ថ្លែងនៅក្នុងពិធីបិទសន្និបាតបូកសរុបការងារសុខាភិបាលខេត្តសៀមរាប ឆ្នាំ២០២៣ លើកទិសដៅបន្តឆ្នាំ២០២៤ នាព្រឹកថ្ងៃទី២២ ខែមីនា ឆ្នាំ២០២៤នេះ រដ្ឋលេខាធិការក្រសួងសុខាភិបាល ឯកឧត្តម ង៉ូវ កាង បានទទួលស្គាល់ថា វិស័យសុខាភិបាលក្នុងខេត្តសៀមរាប មានការរីកចម្រើនគួរឲ្យកត់សម្គាល់ ខណៈឥរិយាបទរបស់បុគ្គលិកបម្រើសេវាមួយចំនួននៅមានកម្រិតនៅឡើយ។
ឯកឧត្តម ង៉ូវ កាង បានលើកឡើងថា វិស័យសុខាភិបាលនៅក្នុងខេត្តសៀមរាប បានក្លាយជាគម្រូល្អមួយ ហើយមន្ទីរពេទ្យបង្អែកខេត្តសៀមរាប ក៏ត្រូវបានសម្រេចដាក់ជាមន្ទីរពេទ្យថ្នាក់តំបន់ ដែលមន្ទីរពេទ្យថ្នាក់តំបន់នេះ ជាមន្ទីរពេទ្យមានកម្រិតខ្ពស់ដូចគ្នាទៅនឹងមន្ទីរពេទ្យថ្នាក់ជាតិផងដែរ។ បើទោះជាយ៉ាងនេះក្តី បញ្ហាប្រឈមមួយចំនួនក៏ត្រូវតែដោះស្រាយផងដែរ ដើម្បីបញ្ចៀសការរិះគន់ពីប្រជាពលរដ្ឋ ក្នុងឥរិយាបទក្នុងការបំពេញការងារក៏ជារឿងមួយដែលត្រូវព្យាយាមកែប្រែផងដែរ។ អ្នកជំងឺដែលទៅរកពេទ្យព្យាបាល ពួកគាត់ភាគច្រើនសុទ្ធតែមិនសូវជាមានការគិតគូរវែងឆ្ងាយនោះទេ ព្រោះគាត់កំពុងគិតអំពីជំងឺរបស់គាត់ ដូច្នេះការប្រើពាក្យសម្តី ឬកាយវិការឆ្គាំឆ្គងដោយអចេតនាណាមួយ បានធ្វើឲ្យប៉ះពាល់ខ្លាំងដល់អារម្មណ៍របស់ពួកគាត់។ ចំណុចនេះអ្នកបម្រើសេវាសុខាភិបាលគួរព្យាយាមកែប្រែ។
យោងតាមរបាយការណ៍របស់ប្រធានមន្ទីរសុខាភិបាលខេត្តសៀមរាប លោកវេជ្ជបណ្ឌិត ក្រូស សារ៉ាត់ បានឲ្យដឹងថា មន្ទីរពេទ្យបង្អែកខេត្តសៀមរាប បានក្លាយជាមន្ទីរពេទ្យកម្រិត៣ ដែលបានទទួលពិនិត្យ និងព្យាបាល មិនត្រឹមតែអ្នកជំងឺក្នុងខេត្តប៉ុណ្ណោះទេ ប៉ុន្តែក៏មានអ្នកជំងឺពីបណ្តាខេត្តជិតខាងមកទទួលសេវានៅក្នុងខេត្តសៀមរាបផងដែរ។ ជាមួយគ្នានេះផ្នែកសម្ភព និងជំងឺកុមារ ខេត្តក៏មានមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ដែលទទួលពិនិត្យ ព្យាបាល ដោយមិនគិតកម្រៃផងដែរ។ ជាមួយការរីកម្រើននេះ បញ្ហាប្រឈមនានាក៏មានច្រើនបញ្ហាបុគ្គលិកសុខាភិបាលដែលមានចំនួនតិចមិនអាចឆ្លើយតបបានទាន់ពេល បុគ្គលិកខ្លះមានកន្លែងស្នាក់នៅឆ្ងាយពីកន្លែងធ្វើការ និងបុគ្គលិកខ្លះចំណេះដឹងរបស់គាត់នៅមានកម្រិត និងបុគ្គលិកខ្លះខ្វះការទទួលខុសត្រូវលើការងារមិនគ្រប់ជ្រុងជ្រោយ។ជាមួយគ្នានេះ បញ្ហាកង្វះសម្ភារៈ បរិក្ខានិងឳសថ ក៏ជាបញ្ហាប្រឈមសម្រាប់វិស័យសុខាភិបាលផងដែរ។
លោក ពិន ប្រាកដ អភិបាលរងខេត្ត មានប្រសាសន៍ថា ការលើកកម្ពស់សុខុមាលភាព ជាគោលនយោបាយអាទិភាពចម្បងមួយ ក្នុងចំណោមគោលនយោបាយអភិវឌ្ឍតាមវិស័យ ដោយមានការលើកកម្ពស់ទំនើបភាវូបនីយកម្មប្រព័ន្ធផ្តល់សេវាសុខាភិបាលសុខភាពឆ្ពោះទៅសម្រេចការគ្របដណ្តប់សុខភាពជាសកល។ តាមរយៈនេះសូមឱ្យគ្រប់ស្ថានប័ន អង្គភាព អាជ្ញាធរមូលដ្ឋាន អង្គការដៃគូរសុខភាព ចូលរួមឲ្យបានខ្លាំងក្លាជាងមុនបន្ថែមទៀត។ លោកក៏បានថ្លែងកោតសរសើរចំពោះ ថ្នាក់ដឹកនាំ និងមន្ត្រីនៃមន្ទីរសុខាភិបាលខេត្តទាំងអស់ដែលបានដឹកនាំ និងអនុវត្ដនូវតួនាទីភារកិច្ចបានល្អតាមជំនាញរៀងៗខ្លួនប្រកបដោយការទទួលខុសត្រូវខ្ពស់៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
