នៅថ្ងៃទី២១ ខែមីនា ឆ្នាំ២០២៤ រដ្ឋបាលខេត្តសៀមរាប បានសហការជាមួយការិយាល័យនគរបាលប្រយុទ្ធប្រឆាំងគ្រឿងញៀន នៃស្នងការនគរបាលខេត្ត បានរៀបចំធ្វើតេស្តទឹកនោមរកសារធាតុញៀនទៅលើថ្នាក់ដឹកនាំខេត្ត មន្ត្រីរាជការ មន្ត្រីកិច្ចសន្យា និងមន្ត្រីស្ម័គ្រចិត្ត ព្រមទាំងអ្នកអនាម័យដែលបម្រើការងារនៅសាលាខេត្ត ចំនួន២៩៤នាក់ ស្រី១១៣នាក់ និងមិនបានចូលរួមចំនួន ៤៥នាក់ ដោយសារជាប់បំពេញបេសកកម្ម និងសុំច្បាប់ នឹងត្រូវធ្វើតេស្តនាពេលបន្ទាប់។
លោក លី វណ្ណៈ នាយករដ្ឋបាលសាលាខេត្ត បានបញ្ជាក់ថា ដោយអនុវត្តតាមបទបញ្ជាលេខ ០១ បប ចុះថ្ងៃទី២០ ខែកុម្ភៈ ឆ្នាំ២០២៤ របស់រាជដ្ឋាភិបាលកម្ពុជា ស្តីពីការដាក់ចេញវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួងស្ថាប័ន និងរដ្ឋបាលថ្នាក់ក្រោមជាតិ។ សម្រាប់រដ្ឋបាលខេត្តសៀមរាប មានថ្នាក់ដឹកនាំ មន្ត្រីរាជការ បុគ្គលិកដែលបម្រើការងារនៅសាលាខេត្តសៀមរាប សរុបចំនួន ៣៣៩នាក់ ស្រី១២០នាក់។ ដោយឡែកសម្រាប់ថ្ងៃនេះ មានអ្នកធ្វើតេស្តបានចំនួន ២៩៤នាក់ ស្រី១១៣នាក់ ជាលទ្ធផលគឺអវិជ្ជមានទាំងអស់ ចំនែកអ្នកដែលមិនបានចូលរួមចំនួន ៤៥នាក់ ដោយសារជាប់បំពេញបេសកកម្ម និងសុំច្បាប់ នឹងត្រូវធ្វើតេស្តជាបន្តបន្ទាប់នាពេលក្រោយ។
ព័ត៌មានជាតិ ថ្មីៗ
ឯកឧត្តម ប្រាក់ សោភ័ណ អភិបាលខេត្តសៀមរាប មានប្រសាសន៍ថា ការធ្វេីតេស្តរកធាតុញៀនលេីមន្ត្រីរាជការនៃអង្គភាពសាលាខេត្តនេះ គឺដើម្បីចូលរួមចំណែកធានាប្រសិទ្ធភាពនៃការអនុវត្តយុទ្ធនាការប្រឆាំងគ្រឿងញៀនខុសច្បាប់លើកទី៩ ដែលជាអាទិភាពនយោបាយដ៏សំខាន់របស់រាជរដ្ឋាភិបាល ក៏ដូចជាការលើកកម្ពស់ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អ នៅក្នុងស្ថាប័នរដ្ឋទាំងថ្នាក់ជាតិ ទាំងថ្នាក់ក្រោមជាតិ ទាំងក្នុងជួរកងកម្លាំងប្រដាប់អាវុធ និងមន្ត្រីរាជការស៊ីវិល។ រាជរដ្ឋាភិបាលបានការដាក់ចេញនូវវិធានការដ៏ម៉ឺងម៉ាត់ ក្នុងការរកសារធាតុញៀនទៅលើមន្ត្រីរាជការ នៅក្នុងរដ្ឋបាលខេត្ត ក៏ដូចជារដ្ឋបាលក្រុងស្រុក និង មន្ទីរអង្គភាពជុំវិញខេត្តផងដែរ។
ឯកឧត្តមអភិបាលខេត្ត មានប្រសាសន៍ទៀតថា នេះជាជំហានដំបូង ដោយរដ្ឋបាលខេត្តបានទទួលឧបករណ៍សម្រាប់ធ្វើតេស្តដល់ថ្នាក់ដឹកនាំ មន្ត្រី បុគ្គលិកសាលាខេត្តសៀមរាប។ ដូច្នេះយើងនឹងបន្ត បើកយុទ្ធនាការធ្វើតេស្តរកសារធាតុញៀន ទៅលើមន្ត្រីរាជការ មន្ទីរអង្គភាពជុំវិញខេត្ត រដ្ឋបាលក្រុងស្រុក ឃុំសង្កាត់ និងសមាជិកភូមិ និងឈានទៅដល់ការធ្វើតេស្តក្រុមគ្រូបង្រៀន និងក្រុមគ្រូពេទ្យទៀតផង។ ឯកឧត្ដមបញ្ជាក់ថា មន្ត្រីរាជការក្នុងខេត្ត ត្រូវតែចូលរួមធ្វើតេស្តទាំងអស់គ្នា ដើម្បីបញ្ជាក់នូវភាពស្អាតស្អំ ភាពត្រឹមត្រូវ ក៏ដូចជាបញ្ជាក់ពីការចូលរួមគាំទ្រយុទ្ធនាការនេះ ដើម្បីអនុវត្តទៅទទួលបានជោគជ័យ ស្របតាមបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដោយមន្ត្រីរាជការត្រូវធ្វើជាគំរូសម្រាប់ប្រជាពលរដ្ឋ។ ជាមួយនោះតែក្នុងករណីរកឃើញមន្ត្រីជាប់ពាក់ព័ន្ធ និងប្រើប្រាស់គ្រឿងញៀន នោះនឹងត្រូវបណ្តេញចេញពីក្របខណ្ឌដោយគ្មានការលើកលែងឡើយ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
