ជំងឺរ៉ាំរ៉ៃ និងជំងឺមិនឆ្លង នៅតែជាបញ្ហាប្រឈមចម្បង បន្ទាប់ពីជំងឺទាំងនោះកំពុងមានការកើតឡើងថ្មីៗ ឯចំនួនអ្នកស្លាប់ក៏មានការកើនឡើងពីមួយឆ្នាំទៅមួយឆ្នាំផងដែរ។ នេះបើតាមការលើកឡើងរបស់លោកវេជ្ជបណ្ឌិត ក្រូស សារ៉ាត់ ប្រធានមន្ទីរសុខាភិបាលខេត្តសៀមរាប ក្នុងពីធីពិធីបើកសន្និបាតបូកសរុបលទ្ធផលការងារសុខាភិបាលឆ្នាំ២០២៣ និងលើកទិសដៅអនុវត្តឆ្នាំ២០២៤ របស់មន្ទីរសុខាភិបាលខេត្ត នាព្រឹកថ្ងៃទី២១ ខែមីនា ឆ្នាំ២០២៤នេះ។
លោកវេជ្ជបណ្ឌិត ក្រូស សារ៉ាត់ មានប្រសាសន៍ថា បើទោះបីជាវិស័យសុខាភិបាលនៅក្នុងខេត្តសៀមរាប មានការរីកចម្រើន និងសម្រេចបាននូវជោគជ័យធំៗ នៅក្នុងការទប់ស្កាត់ជំងឺឆ្លងនានាយ៉ាងណាក្តី ក៏ប៉ុន្តែជំងឺរ៉ាំរ៉ៃ និងជំងឺមិនឆ្លង មានដូចជា ជំងឺសសៃរឈាមបេះដូង ជំងឺរបួលដែលបណ្តាលមកពីគ្រោះថ្នាក់ប៉ះទង្គិចក្បាលធ្ងន់ធ្ងរ ជំងឺទឹកនោមផ្អែម ជំងឺមហារីក នៅតែជាប្រឈមចម្បងដោយមានការកើតឡើងថ្មី និងការស្លាប់ក៏មានការកើនឡើងពីមួយឆ្នាំទៅមួយឆ្នាំ។ ជាមួយគ្នានេះ នៅក្នុងឆ្នាំ២០២៣ អត្រាមរណៈភាព មាតា និងទារក មានការថយចុះច្រើន ដោយសារប្រជាពលរដ្ឋលោកបានយល់ដឹងនិងជ្រើសរើសយកការសម្រាលបុត្រ នៅតាមមូលដ្ឋានសុខាភិបាលដែលពួកគាត់ពេញចិត្ត និងមានទំនុកចិត្ត។
មានប្រសាសន៍ក្នុងឱកាសនោះ លោក ពិន ប្រាកដ អភិបាលរងខេត្ត បានលើកឡើងថា ការលើកកម្ពស់សុខុមាលភាពប្រជាជន គឺជាគោលនយោបាយអាទិភាពចម្បងមួយ ក្នុងចំណោមគោលនយោបាយអភិវឌ្ឍតាមវិស័យ ដោយមានការលើកកម្ពស់ទំនើបភាវូបនីយកម្មប្រព័ន្ធផ្តល់សេវាសុខាភិបាលសុខភាពឆ្ពោះទៅសម្រេចការគ្របដណ្តប់សុខភាពជាសកល។ តាមរយៈការដាក់ពង្រាយបុគ្គលិក ពិសេសឆ្មបដែលមានការបណ្តុះបណ្តាលជំនាញត្រឹមត្រូវដល់មណ្ឌលសុខភាព ធ្វើឱ្យអត្រាស្លាប់ម្តាយនិងទារក ត្រូវបានកាត់បន្ថយ ប្រជាជនយល់ដឹងទូលំទូលាយអំពីស្ថានភាពរស់នៅប្រចាំថ្ងៃ ការហូបចុកប្រចាំថ្ងៃ ក្នុងទិសដៅកាត់បន្ថយហានិភ័យជំងឺឆ្លង និងជំងឺមិនឆ្លងឲ្យនៅកម្រិទាប ពិសេសប្រព័ន្ធបញ្ជូនអ្នកជំងឺត្រូវបានរៀបចំ។
ក្នុងនាមគណៈអភិបាលខេត្ត លោកសូមផ្តល់ការគាំទ្រចំពោះគោលនយោបាយនេះ និងសូមឱ្យគ្រប់ស្ថានប័ន អង្គភាព អាជ្ញាធរមូលដ្ឋាន អង្គការដៃគូរសុខភាព ចូលរួមឲ្យបានខ្លាំងក្លាជាងមុនបន្ថែមទៀត ពិសេសការជួបគ្នាពេលនេះ សូមចូលរួមមតិយោបល់ឲ្យបានច្រើន ពិសេសចែករំលែកបទពិសោធន៍ការងារ ការលើកបញ្ហាប្រឈមដែលបានជួបប្រទះនៅតាមមូលដ្ឋានរបស់ខ្លួន ដាក់ជូនអង្គសន្និបាត ធ្វើការពិភាក្សា និងដោះស្រាយ។ លោកក៏បានថ្លែងកោតសរសើរចំពោះ ថ្នាក់ដឹកនាំ និងមន្ត្រីនៃមន្ទីរសុខាភិបាលខេត្តទាំងអស់ដែលបានដឹកនាំ និងអនុវត្ដនូវតួនាទីភារកិច្ចបានល្អតាមជំនាញរៀងៗខ្លួនប្រកបដោយការទទួលខុសត្រូវខ្ពស់។ សកម្មភាពការងារ និងសមិទ្ធផលជាច្រើន ដូចជាសកម្មភាពចុះអប់រំផ្សព្វផ្សាយ ការលើកកំពស់សុខភាព ក្នុងការទប់ស្កាត់ជំងឺឆ្លង ជំងឺមិនឆ្លងផ្សេងៗនៅក្នុងសហគម និងការងារពង្រឹងប្រព័ន្ធសុខាភិបាល មន្ទីរបានអនុវត្តតាមផែនការជាក់លាក់ល្អប្រសើរ៕
អត្ថបទ និងរូបភាព៖ លោក ជា ស្រស់ , យូ វង្ស
កែសម្រួល៖ លោក អ៊ុន ណារាជ្យ
