មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានជំរុញដល់ក្រុមការងារ និងអាជ្ញាធរមូលដ្ឋាន រួមនឹងស្ថាប័នពាក់ព័ន្ធ ត្រូវសហការគ្នាធ្វើការជម្រះនូវរាល់បញ្ហាសេសសល់ និងជម្រុញការអនុវត្តនូវផែនការថ្មីរបស់រាជរដ្ឋាភិបាល ក្នុងការចុះបញ្ជីបញ្ចប់ សេវាទាន់ចិត្ត និងបរិយាកាសគ្មានវិវាទ ឲ្យបានរួចរាល់នៅឆ្នាំ២០២៥ ខណៈខេត្តសៀមរាប នៅសល់ក្បាលដីមិនទាន់ចុះបញ្ជីដីធ្លីប្រមាណ ៥សែនក្បាលដី ដោយអនុវត្តនៅដីផ្នែកខាងលើ និងដីផ្នែកខាងក្រោមក្នុងតំបន់៣ តំបន់២ នៃបឹងទន្លេសាប។
នេះបើតាមការលើកឡើងរបស់ឯកឧត្តម សរ សុវណ្ណ រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារសិក្សា ពិនិត្យ និង ចុះបញ្ជីដីពាក់ព័ន្ធបុរាណដ្ឋានក្នុងភូមិសាស្ត្រខេត្តសៀមរាប ក្នុងកិច្ចប្រជុំក្រុមការងារសិក្សា ពិនិត្យ និងចុះបញ្ជីដីពាក់ព័ន្ធបុរាណដ្ឋាន ក្នុងភូមិសាស្ត្រខេត្តសៀមរាប នៅសាលាខេត្តសៀមរាប នាព្រឹកថ្ងៃទី២៥ ខែមីនា ឆ្នាំ២០២៤នេះ ដោយមានការចូលរួមពីអ្នកពាក់ព័ន្ធជាច្រើនរូប។
លោក ហ៊ី សាយ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តសៀមរាប បានបញ្ជាក់ថា ការងារចុះបញ្ជីដីធ្លីនៅទូទាំងខេត្តសៀមរាប ទិន្នន័យដីធ្លីប៉ះពាល់បុរាណដ្ឋានទូទាំងខេត្តមានចំនួន១៩ពាន់ក្បាលដី ហើយនិយាយដោយឡែកក្នុងក្រុងសៀមរាប ដែលមន្ទីរទទួលបានទិន្នន័យបុរាណដ្ឋានពីអាជ្ញាធរជាតិអប្សរាចំនួន៣២៦ទីតាំងបុរាណដ្ឋាន ក្នុងសង្កាត់ទាំង១២ ។ ក្នុងនោះបុរាណដ្ឋាន ៤៥ទីតាំងស្ថិតក្នុងតំបន់២ និងតំបន់៣ នៃអាជ្ញាធរបឹងទន្លេសាប ដែលបច្ចុប្បន្នកំពុងវាស់វែងប្រមូលទិន្នន័យ និង ២៨១ទីតាំងទៀត ស្ថិតក្នុងតំបន់អនុវត្តនីតិវិធីចុះបញ្ជីដីធ្លីមានលក្ខណៈជាប្រព័ន្ធរួច មានប្រជាពលរដ្ឋកាន់កាប់ជាន់លើបុរាណដ្ឋានចំនួន ៥.៦៧០ក្បាលដី ។
អភិបាលរងខេត្ត លោក លី សំរិទ្ធ បានបញ្ជាក់ថា ការបង្កើតក្រុមការងារសិក្សា ពិនិត្យ និង ចុះបញ្ជីដីពាក់ព័ន្ធបុរាណដ្ឋាន ក្នុងភូមិសាស្ត្រខេត្តសៀមរាប ជាការបង្កើតយន្តការសម្រាប់ដោះស្រាយបញ្ហាដែលនៅសេសសល់ ក្នុងភូមិសាស្ត្រខេត្តសៀមរាប ដែលពាក់ ព័ន្ធទៅនឹងដីធ្លីបុរាណដ្ឋាន។ ម៉្យាងទៀតកិច្ចប្រជុំនេះ និងកំណត់បាននូលក្ខណៈវិនិច្ឆ័យមួយដ៏សុក្រឹត្យ សម្រាប់ដោះស្រាយបញ្ហា ពុះបំបែករាល់បញ្ហាប្រឈមទាំងឡាយដែលនៅសេសសល់កន្លងមក ត្រូវធ្វើឲ្យបានចប់សព្វគ្រប់នៅតាមក្រុងស្រុក ជាសំខាន់នៅក្រុងសៀមរាប។ ក្នុងនាមអាជ្ញាធរខេត្ត លោកក៏បានធ្វើការគាំទ្រ និងត្រៀមគ្រប់លក្ខណៈក្នុងកិច្ចសហប្រតិបត្តិការ ដើមី្បដោះស្រាយរាល់បញ្ហាទាំងនេះ។
ឯកឧត្តម សរ សុវណ្ណ មានប្រសាសន៍ថា គ្រប់ស្ថាប័ន និងអាជ្ញាធរ គឺយើងត្រូវរួមគ្នាគិត រួមគ្នាធ្វើ រួមគ្នាទទួលខុសត្រូវ រួមគ្នាទទួលផល។ រាជរដ្ឋាភិបាលបានយកចិត្តទុកដាក់ខ្ពស់ ក្នុងការគិតគួរបងប្អូនមានផលប៉ះពាល់បុរាណដ្ឋានចំនួន៥.៦៧០ក្បាលដី នៅក្រុងសៀមរាប។ ចំពោះកិច្ចប្រជុំនេះដែរ គឺដើមី្បរឹៈរកនូវដំណោះស្រាយក្នុងការដោះស្រាយជូនប្រជាពលរដ្ឋ ជាពិសេសដីដែលប៉ះពាល់បុរាណដ្ឋានមានចំនួន១៩ពាន់ក្បាលដី នៅក្នុងតំបន់វិនិច្ឆ័យ។ ចំពោះយុទ្ធនាការនេះ សំដៅក្នុងការចុះបញ្ជីដីបញ្ចប់, សេវាទាន់ចិត្ត និង បរិយាកាសគ្មានវិវាទ ដោយដីនៅព្រះរាជាណាចក្រកម្ពុជាទាំងអស់ ត្រូវរួមគ្នាបញ្ចប់ការចុះបញ្ជីឲ្យអស់។ រាល់សកម្មភាពការចុះបញ្ជីដីធ្លីនៅទូទាំងប្រទេស ជាលទ្ធផល បានចំនួន ៧លាន ៣សែនក្បាលដី ដោយមានការចូលរួមគ្រប់បណ្តារាជធានីខេត្ត ហើយនិយាយដោយឡែកនៅខេត្តសៀមរាប ការចុះបញ្ជីដីធ្លីបានប្រមាណ ៣០ម៉ឺនក្បាលដីផងដែរ។
ឯកឧត្តមបានគូសបញ្ជាក់ថា ការចុះបញ្ជីដីធ្លីនេះ គឺសេវាគាប់ចិត្ត សេវាចុះបញ្ជីដីធ្លីប្រកបដោយតម្លាភាព ធ្វើឲ្យអ្នកទទួលសេវាមានការជឿទុកចិត្ត សេវាសុវត្ថិភាព។ ម៉្យាងទៀតសូមក្រុមការងារ និងអាជ្ញាធរមូលដ្ឋាន ធ្វើយ៉ាងណាឲ្យប្រជាពលរដ្ឋ មានភាពកក់ក្តៅ ជឿជាក់លើការដឹងនាំរបស់រាជរដ្ឋាភិបាល ព្រមទាំងការចុះបញ្ជីដីធ្លីបញ្ចប់នូវរាល់វិវាទ។ ឯកឧត្ដមបន្តថា ការសម្របសម្រួលដោះស្រាយទំនាស់ដីធ្លីជូនប្រជាពលរដ្ឋ ជាយន្តការមួយដ៏មានសារ:សំខាន់សម្រាប់សង្គម និងប្រជាពលរដ្ឋ និងជាលទ្ធផលនយោបាយឈ្នះឈ្នះ នៃសម័យប្រទេសកំពុងមានសុខសន្តិភាព និងការអភិវឌ្ឍពេញលេញ ប្រកបដោយបរិយាប័ន្ន និងសមធម៌ សន្តិភាព អនុញ្ញាតឲ្យមានកាលានុវត្តភាព ក្នុងនូវការកាត់បន្ថយវិវាទ ដើម្បីការអភិវឌ្ឍសង្គមជាតិ៕
អត្ថបទ និងរូពភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
