កម្មវិធីអភិវឌ្ឍវិស័យអប់រំកាយ និងកីឡា គឺជាការអភិវឌ្ឍនូវការងារអប់រំកាយ និងកីឡាឲ្យទៅជាចំណុចស្នូលនៃកំណែទម្រង់ និងលើកកម្ពស់សុខភាព សមត្ថភាពជំនាញ បច្ចេកទេសអប់រំកាយ និងកីឡារបស់សិស្ស និស្សិត យុវជន និងមហាជនប្រកបដោយគុណភាព និងប្រសិទ្ធិផលខ្ពស់ក្នុងការប្រកួតជាលក្ខណៈជាតិ និងអន្តរជាតិ ព្រមទាំងចូលរួមអភិវឌ្ឍសង្គម វប្បធម៌ និងសេដ្ឋកិច្ចជាតិ។
ក្នុងឱកាសប្រារព្ធធ្វើទិវាអប់រំកាយ និងកីឡានៅសាលាបឋមសិក្សាមុខនាគ ក្រុងសៀមរាប នាព្រឹកថ្ងៃទី២៩ ខែមីនា ឆ្នាំ២០២៤នេះ លោកស្រី ប៉ាវ ស៊ីណាង នាយិការសាលាបឋមសិក្សាមុខនាគ បានបញ្ជាក់ថា ការប្រារព្ភទិវាអប់រំកាយ និងកីឡានាពេលនេះ ក្នុងគោលបំណងក្រើនរំលឹកដល់សិស្សានុសិស្ស និងមាតាបិតា អាណាព្យាបាលសិស្សឲ្យកាន់តែបានយល់ច្បាស់ពីសារៈប្រយោជន៍ នៃការអប់រំកាយ និងការលេងកីឡា ដែលធ្វើឲ្យសារពាង្គកាយរបស់កុមារមានការរីកលូតលាស់ល្អ សុខភាពមាំមួន ប្រាជ្ញាឈ្លាសវៃ និងចេះចូលរួមធ្វើការចែករំលែកគ្នា មានការអធ្យាស្រ័យគ្នាទៅវិញទៅមក។ ម៉្យាងទៀតធ្វើឲ្យពួកគាត់មានទម្លាប់ចេះធ្វើការងាររួមគ្នា សហការគ្នាល្អជាក្រុមល្អ ស្គាល់ពីសុខទុក្ខលំបាកពីគ្នាទៅវិញទៅមក ស្របទៅនឹងយុវជនម្នាក់ចេះកីឡាមួយ ហើយនៅក្នុងសាលាកុមារម្នាក់ត្រូវមានជំនាញអប់រំកាយមួយផងដែរ។
លោកស្រី ប៉ាវ ស៊ីណាង បានគូសបញ្ជាក់ថា ដើមី្បធ្វើការឆ្លើយតបទៅនឹងគោលនយោបាយ និងយុទ្ធសាស្រ្តក្នុងផែនការយុទ្ធសាស្រ្តវិស័យអប់រំ គឺធានាលទ្ធភាពទទួលបានសេវាអប់រំប្រកបដោយសមធម៌ និងពង្រឹង និងពង្រីកហេដ្ឋារចនាសម្ព័ន្ធកីឡាគ្រប់ប្រភេទ និងគ្រប់កម្រិត។ ការលើកស្ទួយគុណភាពផ្នែកសុខភាព កាយសម្បទា សីលធម៌ ស្មារតីទទួលខុសត្រូវ មានមនសិកាស្នេហាជាតិ និងវិជ្ជាជីវៈ ក៏ជាកត្តាសំខាន់ក្នុងការអភិវឌ្ឍប្រទេសជាតិ ហើយការគាំទ្រដល់ដំណើរការអប់រំឲ្យឆ្លើយតបទៅនឹងគោលដៅអភិវឌ្ឍន៍ប្រកបដោយចីរភាព តាមរយៈការអនុវត្តផែនការ យុទ្ធសាស្ត្រវិស័យអប់រំ និងយុទ្ធសាស្ត្រកំណែទម្រង់វិស័យអប់រំ យុវជន និងកីឡា ដែលត្រូវធានាឲ្យការគ្រប់គ្រងអប់រំ ដើម្បីលើកកម្ពស់ភាពជាពលរដ្ឋមានគុណភាពនៅកម្ពុជា ដោយចាប់ផ្ដើមគិតគូរពីអនុវិស័យអប់រំកុមារតូច រហូតដល់កម្រិតឧត្តមសិក្សា ក្រោយឧត្តមសិក្សា ទាំងក្នុងប្រព័ន្ធ និងក្រៅប្រព័ន្ធ ព្រមទាំងជួយគាំទ្រដល់ការងារអភិវឌ្ឍយុវជន និងការអភិវឌ្ឍវិស័យអប់រំកាយ និងកីឡា។
លោកស្រីនាយិការ បានបញ្ជាក់ថា ចំពោះវិស័យអប់រំសិក្សានៅសាលាបឋមសិក្សាមុខនាគ មានសិស្សានុសិស្សចូលមកសិក្សាមានចំនួន ៣.១៥៧នាក់ ស្រី ១.៥៣៣នាក់ និងមានគ្រូបង្រៀនសរុប ៨៦នាក់ ដែលមានថ្នាក់សរុប៧៤ថ្នាក់៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
