ថ្នាក់ដឹកនាំខេត្តជាច្រើនរូប ដែលជាអតីតសិស្សរួមជំនាន់សាលាមធ្យមសិក្សាកំរិត២ វត្តដំណាក់ និងមធ្យមសិក្សាកំរិត៣ ១០មករា កាលពីថ្ងៃចុងសប្ដាហ៍កន្លងទៅ បានរៀបចំកម្មវិធីជួបជុំជាមួយអតីតលោកគ្រូអ្នកគ្រូ បងប្អូនមិត្តភក្តិរួមជំនាន់ឌីប្លូម ឆ្នាំ១៩៨៥ និងបាក់ឌុប ឆ្នាំ១៩៨៨ រួមក្រុម បើកចិត្ត រក្សាមិត្តភាព លើកទី៦ ដើម្បីបង្ហាញពីការគោរព តបស្នងសងគុណដល់លោកគ្រូអ្នកគ្រូ ដែលបានធ្វើឡើងនៅសណ្ឋាគារ រី ខេត្តសៀមរាប។
ឯកឧត្តម តោ គឹមស៊ាន សមាជិកក្រុមប្រឹក្សាខេត្ត និងជាអតីតសាស្ត្រាចារ្យវិទ្យាល័យ ១០មករា ១៩៧៩ ថ្លែងថា ការជួបជុំគ្នានៅថ្ងៃនេះ គឺជាសំណាងដែលបានមកពីការដឹកនាំដ៏ឈ្លៀសវាងវៃ របស់សម្តេចតេជោ ហ៊ុន សែន ដែលសម្តេចមានទស្សនៈវិស័យវែងឆ្ងាយច្បាស់លាស់ ធ្វើឲ្យកម្ពុជាឆ្លងផុតពីគ្រោះមហន្តរាយនៃជំងឺឆ្លងកូវីដ-១៩ បានបើកប្រទេសឡើងវិញ។ ឯកឧត្តម បានសម្តែងនូវទឹកចិត្តរំភើបក្រៃលែង ចំពោះកូនៗជាអតីតសិស្សវិទ្យាល័យ១០មករា ទោះបីបានឃ្លាតទៅឆ្ងាយពីសាលា ៣៣ឆ្នាំមកនេះ ដោយកូនៗទទួលបាននូវចំណេះវិជ្ជា ដែលលោកគ្រូ អ្នកគ្រូ បានបង្ហាត់បង្ហាញ និង ចែករំលែកនូវចំណេះដឹងដែលគ្រូមាន ដោយមួយចំនួនបានក្លាយទៅជាពាណិជ្ជករ ម្ចាស់ក្រុមហ៊ុន ម្ចាស់សហគ្រា និងជាថ្នាក់ដឹកនាំនៅក្នុងជួរមន្ត្រីរាជការជាដើម។
ឯកឧត្តមបន្តថា ការរំលឹកដល់គុណគ្រូនេះ គឺជាកាយវិកាដ៏ល្អរបស់សិស្សជំនាន់ទី២ នៃវិទ្យាល័យ១០មករា ដែលនៅក្នុងរដ្ឋកម្ពុជា ហៅសាលាកំរិតសិក្សាទី៣ ដែលបានរៀបចំនូវកម្មវិធីនេះឡើង ក្នុងការរំលឹកនូវអនុស្សាវរីយ៍ក្នុងការសិក្សាពីឆ្នាំ១៩៨៥ដល់ ឆ្នាំ១៩៨៨ ទើបកូនៗទាំងអស់ បានទៅបន្តសិក្សានៅតាមមហាវិទ្យាល័យ សាកលវិទ្យាល័យមួយចំនួនផងដែរ។ ឯកឧត្តមថា ពេលនេះកូនៗបានក្លាយទៅជាធនធានមនុស្សមួយដ៏សំខាន់របស់សង្គមជាតិ ហើយបានកំពុងចូលរួមចំណែកក្នុងការកសាងនិងអភិវឌ្ឍន៍ប្រទេស ព្រមទាំងសូមឲ្យប្រពៃណី នៃការជួបជុំមិត្តរួមជំនាន់នៃអតីតសិស្សវិទ្យាល័យ១០មករានេះ ឲ្យមានជារៀងរាល់ឆ្នាំ ក្នុងការរំលឹកឡើងវិញពីយុវវ័យយុវសិស្សជាប់ឌីប្លូមឆ្នាំ១៩៨៥ និងបាក់ឌុបឆ្នាំ១៩៨៨ ឲ្យស្ថិតនៅក្នុងក្រអៅបេះដូងដល់យើងគ្រប់គ្នាផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
