នៅព្រឹកថ្ងៃទី២១ ខែមីនា ឆ្នាំ២០២៤នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានធ្វើការប្រកាសបិទផ្សាយជាសាធារណៈនូវឯកសារនៃការវិនិច្ឆ័យជូនបងប្អូនប្រជាលរដ្ឋធ្វើការពិនិត្យ និងកែតម្រូវ ក្នុងឃុំចំនួន២ គឺឃុំកំពង់ភ្លុក និងឃុំកណ្តែក ស្រុកប្រាសាតបាគង ខេត្តសៀមរាប។
លោក សូរ ប្លាតុង អភិបាលស្រុកប្រាសាទបាគង បានបញ្ជាក់ថា យោងតាមផែនទីឧបសម្ព័ន្ធផ្ទៃដីតំបន់៣ ដែលបានកែសម្រួលមកជាតំបន់១ មានចំនួន ១៣៥,៤១ហិកតា និងផ្ទៃដីដែលបានកាត់ឆ្កៀលពីតំបន់៣ មកតំបន់២ មានចំនួន ១៥៤៧,៤៧ហិកតាក្បាលដី ក្នុងនោះសម្រាប់ស្រុកប្រាសាទបាគង មានក្បាលដីតំបន់៣ ក្នុងឃុំចំនួន២ គឺ ឃុំកំពុងភ្លុក និងឃុំកណ្តែក។ ចំពោះការបិទផ្សាយជាសាធារណៈនូវឯកសារនៃការវិនិច្ឆ័យនាពេលនេះមានរយៈពេល ១៥ថ្ងៃ ចាប់ពីថ្ងៃបិទផ្សាយនេះតទៅ ដោយតម្រូវឱ្យបងប្អូនជាម្ចាស់ដី ឬអ្នកកាន់កាប់ដី ចូលរួមពិនិត្យផ្ទៀងផ្ទាត់មើលទិន្នន័យនេះឱ្យបានគ្រប់ៗគ្នា ឬធ្វើការកែតំរូវ ឬជំទាស់តវ៉ាបានក្នុងករណីដែលពិនិត្យមើលទៅឃើញថា មានកំហុសឆ្គងនោះអាចមកជួបជាមួយគណៈកម្មការរដ្ឋបាល ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនប័ត្រសម្គាល់ម្ចាស់អចលនវត្ថុជូនបងប្អូន។
លោក ស៊ុន សុជាតិ អនុមន្ទីររៀបចំដែនដីខេត្តសៀមរាប មានប្រសាសន៍ថា ខេត្តសៀមរាបជាខេត្តមួយ ក្នុងចំណោមខេត្តអទិភាពទាំង ២៥រាជធានី-ខេត្ត ដែលត្រូវបានអនុវត្តការចុះបញ្ជីដីធ្លីមានលក្ខណៈជាប្រព័ន្ធរបស់កម្មវិធីអនុវិស័យរដ្ឋបាលដីធ្លី ដែលគាំទ្រថវិកាដោយរាជរដ្ឋាភិបាលកម្ពុជា ក្រោមការដឹកនាំរបស់ក្រសួងរៀបចំដែនដី នគរូបនីយកម្ម និងសំណង់ អនុវត្តការងារដោយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប ដោយមានកិច្ចសហការពីអាជ្ញាធរដែនដី ជាពិសេសតាមការចង្អុលបង្ហាញរបស់គណៈអភិបាលខេត្តសៀមរាប។ លោកបានណែនាំដល់បងប្អូនប្រជាពលរដ្ឋទាំងអស់ជាម្ចាស់ដី ឬ/និងអ្នកពាក់ព័ន្ធ សូមមកពិនិត្យ និងផ្ទៀងផ្ទាត់ឲ្យបានគ្រប់គ្នា ដោយមើលទីតាំងដី និងរូបរាងដី នៅលើប្លង់សុរិយោដី និងត្រូវពិនិត្យមើលឈ្មោះ សាវតា ទំហំដី និងប្រភេទទ្រព្យ នៅក្នុងបញ្ជីឈ្មោះម្ចាស់ដីជាដើម៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
