ក្រុមការងារគណ:កម្មការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ចហិរញ្ញវត្ថុ នៅព្រឹកថ្ងៃទី២៥ ខែមីនា ឆ្នាំ២០២៤នេះ បានចុះធ្វើការពិនិត្យ វាយតម្លៃ និងដាក់ឲ្យប្រើប្រាស់ផ្លូវក្រាលដីល្បាយគ្រួសមួយខ្សែ បន្ទាប់ពីបញ្ចប់ការងារស្ដារឡើងវិញ ក្រោយពីរងការខូចខាតដោយទឹកជំនន់កាលពីពេលកន្លងទៅ ស្ថិតក្នុងស្រុកជីក្រែង ខេត្តសៀមរាប។
ឯកឧត្តម ទ្រី មេង រដ្ឋលេខាធិការក្រសួងអភិវឌ្ឍន៍ជនបទ បានឲ្យដឹងថា ផ្លូវមួយខ្សែនេះ មានប្រវែង៧គីឡូម៉ែត្រ ទទឹង៧ម៉ែត្រ សាងសង់លូមូលមុខពីរចំនួន១កន្លែង និងលូមូលមុខមួយចំនួន៣កន្លែង និងផ្លាកឈ្មោះចំនួន២កន្លែង ឆ្លងកាត់ភូមិចំនួន២ គឺភូមិចំបក់ខ្ពស់ និងភូមិរូងថ្មី ក្នុងឃុំល្វែងឬស្សី ស្រុកជីក្រែង ខេត្តសៀមរាប។ ផ្លូវក្រាលដីល្បាយគ្រួសនេះ អនុវត្តដោយនាយកដ្ឋានវិស្វកម្មក្រសួងការពារជាតិ ប្រើប្រាស់ថវិការបស់រាជរដ្ឋាភិបាល តាមរយៈក្រសួងអភិវឌ្ឍន៍ជនបទ។
ជុំវិញការចុះពិនិត្យ និងវាយតម្លៃលើការងារស្ដារផ្លូវនេះ ឯកឧត្តមបញ្ជាក់ថា ផ្លូវមួយខ្សែនេះពិតជាមានសារៈសំខាន់ណាស់ សម្រាប់ប្រជាពលរដ្ឋនៅមូលដ្ឋានក្នុងការដឹកជញ្ជូនទំនិញដំណាំកសិកម្មគ្រប់ប្រភេទរបស់ប្រជាពលរដ្ឋនៅជនបទ។ ជាពិសេសការធ្វើដំណើររបស់សិស្សានុសិស្ស ទៅសាលារៀន ពោលការអភិវឌ្ឍន៍ហេដ្ឋារចនាសម្ព័ន្ធនៅតាមមូលដ្ឋាន ដែលស្ថិតនៅក្រោមក្របខ័ណ្ឌក្រសួងអភិវឌ្ឍន៍ជនបានកំពុងតភ្ជាប់ប្រទាក់ក្រឡាគ្នាទៅកាន់តំបន់ផ្សេងៗដែលជាការខិតខំរបស់រាជរដ្ឋាភិបាល។ ឯកឧត្តម ក៏បានអំពាវនាវដល់អាជ្ញាធរមូលដ្ឋាន និងប្រជាពលរដ្ឋ សូមចូលរួមថែរក្សាផ្លូវនេះឲ្យបានល្អសម្រាប់អនាគតវែងឆ្ងាយ ហើយហាមដឹកជញ្ជូនទំនិញធនធ្ងន់លើសចំនួនកំណត់ដែលធ្វើឲ្យផ្លូវងាយរងគ្រោះ។
ប្រជាពលរដ្ឋរស់នៅក្នុងំុលដ្ឋានខាងលើ បានសម្ដែងការសាទរ និងសប្បាយរីករាយ ព្រោះផ្លូវមួយខ្សែនេះ ជាសរសៃឈាមសម្រាប់ប្រជាពលរដ្ឋធ្វើដំណើរ ព្រោះកន្លងមកមានការលំបាកធ្វើដំណើរដោយសារផ្លូវនូវការខូចខាតដោយទឹកជំនន់។ ពួកគាត់បានថ្លែងអំណរគុណដល់រាជរដ្ឋាភិបាល ជាពិសេសក្រសួងអភិវឌ្ឍន៍ជនបទ ដែលបានស្ដារផ្លូវដីគ្រួសល្បាយនេះឡើវិញង សម្រាប់ឲ្យប្រជាពលរដ្ឋងាយស្រួលធ្វើដំណើរ ដែលបានបង្ហាញថា រាជរដ្ឋាភិបាលមានការយកចិត្ដទុកដាក់ដល់ប្រជាពលរដ្ឋគ្រប់ទីកន្លែងមិនថា ទីក្រុងឬជនបទ៕
អត្ថបទ និងរូពភាព៖ លោក បូ សាវី
កែសម្រួល៖ លោក អ៊ុន ណារាជ្យ
