ពិធីបុណ្យផ្កាប្រាក់សាមគ្គី ដែលផ្តួចផ្ដើមឡើងដោយព្រះតេជគុណ ឡាច លាង ព្រះអនុគុណក្រងសៀមរាប នឹងព្រះចៅអធិការចំនួន៣ មានវត្តប្រាសាទគោកចក ព្រះចៅអធិការវត្តកេសរារាម និងព្រះចៅអធិការវត្តស្វាយរមៀត ព្រមទាំងគណៈគ្រប់គ្រងសាលា លោកគ្រូអ្នកគ្រូ អាជ្ញាធរមូលដ្ឋាន មាតាបិតាអាណាព្យាបាលសិស្ស និងសិស្សានុសិស្ស នៅរសៀលថ្ងៃទី៣០ ខែមីនា ឆ្នាំ២០២៤នេះ ប្រមូលបច្ច័យបានប្រមាណ ២១លានរៀល សម្រាប់យកទៅប្រើប្រាស់កសាង កែលម្អរហេដ្ឋារចនាសម្ព័ន្ធនានា ក្នុងសាលារៀនបឋមសិក្សាមុខនាគ។
លោកស្រី ប៉ាវ ស៊ីណាន នាយិការសាលាបឋមសិក្សាមុខនាគ បានឲ្យដឹងថា គ្រប់អគារសិក្សាដែលរាជរដ្ឋាភិបាលបានផ្តល់ដល់សាលាជាបន្តបន្ទាប់ បច្ចុប្បន្នអគារមួយចំនួនបានរងការខូចខាតផ្នែកដំបូល និងសាកថ្នាំព័រណ៌ ខូចទ្វារបង្អូច ត្រូវបានគណៈគ្រប់គ្រងសាលាធ្វើការជួសជុលជាបន្តបន្ទាប់ផងដែរ។ ប៉ុន្តែក្នុងនោះ ដោយមានការខ្វះខាតនូវថវិកា ទើបព្រះគ្រូអនុគណក្រុង និងចៅអធិការវត្តមួយចំនួន រួបទាំងសប្បុរសជនក្នុងស្រុក បានផ្តួចផ្តើមធ្វើបុណ្យផ្កាសាមគ្គីនេះឡើង ដើមី្បប្រមូលថវិកាក្នុងការកសាងសមទ្ធិផលក្នុងសាលាបន្ថែមលើគម្រោង រៀបចំប្រព័ន្ធលូរំដោះទឹកភ្លៀង ,រៀបចំសួនច្បារ ,រៀបចំផ្លូវសម្រាប់សិស្សដើរក្រៅរបងសាលា និងធ្វើដំបូលសម្រាប់សិស្សអង្គុយរងចាំអាណាព្យាបាលមកទទួល និងទូទាត់ថ្លៃជួសជុលដំបូលអគារសិក្សាផងដែរ។
លោកស្រី ប៉ាវ ស៊ីណាន បន្តថា ដើមី្បឆ្លើយតបទៅនឹងគោលនយោបាយ និងយុទ្ធសាស្រ្តក្នុងផែនការយុទ្ធសាស្រ្តវិស័យអប់រំ គឺធានាលទ្ធភាពទទួលបានសេវាអប់រំប្រកបដោយសមធម៌ ក្នុងការកែប្រែសោភណ្ឌភាពនៃទីធ្លាសាលា ប្រកបដោយស្រស់ត្រកាល ក្នុងការប្រឡងប្រណាំងក្នុងវិស័យអប់រំទៀតផង។ ម្យ៉ាងទៀត ការធ្វើបុណ្យផ្កាប្រាក់នេះឡើង ក្នុងការប្រមូលថវិកា ដើម្បីធ្វើការកសាងបន្ត ជាការបំពេញនូវតម្រូវការនៃសេចក្តីស្រេចឃ្លាននូវចំណេះវិជ្ជាសម្រាប់កូនខ្មែរ ដែលជាទីកន្លែងមូលដ្ឋានគ្រឹះដ៏រឹងមាំរបស់សង្គមជាតិសម្រាប់ទៅពេលអនាគត។
ព្រះគ្រូវិចិត្រវង្សា ហែម គឹមសាន្ត ព្រះចៅអធិការវត្តប្រាសាទគោកចក បានបញ្ជាក់ថា សង្គមជាតិស្ថិតរក្រោមដំបូលនៃសន្តិភាព ធ្វើឲ្យប្រជាពលរដ្ឋបានទទួលឱកាសធ្វើបុណ្យទាន មានជីវភាពសមរម្យ ដែលភាពរីកចម្រើន និងសមទ្ធផលដែលយើងកំពុងធ្វើពេលនេះ មិនមែនបានមកពីការខិតខំប្រឹងប្រែងរបស់រាជរដ្ឋាភិបាល អាជ្ញាធរមូលដ្ឋានតែប៉ុណ្ណោះទេ វាជាការចូលរួមយ៉ាងចាំបាច់ទាំងសណ្តានចិត្ត កម្លាំងពលំនិងការបរិច្ចាគជាថវិកាពីប្រជាពុទ្ធបរិស័ទ ដែលជាកម្លាំងមហាសាមគ្គីមួយ ដែលធ្វើឲ្យយើងសម្រេចបានកិច្ចការធំៗសម្រាប់ជាតិមាតុភូមិ។ ព្រះអង្គបានអំពាវនាវដល់បងប្អូនប្រជាពុទ្ធបរិស័ទ ក៏ដូចជាសាធារណៈជនទាំងអស់ដែលបានបញ្ជូនកូនៗរបស់ខ្លួនមកសិក្សា នៅសាលារៀនបឋមសិក្សាមុខនាគនេះ សូមចូលរួមថែរក្សា ការពារ សមទ្ធិផលនេះឲ្យបានប្រើប្រាស់បានយូរអង្វែង។ សមទ្ធិផលទាំងនេះ គឺកើតចេញឡើង ពីកម្លាំងញើសឈាមរបស់យើងគ្រប់គ្នា ដែលបានបរិចាកនូវទ្រព្យធន ការរួបចំណែកអភិវឌ្ឍន៍លើវិស័យ អប់រំសិក្សា ពីព្រោះថា ថ្នាក់បឋមនេះហើយ ដែលជាគ្រឹះដ៏រឹងមាំនៃអក្សរសាស្ត្រជាតិ ហើយក៏ជាមូលដ្ឋានគ្រឹះនៃធនធានមនុស្ស សម្រាប់បន្តវេន ទៅថ្ងៃអនាគតផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
