អាជ្ញាធរជាតិអប្សរា នៅថ្ងៃទី២១ ខែមីនា ឆ្នាំ២០២៤នេះ បានបញ្ជាក់ថា ការបោះបង្គោលរបងហ៊ុំព័ទ្ធដីនៅសួនរុក្ខជាតិអង្គរ ជាគម្រោងរបស់រដ្ឋសុទ្ធសាធ ដែលគម្រោងនេះបម្រើឲ្យប្រយោជន៍សាធារណៈ គ្មានការផ្ដល់សិទ្ធិឱ្យក្រុមហ៊ុនអភិឌ្ឍន៍ដីក្នុងតំបន់អង្គរ ដូចការផ្សព្វផ្សាយក្នុងបណ្តាញសង្គមនោះឡើយ។
សូមជម្រាបថា ការបញ្ជាក់របស់អាជ្ញាធរជាតិអាប្សរានេះ ធ្វើឡើងបន្ទាប់ពីកន្លងទៅនេះមានអ្នកលេងបណ្ដាញសង្គមតិកតុក (Tik Tok) មានអខោនឈ្មោះ តក់តក់ បានបង្ហោះខ្លឹមសារដែលមានន័យចោទប្រកាន់មកលើស្ថាប័នជាតិមួយនេះថា “ក្រុមហ៊ុនដែលទទួលបានសិទ្ធិអភិវឌ្ឍន៍លើដីក្នុងតំបន់អង្គរចាប់ផ្ដើមធ្វើរបងហ៊ុំព័ទ្ធហើយ ដោយជ្រោកក្រោមស្លាកអាជ្ញាធរអប្សរា ចូលរួមសោកស្តាយផងកូនខ្មែរ” ។
ព័ត៌មានជាតិ ថ្មីៗ
លោក ឡៃ ប៉ូទី អនុប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា បានឲ្យដឹងថា ការចោទប្រកាន់ដោយគ្មានមូលដ្ឋានច្បាស់លាស់ បំភ្លៃការពិតនេះ ធ្វើឱ្យមហាជនមានការភ័ន្ធច្រឡំ និងប៉ះពាល់កិត្ដិយសដល់ស្ថាប័នអាជ្ញាធរជាតិអប្សរា ដែលគ្រប់គ្រងដោយរដ្ឋាភិបាល។ ចំពោះការជីកដាំបង្គោលរបងហុំព័ទ្ធព្រៃនោះ ជាគម្រោងសួនរុក្ខជាតិអង្គរ ដែលធ្វើឡើងសម្រាប់ដាក់សំណាញ់លួសសម្រាប់ការពារ និងអភិរក្សសត្វព្រៃដែលគ្រោងនឹងលែង នៅក្នុងព្រៃធម្មជាតិ សម្រាប់ភ្ញៀវទេសចរដើរទស្សនាកំសាន្ដ ហើយការជីកដីធ្វើរបងនោះ ក៏គ្មានប៉ះពាល់ដល់ព្រៃឈើផងដែរ។ ជាមួយគ្នានោះ នៅក្នុងព្រៃនេះ អាជ្ញាធរជាតិអប្សរា ក៏មានរៀបចំផ្លូវថ្មើរជើងសម្រាប់ដើរទស្សនាព្រៃព្រឹក្សា ហើយការងារទាំងនេះជាការងារដ្ឋ ដែលធ្វើឡើងសម្រាប់ទាក់អ្នកទេសចរទៅទស្សនាខេត្ដសៀមរាប ឱ្យបានកាត់តែច្រើន។
លោក ឡៃ ប៉ូទី ក៏បានបញ្ជាក់ថា ដីព្រៃដែលបានធ្វើរបងដាក់បន្លាលួសនោះ ជាគម្រោងសួនរុក្ខជាតិអង្គរ មានដីទំហំ១៥០ហិកតា ដែលបានចាប់ផ្ដើមនៅដើមខែមីនា នឹងគម្រោងបញ្ចប់នៅខែសីហា សម្រាប់លែងសត្វដែលស្លូតៗងាយស្រួលភ្ញៀវទស្សនា។ ជាមួយគ្នានោះ ផ្លូ៍វថ្មើរជើងនៅក្នុងព្រៃមានប្រវែងជាង ៦គីឡូម៉ែត្រផងដែរ ដែលគ្រោងបើកឱ្យដើរទស្សនាព្រៃព្រឹក្សានាពេលឆាប់ៗខាងមុខនេះ។ លោកក៏សូមអំពាវដល់ដល់សាធារណៈ កុំឱ្យមានការយល់ច្រឡំ តាមបណ្ដាញសង្គមផ្សព្វផ្សាយ ហើយជឿជាក់លើរដ្ឋាភិបាល ដែលបានខិតខំរកវិធីសាស្ដ្របង្កើតឱ្យមានតំបន់ទស្សនា ឱ្យបានកាន់តែច្រើន ដើម្បីទាក់ទាញអ្នកទេសចរជាតិ និងអន្ដរជាតិផងដែរ៕
អត្ថបទ និងរូបភាព៖ លោក ជា ស្រស់, បូ សាវី
កែសម្រួល៖ លោក អ៊ុន ណារាជ្យ
