នៅព្រឹកថ្ងៃទី១ ខែមេសា ឆ្នាំ២០២៤ ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ប្រាក់ សោភ័ណ អភិបាលខេត្ត បានដឹកនាំថ្នាក់ដឹកនាំ មន្ត្រីរាជទូទាំងខេត្តសៀមរាប រៀបចំធ្វើពិធីក្រុងពាលី និងនិមន្តព្រះសង្ឃចម្រើនព្រះបរិត ដើមី្បបួងសួងសុំនូវសេចក្តីសុខសប្បាយ នាឱកាសត្រៀមបើកដំណើរការព្រឹត្តិការណ៍ “សៀមរាបសង្ក្រាន្ត” ដែលនឹងប្រព្រឹត្តិទៅចាប់ពីថ្ងៃទី១៣-១៦ ខែមេសា ឆ្នាំ២០២៤ខាងមុខនេះ។
លោក សំកុល សុចិត្រា អភិបាលរងខេត្ត និងជាប្រធានសហភាពសហព័ន្ធយុវជនកម្ពុជាខេត្ត បានបញ្ជាក់ថា រដ្ឋបាលខេត្តសៀមរាប ក្រោមកិច្ចសហការជាមួយ សហភាពសហព័ន្ធយុវជនកម្ពុជាខេត្ត អាជ្ញាធរអប្សរា អាជ្ញាធរក្រុងស្រុក មន្ទីរស្ថាប័នជុំវិញខេត្ត នឹងរៀបចំព្រឹត្តិការណ៍ “សៀមរាបសង្ក្រាន” ជាលើកទី៣ ក្នុងគោលបំណងផ្តល់ឱកាសឲ្យយុវជន សាធារណជនខ្មែរទូទៅ បានចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិនៅលើទឹកដីប្រវត្តិសាស្ត្រសៀមរាប-អង្គរ ជាលក្ខណៈមហាគ្រួសារខ្មែរតែមួយ ជ្រកក្រោមដំបូលសន្តិភាពតែមួយ ក្រោមស្មារតីសុខដុម សប្បាយរីករាយ និងបានសិក្សាស្វែងយល់នូវភាពរុងរឿងនាសម័យមហានគរ ជាពិសេសការដឹកនាំប្រទេសឲ្យទទួលបានសន្តិភាព ពីសំណាក់សម្តេចតេជោ ហ៊ុន សែន និងបន្តអភិវឌ្ឍន៍ជាបន្តដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាពេលបច្ចុប្បន្ន។
ព័ត៌មានជាតិ ថ្មីៗ
លោកអភិបាលរងខេត្ត បញ្ជាក់ទៀតថា លោកបានបន្តទៀតថា ព្រឹត្តិការណ៍ “សៀមរាបសង្ក្រាន្ត” ឆ្នាំ២០២៤នេះ ធ្វើឡើងក្រោមប្រធានបទ “អភិរក្សមរតកខ្លែងឯកខ្មែរ” ដែលជាឱកាសដល់យុវជន ប្រជាពលរដ្ឋខ្មែរបានមកជួបជុំគ្នា ក្នុងនាមមហាគ្រួសារខ្មែរ ដើមី្បអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក្នុងថ្ងៃសម្រាកពីការងារដែលនឹងចូលមកដល់នៅថ្ងៃ ៥កើត ខែចេត្រ ព.ស២៥៦៧ ឆ្នាំរោង ឆស័ក ជាទេវត្តា ដែលមានព្រះនាម ព្រះនាងមហោទរាទេវី និងយាងចុះមកនៅវេលាម៉ោង២២ និង២៤នាទី នារាត្រីថ្ងៃទី១៣ ខែមេសា ឆ្នាំ២០២៤។ ព្រឹត្តិការណ៍ “សៀមរាបសង្ក្រាន្ត” ក៏នឹងផ្តល់ឱកាសឲ្យកម្ពុជា បានផ្សព្វផ្សាយលើកតម្កើងពីអរិយធម៌ វប្បធម៌ ទំនៀមទម្លាប់ ប្រពៃណីដ៏ផូរផង់របស់ប្រជាពលរដ្ឋខ្មែរយើង ជូនភ្ញៀវជាតិ អន្តរជាតិស្វែងយល់ ដើម្បីពង្រីកកិត្យានុភាពនៅក្នុងតំបន់ និងទៅលើពិភពលោកទៀតផងដែរ។ ហើយក្នុងព្រឹត្តិការណ៍នេះ នឹងមានរៀបចំនូវកម្មវិធីកម្សាន្តជាច្រើនកន្លែង មានដូចជាកម្មវិធីសាសនា ល្បែងប្រជាប្រិយ៍ សួនកុមារ ដែលរៀបចំឡើងនៅសួនព្រះរាជដំណាក់ តាមបណ្តោយដងស្ទឹងសៀមរាបទៅដល់ស្ពានវត្តដំណាក់។
លោកក៏បានសង្កត់ធ្ងន់ថា ព្រឹត្តិការណ៍ “សៀមរាបសង្ក្រាន្ត” បានក្លាយទៅជាវេទិកាពិសេសមួយ ក្នុងការចែករំលែកបទពិសោធន៍របស់មនុស្សជំនាន់មុន និងយុវជន ជំនាន់ក្រោយ ដែលជាយន្តការអភិរក្ស និងអភិវឌ្ឍវប្បធម៌ប្រពៃណីជាតិខ្មែរ។ ព្រឹត្តិការណ៍នេះក៏បានផ្តល់ឱកាសឲ្យខេត្តសៀមរាប ដែលសម្បូរទៅដោយរមណីដ្ឋានវប្បធម៌ ធម្មជាតិ សំខាន់ភ្នំគូលែន បឹងទន្លេសាប ព្រមទាំងរមណីយដ្ឋានកែច្នៃ នៅតាមសហគមន៍ និងបានធ្វើការផ្សព្វផ្សាយ លើកកម្កើនពីអរិយធម៌ វប្បធម៌ ព្រមទាំងស្នាដៃមរតកដ៏វិសេសវិសាលរបស់ខ្លួន នៅលើឆាកអន្តរជាតិទៀតផង។
សូមជំរាបថា ពិធីក្រុងពាលីនេះ បានធ្វើឡើងតាមបែបព្រហ្មញ្ញសាសនាសុទ្ធសាធ ដែលនៅក្នុងនោះរួមមាន ពិធីថ្វាយនូវគ្រឿងសក្ការៈ ពិធីថ្វាយគ្រឿងសក្ការៈទិសធំ ប្រកាសឧទ្ទីសបួងសួង និង ប្រគុំថ្វាយភ្លេងពិណពាធ ចំពោះបារមីវត្ថុស័ក្តសិទ្ធ ហើយដែលមួយផ្នែកនៃពិធីនេះ គឺបូជាព្រះភូមិ និងបូជាថ្វាយស្តេចក្រុងពាលី ដើមី្បសុំនូវសេចក្តីសុខ ក្នុងកិច្ចដំណើរការសៀមរាបសង្រ្កាន្ត នៅលើទឹកដីប្រវត្តិខេត្តសៀមរាប ឲ្យបានប្រព្រឹត្តទៅប្រកបដោយភាពសុខសាន្ត ជូនដល់ប្រជាពលរដ្ឋ ភ្ញៀវទេសចរណ៍ជាតិ អន្តរជាតិ បានសប្បាយរីករាយផងដែរ៕
អត្ថបទ និងរូបភាព៖ លោក មុី សុខារិទ្ធ
កែសម្រួល៖ លោក អ៊ុន ណារាជ្យ
