ការដាក់ដេញថ្លៃគម្រោងសាងសង់ផ្លូវបេតុងអាមេមួយខ្សែ ស្ថិតនៅក្នុងឃុំបាគង ស្រុកប្រាសាទបាគង ខេត្តសៀមរាប ត្រូវបានប្រកាសបិទបញ្ចប់ការដេញថ្លៃដោយជោគជ័យ នៅព្រឹកថ្ងៃទី២៥ ខែមីនា ឆ្នាំ២០២៤នេះ។
លោក សំអិល សុណា មន្ត្រីទីចាត់ការផែនការវិនិយោគ បានឲ្យដឹងថា ចំពោះក្រុមហ៊ុនដែលមានបំណងចង់ដាក់សំណើរដេញថ្លៃ គឺត្រូវភ្ជាប់សំណើដេញថ្លៃរបស់ខ្លួនជាមួយនឹងប័ណ្ណពន្ធប៉ាតង់ដែលមានសុពលភាព និងត្រូវតម្កល់ប្រាក់កក់ធានាការអនុវត្តចំនួន១០ភាគរយ នៃតម្លៃកិច្ចសន្យា ហើយអ្នករដេញថ្លៃទាំងអស់ត្រូវចូលរួមដេញថ្លៃប្រកបដោយការប្រកួតប្រជែង ដោយគ្មានការឃុបឃិត គ្មានការក្លែងបន្លំ ការបង្ខិតបង្ខំ ឬការប្រព្រឹត្តអំពើពុករលួយឡើយ។ បើត្រូវបានរកឃើញថា អ្នកដេញថ្លៃណាមួយមានការពាក់ព័ន្ធនឹងការឃុបឃិត ក្លែងបន្លំ ការបង្ខិតបង្ខំ ឬការប្រព្រឹត្តអំពើពុករលួយណាមួយ នោះអ្នកដេញថ្លៃនោះនឹងត្រូវបានដាក់ក្នុងបញ្ជីខ្មៅជារៀងរហូត និងមិនត្រូវបានអនុញ្ញាតឱ្យដាក់សំណើដេញថ្លៃកិច្ចសន្យាឃុំ សង្កាត់ទាំងអស់នៅទូទាំងប្រទេសកម្ពុជាផងដែរ។
លោក យន់ វន់ ប្រធានគណៈកម្មការលទ្ធកម្មឃុំបាគង បានឲ្យដឹងថា សម្រាប់គម្រោងមូលនិធិឃុំឆ្នាំ២០២៤នេះ ឃុំបាគង បានដាក់ដេញថ្លៃគម្រោងសាងសង់ផ្លូវបេតុងអាមេមួយខ្សែ ដែលមានប្រវែង ១៧៩ម៉ែត្រ ទទឹង ៥ម៉ែត្រ កម្រាស់ ០.១៥ម៉ែត្រ ស្លាកគម្រោង១ និងដាក់លូការពារផ្លូវមួយកំប្លេ ក្នុងតម្លៃប៉ាន់ស្មាន ១០៣.០៦៥.៦០០រៀល ដោយមានក្រុមហ៊ុនម៉ៅការដាក់សំណើរចំនួន ១៦ក្រុមហ៊ុន។ ជាលទ្ធផលបានទៅលើក្រុមហ៊ុន ពៅ រ៉ាឌីខនស្ត្រាក់សិន ក្នុងតម្លៃ ៥១.៩១០.០០០រៀល។
ព័ត៌មានជាតិ ថ្មីៗ
ក្នុងនោះលោក យន់ វន់ ក៏បានណែនាំដល់ក្រុមហ៊ុនម៉ៅការដែលទទួលបានគម្រោងនេះ ត្រូវអនុវត្តឲ្យបានត្រឹមត្រូវទៅតាមក្បួនច្បាប់ និងស្តង់ដាបច្ចេកទេសនៃការសាងសង់ ជាពិសេសធ្វើយ៉ាងណាត្រូវពន្លឿនការសាងសង់ឲ្យបានលឿនតាមពេលវេលាដែលបានកំណត់នៅក្នុងកិច្ចសន្យា ដើម្បីឲ្យបងប្អូនប្រជាពលរដ្ឋមានភាពងាយស្រួលក្នុងការធ្វើដំណើរឆ្លងកាត់។
ក្រោយការដេញថ្លៃ ក្រុមហ៊ុន ពៅ រ៉ាឌីខនស្ត្រាក់សិន ដែលទទួលបានការម៉ៅការចំពោះគម្រោងសាងសង់ផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងធ្វើឲ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមានចែងនៅក្នុងកិច្ចសន្យា៕
អត្ថបទ និងរូពភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
