ថវិកាចំនួន ២០០លានរៀល របស់ថ្នាក់ដឹកនាំខេត្តសព្រះវិហារ និងមូលនិធិថ្នាក់ដឹកនាំ មន្ត្រីរាជការ និងបុគ្គលិកនៃមន្ទីរអប់រំ យុវជន និងកីឡាខេត្តព្រះវិហារ ត្រូវបាន ឯកឧត្តម គឹម រិទ្ធី អភិបាលខេត្តព្រះវិហារ រួមនឹងថ្នាក់ដឹកនាំខេត្ត នាំយកមកប្រគល់ជូនដល់មូលនិធិមន្ទីរពេទ្យកុមារគន្ធបុប្ផាកម្ពុជា ដែលការផ្ដល់ប្រគល់នេះធ្វើឡើងនៅមន្ទីរពេទ្យជ័យវ័រ្មនទី៧ ឬមន្ទីរពេទ្យកុមារគន្ធបុប្ផាទី៣ ខេត្ដសៀមរាប នៅថ្ងៃទី២០ ខែមីនា ឆ្នាំ២០២៤នេះ។
ក្នុងឱកាសនោះ ឯកឧត្ដម គឹម រិទ្ធី បានបញ្ជាក់ថា ថវិកាដែលនាំយកមកប្រគល់ជូននាពេលនេះ ជាថវិការបស់ឯកឧត្តមផ្ទាល់ រួមនឹងថ្នាក់ដឹកនាំ មន្ត្រីរាជការ លោកគ្រូអ្នកគ្រូ នៃមន្ទីរអប់រំ យុវជន និងកីឡាខេត្ដព្រះវិហារ ដែលពួកគាត់បានស្ម័គ្រចិត្ដយកប្រាក់ខែម្នាក់ ៥ពាន់រៀល ក្នុង១ខែ សម្រាប់បរិច្ចាកជូនមូលនិធិគន្ធបុប្ផាកម្ពុជា។ ការចូលរួមបរិច្ចាកថវិកានេះ បង្ហាញពីទឹកចិត្ដដ៍ថ្លៃថ្លារបស់លោកគ្រូអ្នកគ្រូ ក្នុងការជួយសង្គ្រោះអាយុជីវិតរបស់កុមារកម្ពុជា ខណៈដែលមន្ទីរពេទ្យកុមារគន្ធបុប្ផា មានអ្នកជំងឺរាប់ពាន់នាក់ទៅព្យាបាលដោយមិនគិតថ្លៃ។
ឯកឧត្ដមអភិបាលខេត្ត បានថ្លែងការកោតសរសើរចំពោះទឹកចិត្ដសប្បុរសធម៌របស់លោកគ្រូអ្នកគ្រូទាំងអស់ ដែលបានចំណាយប្រាក់ខែរបស់ខ្លួនទៅបរិច្ចាកដល់មូលនិធិគន្ធបុប្ផាកម្ពុជា ដែលការផ្តល់វិភាគទានដ៏សប្បុរសធម៌ជូនមូលនិធិគន្ធបុប្ផាកម្ពុជានេះ គឺជាការឆ្លើយតបទៅនឹងការអំពាវនាវ និងលើកទឹកចិត្តពីសំណាក់សម្តេចតេជោ ហ៊ុន សែន ស្ថាបនិកមូលនិធិគន្ធបុប្ផាកម្ពុជា ឱ្យបំផុសចលនាផ្សព្វផ្សាយ និងបន្តផ្តល់វិភាគទានសប្បុរសធម៌ តាមរយៈការចូលជាសមាជិករបស់មូលនិធិគន្ធបុប្ផាកម្ពុជា ក្នុងស្មារតី «ខ្មែរជួយខ្មែរ»។ ជាមួយនោះ ឯកឧត្តម ក៏បានសម្តែងការកោតសរសើរចំពោះរាជរដ្ឋាភិបាលកម្ពុជា ដែលតែងតែគិតគូរអំពីសុខទុក្ខរបស់ប្រជាពលរដ្ឋ និងជាពិសេសសុខុមាលភាពរបស់កុមារ តាមរយៈការបង្កើត «មូលនិធិគន្ធបុប្ផាកម្ពុជា» នេះឡើង ដើម្បីចូលរួមធានានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាទាំង ៥ទីតាំង។
ព័ត៌មានជាតិ ថ្មីៗ
បើតាមតំណាងមន្ទីរពេទ្យ បានឲ្យដឹងថា នេះជាលើកទី២ហើយ ដែលមន្ត្រីរាជការ និងបុគ្គលិកនៃមន្ទីរអប់រំ យុវជន និងកីឡាខេត្តព្រះវិហារ បានជួយឧបត្ថម្ភថវិកាចូលមូលនិធិគន្ធបុប្ផាកម្ពុជា ដែលមកដល់ពេលមានទំហំទឹកប្រាក់៤០០លានរៀល។ មន្ទីរគន្ធបុប្ផា ជាមន្ទីរពេទ្យដែលព្យាបាលអ្នកជំងឺដោយមិនគិតថ្លៃ ដោយក្នុង១ថ្ងៃសម្រាប់ផ្នែកពិគ្រោះជំងឺខាងក្រៅជាមធ្យមមានចំនួន ១.៤០០នាក់ ហើយសម្រាប់អ្នកជំងឺដែលកំពុងសម្រាកព្យាបាលនៅក្នុងមន្ទីរពេទ្យមានជាង១០.០០នាក់។ ហើយសម្រាប់ខែកុម្ភៈ ឆ្នាំ២០២៤កន្លងទៅនេះ គឺផ្នែកពិគ្រោះជំងឺខាងក្រៅជាង ៣ម៉ឺននាក់ ក្នុងនោះករណីថ្មីដែលមិនធ្លាប់មកមន្ទីរពេទ្យគន្ធបុប្ផាមានរហូតដល់ទៅជាង ២ម៉ឺននាក់ ដែលចំនួនទាំងនេះ មានការលើសលុបលើចំនួនគ្រែដែលមានមន្ទីរពេទ្យមាន។
សូមជម្រាបថា ថវិកាដែលបានណាំយកមកប្រគល់ជូននាពេលនេះ មានចំនួន ២០០លានរៀល ក្នុងនោះ៖ ថវិការបស់ ឯកឧត្តម គីម រិទ្ធី អភិបាលខេត្តព្រះវិហារ ចំនួន ៨.៩១០.០០០រៀល, ឯកឧត្តម គង់ ពុទ្ធីកា អគ្គនាយកអាជ្ញាធរព្រះវិហារ ចំនួន ៥.០០០.០០០រៀល និងថ្នាក់ដឹកនាំ មន្ត្រីរាជការ បុគ្គលិក លោកគ្រូអ្នកគ្រូទូទាំងខេត្តព្រះវិហារ ចំនួន ១៨៦.០៩០.០០រៀល៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
