ស្ថិតក្នុងបរិបទសកលភាវូនីយកម្មនៃការរីកចម្រើនវិទ្យាសាស្ត្រ បច្ចេកវិទ្យា និងការប្រកួតប្រជែងសេដ្ឋកិច្ចចំណេះដឹង សេដ្ឋកិច្ចទិន្នន័យ ហើយនឹងសេដ្ឋកិច្ចមូលធនមនុស្ស វាពិតជាមានភាពចាំបាច់ណាស់ ក្នុងការត្រូវអភិវឌ្ឍធនពលរដ្ឋម្នាក់ៗ ឱ្យក្លាយជាពលរដ្ឋល្អពិតប្រាកដ មានមូលដ្ឋានគ្រឹះរឹងមាំ ដើម្បីរួមគ្នាកសាងមូលដ្ឋានគ្រឹះប្រទេសជាតិយើងឱ្យកាន់តែមានភាពរឹងមាំ និងមានការរីកចម្រើន។
នេះបើតាមការលើកឡើងរបស់ លោក លី សារី អភិបាលរងខេត្តសៀមរាប ក្នុងឱកាសបិទការបោះជំរុំអាស៊ាន កម្ពុជា ថៃ និងម៉ាឡេស៊ី នាព្រឹកថ្ងៃទី២៩ ខែមីនា ឆ្នាំ២០២៤នេះ នៅមណ្ឌលសមាគមទ្រទ្រង់ព្រះធម៌កម្ពុជា ខេត្តសៀមរាប បន្ទាប់ពីដំណើរការទៅរយៈពេល៣ថ្ងៃកន្លងមកនេះ នៅលើទឹកដីនៃខេត្តសៀមរាប។
លោក ព្រំ សម្បត្តិ ប្រធានសមាគមទ្រទ្រង់ព្រះធម៌កម្ពុជាខេត្តសៀមរាប បានបង្ហាញថា ការបោះជំរុំអាស៊ាននាពេលនេះ ជាជំហានប្រវត្តិសាស្ត្រថ្មីមួយបង្ហាញពីភាពរឹងមាំ និងភាពជាម្ចាស់ការរបស់យើងទាំងអស់ ក្នុងនាមជាប្រទេសស្ថិតក្នុងតំបន់អាស៊ីអាគ្នេយ៍មួយនេះ ក្នុងការរួមគ្នាកសាងធនធានមនុស្សល្អនៅកម្ពុជា និងក្នុងប្រទេសជាសមាជិកឱ្យកាន់តែល្អប្រសើរ និងមានគុណធម៌ខ្ពស់ ហើយនឹងរួមគ្នាដឹកនាំ អភិវឌ្ឍន៍មាតុប្រទេសរបស់ខ្លួនឆ្ពោះទៅរកអារ្យប្រទេស។
លោកបានបញ្ជាក់ថា ការរៀបចំកម្មវិធីនេះឡើង ជាបង្ហាញពីស្មារតីមហាសាមគ្គីដែលយើងចេះរួបរួមសាមគ្គីគ្នាធ្វើរឿងល្អៗ និងសាបព្រោះស្មារតីមនុស្សល្អ ដើម្បីលើកតម្លៃប្រជាជាតិនីមួយៗ ឱ្យកាន់តែមានភាពថ្លៃថ្នូរខ្ពង់ខ្ពស់ជាដរាប និងភាពរីកចម្រើនរុងរឿងប្រកបដោយចីរភាព។ ទាំងអស់នេះ គឺវាពិតជាតម្រូវការចាំបាច់ និងមានសារប្រយោជន៍ខ្លាំងណាស់សម្រាប់ជាតិសាសន៍នីមួយៗ ក្នុងដំណាក់កាលដែលប្រទេសជាតិ បាននិងកំពុងមានសន្ទុះរីកចម្រើនប្រកបដោយ ភាពរឹងមាំ ឯករាជ្យម្ចាស់ការរៀងៗខ្លួន ចំពោះជោគវាសនាប្រទេសជាតិ។ ការបោះជំរុំនេះជាកម្មវិធីអភិវឌ្ឍសមត្ថភាពយុវជន ដែលមិនអាចខ្វះបានក្នុងការងារអប់រំ ពីព្រោះការបោះជំរុំធ្វើឱ្យយុវជនចេះសង្កេត ចេះពិចារណា ដោយបង្កើនស្មារតីធ្វើការងារជាក្រុម ធ្វើសេចក្តីសម្រេចចិត្តជាសមូហភាព និងបុគ្គលមានទំនួលខុសត្រូវ ក្នុងស្មារតីពង្រឹងមិត្តភាព សាមគ្គីភាពបានយ៉ាងល្អផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
