ព្រឹត្តិការណ៍សមរាត្រី (Equinox) ឬព្រះអាទិត្យរះចំកំពូលកណ្ដាលនៃប្រាសាទអង្គរវត្ត តែងកើតឡើងចំនួន ២ដង ក្នុង១ឆ្នាំឆ្នាំ គឺសមរាត្រីរដូវប្រាំងកើតឡើងនៅថ្ងៃទី២១ ខែមីនា និងសមរាត្រីរដូវវស្សាកើតឡើងនៅថ្ងៃទី២២ ខែកញ្ញា ខណៈព្រឹត្តិការណ៍នៅព្រឹកថ្ងៃទី២១ ខែមីនា ឆ្នាំ២០២៤នេះ បានទាក់ទាញវត្តមានអ្នកទេសចរណ៍ជាតិ អន្តរជាតិមកទស្សនាបានជាង ១ម៉ឺននាក់។
អ្នកទេសចរណ៍ដែលបានមកទស្សនាព្រឹត្តិការណ៍ ពួកគាត់មានភាពភ្ញាក់ផ្អើលចំពោះព្រឹត្តិការណ៍ដ៍អស្ចារ្យនេះ ហើយវាជាលើកទី១ សម្រាប់ពួកគាត់ដែលបានមកទស្សនាផ្ទាល់បែបនេះ។ ពួកគាត់បានចូលមកទស្សថ្ងៃរះនេះចាប់ពីម៉ោង៥ព្រឹក ហើយបានឃើញភាពស្រស់ស្អាតនៃថ្ងៃរះនៅលើកំពូលប្រាសាទអង្គរវត្ត ឆ្លុះជាមួយស្រះទឹកបញ្ចេញពន្លឺព័ណ៌មាសស្របពេលមានទេសភាពសម្រស់ខៀវខ្ចីនៃរុក្ខជាតិស្មៅក្នុងបរិវេណអង្គរ។ ពួកគាត់ថា វាពិតជាមិនខកបំណងឡើយ ដែលពួកគាត់បានចំណាយពេលដើម្បីមករង់ចាំទស្សនាថ្ងៃរះនៅប្រាសាទអង្គរវត្ត។
ដោយឡែក អ្នកទេសចរអន្ដរជាតិដែលបានមកទស្សនា ក៏បានបង្ហាញអារម្មណ៍ភ្ញាក់ផ្អើល និងសប្បាយចិត្ដយ៉ាងខ្លាំង ពេលមកដល់ប្រាសាទអង្គរ ដោយបានលើកឡើងថា ព្រះអាទិត្យរះចំកណ្ដាលកំពូលប្រាសាទ ពិតជាអស្ចារ្យ និងមានភាពស្រស់ស្អាត ដែលប្រទេសដទៃទៀតមិនអាចប្រៀបផ្ទឹមបាន។ នេះជាលើកទីមួយហើយដែលគាត់បានមកប្រទេសកម្ពុជា ហើយមានប្រជាពលរដ្ឋច្រើនកុះករមកទស្សនាថ្ងៃរៈនាពេលព្រឹកព្រលឹម៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
