នៅថ្ងៃទី២២ ខែមីនា ឆ្នាំ២០២៤ មន្ទីរអភិវឌ្ឍន៍ជនបទខេត្តសៀមរាប និងរដ្ឋបាលស្រុក គាំទ្រថវិកាពីអង្គការលោកខាងលិចជួបលោកខាងកើត(អ៊ីសមីតវេសត៍)បានសហការរៀបចំទិវាទឹកពិភពលោកលើកទី៣១ ក្រោមប្រធានបទ “ជំរុញការប្រើប្រាស់ទឹកដើម្បីសន្តិភាព និងភាពរីកចម្រើន” នៅសាលាបឋមសិក្សា ទៀ បាញ់គំរូ ស្រុកពួក ខេត្តសៀមរាប ដើម្បីលើកកម្ពស់ការយល់ដឹងអំពីការប្រើប្រាស់ប្រព័ន្ឋផ្គត់ផ្គង់ទឹកនិងអនាម័យធន់នឹងអាកាសធាតុប្រកបដោយបរិយាបន្ន និងដើម្បីចលនាធនធានសម្រាប់ការការពារប្រភពទឹក និងការលើកកម្ពស់ការប្រើប្រាស់ទឹក និងបង្គន់អនាម័យធន់នឹងអកាសធាតុប្រកបដោយបរិយាបន្ននៅក្នុងសហគមន៍។
លោក គឹម ហ៊រ ប្រធានអង្គការលោកខាងលិចជួបលោកខាងកើត មានប្រសាសន៍ថា ទិវាទឹកពិភពលោកផ្តោតការយកចិត្តទុកដាក់លើវិបត្តិទឹកស្អាត និងអនាម័យនិងលើកកម្ពស់ការយល់ដឹងដល់ប្រជាពលរដ្ឋដែលពុំទាន់ទទួលបានសេវាផ្គត់ផ្គង់ទឹកស្អាត និងអនាម័យ។ តាមរយៈការសហការគ្នាលើវិស័យផ្គត់ផ្គង់ទឹក និងអនាម័យយើងអាចធ្វើឱ្យមានតុល្យភាពតម្រូវការទឹក និងអនាម័យសម្រាប់មនុស្សគ្រប់គ្នា និងជួយឱ្យមានស្ថេរភាព។ នៅពេលយើងគ្រប់គ្រងការបម្រែបម្រួលអាកាសធាតុ យើងត្រូវដាក់ការសហការគ្នាលើវិស័យផ្គត់ផ្គង់ទឹក និងអនាម័យជាអាទិភាពក្នុងផែនការរបស់យើងពីព្រោះការប្រឹងប្រែងរួមគ្នានាំឱ្យសម្រេចផែនការបានលឿននិងមានប្រសិទ្ឋិភាព និងចាកចេញពីវិបត្តិដោយសារបញ្ហាទឹកនិងអនាម័យ។
លោក ទូច ម៉ាឡា ប្រធានមន្ទីរអភិវឌ្ឍន៍ជនបទខេត្ត បានឲ្យដឹងថា បញ្ហាផ្នែកការផ្គត់ផ្គង់ទឹកស្អាតដែលមន្ទីរកំពុងជួបប្រទះ គឺការយល់ដឹងរបស់ប្រជាពលរដ្ឋក្នុងការគ្រប់គ្រង និងប្រើប្រាស់ទឹកស្អាតនៅមានកម្រិត តំបន់ខ្លះក្នុងខេត្តជាតំបន់ប្រឈម ពោលគឺកង្វះប្រភពទឹកក្រោមដី ការគាំទ្រផ្នែកថវិកានៅមានកម្រិតនៅឡើយ ដែលមិនទាន់អាចឆ្លើយតបទៅនឹងតម្រូវការដែលមានច្រើន។ បញ្ហាប្រឈមសំខាន់ទៀតនោះគឺ កង្វះការគាំទ្រសម្រាប់ប្រជាពលរដ្ឋដែលមានខ្នងផ្ទះរស់នៅលើកគោក៦ខែទឹក៦ខែនិងរស់នៅលើទឹកជាប្រចាំ ដែលជាអត្រានៃការប្រើប្រាស់បង្គន់នៅមានកម្រិតទាបខ្លាំង ស្របជាមួយនឹងការគាំទ្រថវិកាសម្រាប់ការលើកម្ពស់អនាម័យជនបទក៏នៅមានកម្រិតនៅឡើយដែរ។
លោក សំកុល សុចិត្រា អភិបាលរងខេត្តសៀមរាប មានប្រសាសន៍ថា រដ្ឋបាលខេត្តបានកំពុងយកចិត្តទុកដាក់យ៉ាងខ្លាំងក្នុងការជំរុញការអភិវឌ្ឍនានា នៅតាមមូលដ្ឋានសំដៅកាត់បន្ថយភាពក្រីក្រស្របតាមគោលនយោបាយរបស់រាជរដ្ឋាភិបាលកម្ពុជា។ ក្នុងនោះការផ្គត់ផ្គង់ទឹកស្អាត និងការលើកកម្ពស់អនាម័យជនបទ គឺជាផ្នែកមួយយ៉ាងសំខាន់ដែលរដ្ឋបាលខេត្តកំពុងយកចិត្តទុកដាក់ ពោលគឺធ្វើយ៉ាងណាឱ្យការផ្គត់ផ្គង់ផ្នែកនេះបានទៅដល់ដៃប្រជាពលរដ្ឋ និយាយជារួមគឺការសម្រេចឱ្យបាននូវទស្សនៈវិស័យនៅឆ្នាំ២០២៥ ប្រជាជនគ្រប់រូបនៅសហគមន៍ជនបទត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព។
លោក អភិបាលរងខេត្តបានអំពាវនាវដល់ក្រសួងពាក់ព័ន្ឋ និងអង្គការដៃគូរនានា ដែលបាននិងកំពុងតែអនុវត្តការងារទឹកស្អាត និងអនាម័យ ព្រមទាំងវិស័យផ្គត់ផ្គង់ទឹកស្អាតឯកជន បន្តសកម្មភាពរបស់ខ្លួនដើម្បីឆ្លើយតបតម្រូវការទឹក និងអនាម័យ ឆ្ពោះទៅសម្រេចគោលដៅអភិវឌ្ឍប្រកបដោយចីរភាពនៅឆ្នាំ២០៣០ សម្រេចបាន១០០%៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
