នៅសហគមន៍អភិវឌ្ឍន៍សំបួរ ក្នុងសង្កាត់សំបួរ ក្រុងសៀមរាប នាព្រឹកថ្ងៃទី០២ ខែមេសា ឆ្នាំ២០២៤នេះ មានរៀបចំកិច្ចប្រជុំសម្របសម្រួល និងត្រួតពិនិត្យសំណង់របស់បងប្អូនប្រជាពលរដ្ឋរស់នៅក្នុងតំបន់នេះ ដែលបានសាងសង់សំណង់ក្នុងគម្រោងលំនៅដ្ឋានសម្បទានសង្គមកិច្ច ព្រមទាំងដោះស្រាយពីបញ្ហាប្រឈមនានាមួយចំនួនទៀត។
លោក ចឹក គឹមជុន នាយករងរដ្ឋបាលសាលាខេត្តសៀមរាប បានឲ្យដឹងថា កិច្ចប្រជុំនាពេលនេះគឺដើម្បីធ្វើការសម្របសម្រួល និងត្រួតពិនិត្យសំណង់របស់បងប្អូនប្រជាពលរដ្ឋ និងដោះស្រាយបញ្ហាប្រឈមនានា ដែលកើតមាននៅក្នុងសហគមន៍ ដោយឈរលើគោលការណ៍ត្រឹមត្រូវនៃសីលធម៌ ការគោរពគ្នា តម្លាភាព ស្មោះត្រង់ និងព្រមានពីចំកាត់ការសមស្រប និងយុត្តិធម៌ដែលនឹងត្រូវអនុវត្តសម្រាប់ជម្រើសចុងក្រោយផងដែរ។
ព័ត៌មានជាតិ ថ្មីៗ
ក្នុងនាមរដ្ឋបាលខេត្តលោក ចឹក គឹមជុន ក៏បានថ្លែងអំណរគុណដល់ប្រជាពលរដ្ឋដែលនៅក្នុងសហគមន៍សំបួរ ដែលបានចូលរួមសហការជាមួយរដ្ឋបាលខេត្ត ហើយទោះបីមានបញ្ហាអ្វីកើតឡើង សូមបងប្អូនត្រូវរួបរួមសាមគ្គីគ្នា ធ្វើការដោះស្រាយ។ លោកថា ការរៀបចំទីលំនៅឋានជូនដល់បងប្អូន ៧៥គ្រួសារនាពេលនេះ គឺជាការរួមចំណែកយ៉ាងសំខាន់ ក្នុងការកាត់បន្ថយការតាំងលំនៅឋានមិនរៀបរយ ដើម្បីឈានដល់ការលុបបំបាត់បញ្ហាសំណង់បណ្ដោះអាសន្ន ក្នុងក្រុងរបស់យើង បន្តិចម្ដងៗផងដែរ។
បើតាមលោក អឹប អ៊ាន ប្រធានផ្នែកប្រតិបត្តិកម្មវិធីនៃអង្គការលំនៅឋានមនុស្សជាតិកម្ពុជា បានឱ្យដឹងដែរថា អង្គការលំនៅឋានមនុស្សជាតិកម្ពុជា តាមរយៈគម្រោង លំនៅឋានសង្គមកិច្ចសម្រាប់ពលរដ្ឋដែលតាំងទីលំនៅបណ្តោះអាសន្នលើដីសាធារណៈរបស់រដ្ឋក្នុងក្រុងសៀមរាប និងបានការគាំទ្រមូលនិធិពីអង្គការលំនៅឋានមនុស្សជាតិ ដែលមានប្រភពជំនួយប្រទេសសឹង្ហបុរី គឺបានសាងសង់លំនៅឋានថ្មីដែល សាងសង់ជាផ្ទះភ្លោះ ទំហំសរុប៧x៧.៥ម៉ែត្រ ផ្ទះម្ខាងទំហំ៣.៥x ៧.៥ មានបង្គន់អនាម័យដោយចំណាយថវិកាចំនួន ១៣.០០០ដុល្លារក្នុងខ្នងផ្ទះភ្លោះនីមួយៗ។ ក្នុង១ខ្នងផ្ទះគឺសម្រាប់ប្រគល់ជូនចំនួន២គ្រួសារ គឺបានធ្ចើការប្រគល់ជូនដល់បងប្អូនប្រជាពលរដ្ឋចំនួន ៧៥គ្រួសារ ដែលពួកគាត់ពីមុននៅក្នុងសង្កាត់គោកចក សង្កាត់ស្លក្រាម និងសង្កាត់នគរធំ ក្រុងសៀមរាប ដែលបានរស់នៅលើចំណីផ្លូវ ៣៨ខ្សែ និងមានទីលំនៅបណ្តោះអាសន្ន លើដីសាធារណៈរបស់រដ្ឋ ហើយអាជ្ញាធរខេត្តបានធ្វើការសម្របសម្រួលដីធ្លីឱ្យពួកគាត់មករស់នៅក្នុងទីតាំងនេះវិញ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
