍ទំនើបអាចថតផ្តិត និងពង្រីករូបភាពធំជាងរូបភាពពិតល្អឥតខ្ចោះ និងរហ័សទាន់ចិត្តក្តី ក៏រូបភាពដែលគូរ និងផាត់ពណ៌ដោយដៃនៅតែមានតម្លៃ និងជាទីពេញនិយមនៅឡើយ ពិសេសចំពោះអ្នកដែលនិយមរូបភាពដែលគូរដោយដៃមនុស្សផ្ទាល់ព្រោះជាស្នាដៃដែលបានមកពីការអំណត់ព្យាយាមរបស់វិចិត្រករ។
លោកជំទាវអនុប្រធាន ក៏បានថ្លែងការកោតសូមសរសើរ ចំពោះស្មារតីខិតខំព្យាយាម ឆ្លៀតពេលពីការសិក្សារបស់ក្មួយៗទាំងអស់ ចូលរួមគូរគំនូរពីសកម្មភាពមនុស្សធម៌របស់កាកបាទក្រហមកម្ពុជាយើង។ ជាមួយគ្នានេះដែរលោកជំទាវក៏បានលើកទឹកចិត្តចំពោះក្មួយៗដែលមិនបានជាប់ជ័យលាភី សូមកុំមានការអាក់អន់ស្រពន់ចិត្ត ព្រោះនេះជាការប្រឡងស្នាដៃដោយយុត្តិធម៌ទាំងអស់គ្នា និងសូមក្មួយៗព្យាយាមបន្តទៀត ដោយហេតុថាឱកាសសម្រាប់ក្មួយៗមានច្រើននៅឆ្នាំខាងមុខ និងសូមក្មួយៗទាំងអស់បន្តយកចិត្តទុកដាក់គោរព និងស្តាប់បង្គាប់ឪពុកម្តាយ ខិតខំរៀនសូត្រ គោរពវិន័យសាលា ស្តាប់ដំបូន្មានលោកគ្រូ អ្នកគ្រូ ជួយមិត្តដែលទន់ខ្យោយ និងធ្វើតែអំពើណាដែលល្អ ដើម្បីក្លាយជាកូនល្អ សិស្សល្អ និងមិត្តល្អពិសេសត្រូវចៀសវាងឱ្យឆ្ងាយពីគ្រឿងញៀន ក៏ដូចជាត្រូវគោរពច្បាប់ចរាចរណ៍រាល់ពេលធ្វើដំណើរ ដើម្បីសុវត្ថិភាពទាំងអស់គ្នា៕
អត្ថបទ និងរូបភាព៖ លោក ស៊ុន គីន
កែសម្រួល៖ លោក អ៊ុន ណារាជ្យ
