ការដាក់ដេញថ្លៃគម្រោងសាងសង់ផ្លូវបេតុងអាមេមួយខ្សែ ក្នុងសង្កាត់សាលាកំរើក ក្រុងសៀមរាប ត្រូវបានប្រកាសបិទបញ្ចប់ការដេញថ្លៃជាស្ថាពរ នៅព្រឹកថ្ងៃទី២២ ខែមីនា ឆ្នាំ២០២៤នេះ ដោយមានអ្នកពាក់ព័ន្ធចូលរួមជាច្រើនរូប។
លោក សាម ឡន ប្រធានគណៈកម្មការលទ្ធកម្មសង្កាត់សាលាកំរើក ក្រុងសៀមរាប បានឲ្យដឹងថា សម្រាប់គម្រោងមូលនិធិសង្កាត់ឆ្នាំ២០២៤នេះ សង្កាត់សាលាកំរើក បានដាក់ដេញថ្លៃគម្រោងសាងសង់ផ្លូវបេតុងអាមេមួយខ្សែ ដែលមានប្រវែង ១៨២ម៉ែត្រ ទទឹង ៤.៥ម៉ែត្រ កម្រាស់ ០.១៥ម៉ែត្រ និងក្រាលគ្រួសក្រហមស្មាផ្លូវសងខាង ០.២៥ម៉ែត្រ ស្លាកគម្រោង១ និងស្លាកចរាចរណ៍ចំនួន២ ក្នុងតម្លៃប៉ាន់ស្មាន ១០៧.៥៥២.២៣៩រៀល ដោយមានក្រុមហ៊ុនម៉ៅការដាក់សំណើរចំនួន ១៣ក្រុមហ៊ុន។ ជាលទ្ធផលបានទៅលើក្រុមហ៊ុន អំ ឡូ ក្នុងតម្លៃ ៤៩.៧៩៥.២០០រៀល។
ក្នុងនោះលោក សាម ឡន ក៏បានណែនាំដល់ក្រុមហ៊ុនម៉ៅការដែលទទួលបានគម្រោងនេះ ត្រូវអនុវត្តឲ្យបានត្រឹមត្រូវទៅតាមក្បួនច្បាប់ និងស្តង់ដាបច្ចេកទេសនៃការសាងសង់ ជាពិសេសធ្វើយ៉ាងណាត្រូវពន្លឿនការសាងសង់ឲ្យបានលឿនតាមពេលវេលាដែលបានកំណត់នៅក្នុងកិច្ចសន្យា ដើម្បីឲ្យបងប្អូនប្រជាពលរដ្ឋមានភាពងាយស្រួលក្នុងការធ្វើដំណើរឆ្លងកាត់។
ក្រោយការដេញថ្លៃ តំណាងក្រុមហ៊ុន អំ ឡូ ដែលទទួលបានការម៉ៅការចំពោះគម្រោងសាងសង់ផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងធ្វើឲ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុន គីន
កែសម្រួល៖ លោក អ៊ុន ណារាជ្យ
