គណៈកម្មាធិការសម្របសម្រួលអន្តរជាតិ សម្រាប់ការអភិរក្ស និងការលើកតម្លៃប្រាសាទព្រះវិហារ ហៅកាត់ថា ICC Preah Vihear នៅថ្ងៃទី១៩ ខែមីនា ឆ្នាំ២០២៤នេះ បានបើកកិច្ចប្រជុំពេញអង្គលើកទី៩ របស់ខ្លួននៅខេត្ដសៀមរាប ដើម្បីពិភាក្សាគ្នាលើកការអភិរក្ស និងការអភិវឌ្ឍន៍តំបន់រមណីយដ្ឋានប្រាសាទព្រះវិហារ និងប្រាសាទកោះកេរ។
ឯកឧត្ដម គង់ ពុទ្ធិកា អគ្គនាយកអាជ្ញាធរជាតិព្រះវិហារ បានលើកឡើងថា ក្រុមការងារ NAPV បានបញ្ចប់ការអភិរក្ស និងជួសជុលផ្លូវគោចរខាងលិចគោបុរៈទី៥ និងសាងសង់ស្ពានឈើ ដែលឥឡូវនេះអាចឲ្យភ្ញៀវទេសចរដើរកាត់តាមជណ្តើរទៅខាងជើងនិងគោបុរៈទី៥។ នៅជណ្តើរខាងជើង គម្រោងឧបត្ថម្ភដោយមូលនិសហរដ្ឋអាមេរិកសម្រាប់ការអភិរក្សវប្បធម៌ បានបញ្ចប់ការអភិរក្ស និងការស្ដារឡើងវិញនូវផ្នែកទី១៤និង១៣។ បច្ចុប្បន្នក្រុមការងារកំពុងអនុវត្តការងារលើផ្នែកទី១២និងទី១១នៅចុងឆ្នាំនេះ។ ដោយឡែក នៅប្រាសាទកោះកេរ ក្រុមការងារ NAPV បានបញ្ចប់ដំណាក់កាលចុងក្រោយនៃការជីកកកាយបុរាណវត្ថុក្នុងបរិវេណទី១ និងការអភិរក្សប៉មឥដ្ឋខាងជើងឆៀងខាងកើតនៅប្រាសាទក្រចាប់។
ឯកឧត្ដម គង់ ពុទ្ធិកា បន្តថា ផ្អែកលើលទ្ធផលទាំងនោះ ក្រុមការងារគ្រោងនឹងស្នើសុំអន្តរាគមន៍មួយចំនួន ដើម្បីឆ្លើយតបទៅនឹងបញ្ហាប្រឈមនាពេលបច្ចុប្បន្ន ដែលប្រាសាទនេះកំពុងជួបប្រទះ រួមមានការពង្រឹងប្រាង្គឥដ្ឋមួយទៀត ការជីកយកកំទេចកំទីចេញពីឡឥដ្ឋទី២ ការជម្លៀសទឹកចេញពីឡឥដ្ឋទី១ និងការដំឡើងឈើចល័ត។វេទិកាសម្រាប់ការចូលប្រើរបស់អ្នកទស្សនានៅប្រាសាទក្រហាំ ដោយសារតែការធ្លាក់ឥដ្ឋពីកំពូល និងស្ថានភាពធ្ងន់ធ្ងរនៅមូលដ្ឋានប៉ម ក្រុមការងារ បានធ្វើការវិភាគហានិភ័យ និងការសិក្សាស្ថាបត្យកម្ម ហើយស្នើផែនការអន្តរាគមន៍សម្រាប់ប៉មនេះ។
ឯកឧត្ដមអគ្គនាយក បន្ថែមថា ផ្អែកលើអនុសាសន៍ពីវគ្គមុន ក្រុមការងារ NAPV បានអនុវត្តការសិក្សាលម្អិតបន្ថែមទៀតលើគម្រោងជួសជុលផ្លូវនៅការដ្ឋានកោះកេរ ដោយធ្វើតេស្ដ DCP ការស្រាវជ្រាវកំណាយបុរាណវត្ថុ ការវិភាគលើការគ្រប់គ្រងទឹក និងការសិក្សាបច្ចេកទេសលើបច្ចេកទេសសំណង់។ លើសពីនេះ NAPV កំពុងសិក្សាពីលទ្ធភាពក្នុងការដំឡើងបញ្ជរឈើតូចៗនៅតាមទីតាំងយុទ្ធសាស្ត្រមួយចំនួន ដើម្បីធ្វើជាកន្លែងសម្រាក ក៏ដូចជាផ្តល់ព័ត៌មានអំពីប្រាសាទ និងសកម្មភាពអភិរក្សដែលកំពុងបន្តសម្រាប់ភ្ញៀវទេសចរ។ បន្ថែមពីលើសកម្មភាពអភិរក្ស និងអភិវឌ្ឍន៍ ក្រុមការងារ NAPV ក៏បានដើរតួនាទីយ៉ាងសកម្មក្នុងការលើកកម្ពស់ការយល់ដឹង ការចូលរួមរបស់សហគមន៍ និងការដាំដើមឈើឡើងវិញ រៀបចំកិច្ចប្រជុំបូកសរុបប្រចាំឆ្នាំ ដោយមានការចូលរួមពីអាជ្ញាធរមូលដ្ឋាន និងអ្នកពាក់ព័ន្ធផ្សេងៗ ដោយកិច្ចប្រជុំនេះ មានគោលបំណងលើកកម្ពស់ការយល់ដឹងអំពីសកម្មភាពអភិរក្ស និងអភិវឌ្ឍន៍ដែលអនុវត្តដោយNAPVក្នុងឆ្នាំ២០២៣និងផែនការសម្រាប់ឆ្នាំ២០២៤។ព្រមទាំងបានធ្វើសកម្មភាព បើកវគ្គបណ្តុះបណ្តាល ជំនួយសង្គ្រោះបឋម ដល់ភ្នាក់ងារទេសចរណ៍ ដើម្បីពួកគេអាចផ្តល់ជំនួយសង្គ្រោះបឋមដល់ភ្ញៀវទេសចរ។សម្របសម្រួលជាមួយនិស្សិតជប៉ុន និងនិស្សិតក្នុងស្រុក ដើម្បីលើកកម្ពស់កម្មវិធីផ្លាស់ប្តូរវប្បធម៌ផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
