នៅថ្ងៃទី២៤ ខែមីនា ឆ្នាំ២០២៤ សប្បុរសជនមកពីវិទ្យាល័យអ៊ូវេដា ខេត្តណាកាណុ ប្រទេសជប៉ុន បានធ្វើទស្សនកិច្ចសិក្សា និងនាំយកអំណោយជាសម្ភារៈសិក្សាមួយចំនួន ចែកជូនដល់សិស្សានុសិស្សនៃសាលាបឋមសិក្សាក្រសាំងរំលើង និងជួយជួសជុលផ្ទះមួយខ្នងជូនគ្រួសារពលរដ្ឋមានជីវភាពខ្វះខាតស្ថិតក្នុងភូមិក្រសាំងរលើង សង្កាត់សៀមរាប ក្រុងសៀមរាប។ ខេត្តសៀមរាប តាមរយៈការសម្របសម្រួលពីលោកស្រី សំ សូរីកា និងរដ្ឋបាលសង្កាត់សៀមរាប ព្រមទាំងព្រះតេជគុណ ភ្លឿន រដ្ឋ ព្រះគ្រូសូធ្យស្តាំវត្តអធ្វាផងដែរ។
តំណាងក្រុមសប្បុរសជន លោក មីយ៉ាស៊ីតា (Miyashita) បានឲ្យដឹងថា នេះជាលើដំបូងសម្រាប់ពួកគាត់ក្នុងការធ្វើដំណើរមកកាន់ខេត្តសៀមរាប ដើម្បីទស្សនកិច្ចសិក្សាស្វែងយល់អំពីវប្បធម៌ប្រពៃណី ទំនៀមទំលាប់ និងជីវភាពរស់នៅរបស់ប្រជាពលរដ្ឋកម្ពុជា និងធ្វើការងារសប្បុរសធម៌ទៅតាមលទ្ឋភាពដែលអាចធ្វើបានក្នុងគម្រោងសប្បុរសធម៌ដូចជាផ្តល់សម្ភារៈសិក្សា សាងសង់លំនៅឋាន ជីកអណ្តូងទឹកនៅទីណាដែលខ្វះទឹកប្រើប្រាស់ ជូនដល់សាលា ឬគ្រួសារដែលមានជីវភាពខ្វះខាតជាក់ស្តែង។
លោក ម៉ៃសាមេត ចៅសង្កាត់សៀមរាប បានថ្លែងអំណរគុណដល់សប្បុរសជនជប៉ុន ដែលតែងតែគៀងគរដល់សប្បុរសជនជប៉ុនមកជួយដល់ កុមារកំព្រា គ្រួសារខ្វះខាត ជួសជុលកែលំអសាលារៀន ទីអារាម ក្នុងមូលដ្ឋាននេះជាច្រើនលើក។ លោកថា រដ្ឋាភិបាល និងប្រជាជនជប៉ុន បានដើរតួយ៉ាងសំខាន់ក្នុងការជួយគាំទ្រ ឧបត្ថម្ភ និងអភិវឌ្ឍសង្គមជាតិយើងជាបន្តបន្ទាប់តាំងសម័យសង្គមរាស្ត្រនិយមមកដល់សព្វថ្ងៃ។ ទាំងអស់នេះជាទឹកចិត្តសប្បុរសធម៌ដ៏ថ្លៃថ្លាមិនអាចកាត់ថ្លៃបានដែលយើងទាំងអស់គ្នាត្រូវចាំទុកក្នុងក្រអៅបេះដូង។ លោកចៅសង្កាត់ និងនាយកសាលាបឋមសិក្សាក្រសាំងរលើង បានសំណូមពរឱ្យសប្បុរសជនជួយសាងសង់ទីលានវាយបាល់បោះដើម្បីបានជាប្រយោជន៍ដល់សិស្សបានចូលរួមលេង ហាត់ហ្វឹកហ្វឺនសម្រាប់សុខភាពផង និងសម្រាប់ប្រកួតក្នុងក្របខ័ណ្ឌសាលា និងសាលាផង។
លោកស្រី សំ សូរីកា ដែលជាអ្នកសម្របសម្រួលកម្មវិធីនេះ បានទទួលយកសំណូមពរនេះ និងបានចង្អុលបង្ហាញឱ្យលោកនាយកសាលាត្រៀមទីតាំង និងវាយតម្លៃការចំណាយឱ្យបានច្បាស់លាស់ ដើម្បីយកទៅបង្ហាញជូនសប្បុរសជនៗនឹងជូនដំណឹងនៅពេលក្រោយៗទៀត។ ក្នុងនាមសប្បុរសជន និងជាអ្នកគៀងគរសប្បុរសជន លោកស្រីពេញចិត្តនឹងជួយជ្រោមជ្រែងផ្សព្វផ្សាយទៅដល់សប្បុរសជននៅប្រទេសជប៉ុន និងនាំពួកគាត់មកផ្ទាល់ ដើម្បីបានឃើញពីស្ថានភាពជាក់ស្តែង ជាពិសេសវិស័យសិក្សានៅតាមមូលដ្ឋានសំដៅរួមគ្នាលុបបំបាត់ភាពអវិជ្ជារបស់យុវជនខ្មែរយើង។ លោកស្រីក៏បានឲ្យដឹងថា គិតពីឆ្នាំ១៩៩១ មកដល់សព្វថ្ងៃលោកស្រីបានធ្វើការងារមនុស្សធម៌ជាមួយសប្បុរសជនជនជាតិជប៉ុនជួយសាងសង់អណ្តូងទឹកបានចំនួន ៨៤០អណ្តូង និងបានជួយកសាងជួសជុលកែលំអហេដ្ឋារចនាសម្ព័ន្ឋសាលារៀន វត្តអារាម ផ្តល់សម្ភារៈសិក្សាដល់សិស្ស ព្រមទាំងបានជួយឧបត្ថម្ភស្បៀងអាហារសម្ភារៈប្រើប្រាស់ ដល់គ្រួសារមានការលំបាកក្នុងជីវភាព ក្មេងកំព្រាជាច្រើន នៅក្នុងខេត្តសៀមរាប តាមរយៈការសហការជាមួយអាជ្ញាធរដែនដី និងទទួលការគាំទ្រពីសប្បុរសជននានា៕
អត្ថបទ និងរូពភាព៖ លោក យូ វង្ស
កែសម្រួល៖ លោក អ៊ុន ណារាជ្យ
