មន្ទីរវប្បធម៌ និងវិចិត្រសិល្បៈខេត្តសៀមរាប នឹងរៀបចំកម្មវិធីរយៈពេលបីថ្ងៃ ដើម្បីអបអរសាទរទិវាវប្បធម៌ជាតិ ៣មីនា លើកទី២៦ ក្រោមប្រធានបទ “យុវជន ដើម្បីវប្បធម៌ជាតិ” ចាប់ពីថ្ងៃទី២៧-២៩ ខែមីនា ឆ្នាំ២០២៤ខាងមុខនេះ ដោយមានការតាំងបង្ហាញ និងកម្មវិធីសម្តែងសិល្បៈជាច្រើនទម្រង់នឹងត្រូវបង្ហាញជូនសាធារណៈជន ប៉ុន្តែគ្មានការផ្សព្វផ្សាយ និងលក់គ្រឿងស្រវឹងឡើយ។
ថ្លែងនៅក្នុងកិច្ចប្រជុំត្រៀមរៀបចំពិធីអបអរសាទរទិវាវប្បធម៌ជាតិ ដែលធ្វើឡើងនៅសាលាខេត្តសៀមរាប នារសៀលថ្ងៃទី២០ ខែមីនា ឆ្នាំ២០២៤នេះ លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប បានឲ្យដឹងថា នៅក្នុងកម្មវិធីទាំងមូល ក៏មានការរំលេចនូវអត្ថន័យរបស់ខ្លែងឯកផងដែរ ដោយលោកបានលើកឡើងថា ពលរដ្ឋខ្មែរមួយចំនួននៅតែយសល់ខុសចំពោះមរតកវប្បធម៌មួយនេះ ដែលតាមពិតខ្លែងឯករបស់ខ្មែរ មានអត្ថន័យល្អ ជាវត្ថុមង្គល ជាវត្ថុតំណាងសេរីភាព ដែលសូម្បីតែក្នុងសៀវភៅទ្វារទសមាសក៏មាននិយាយអំពីពិធីបុណ្យខ្លែងនេះដែរ។
ព័ត៌មានជាតិ ថ្មីៗ
លោកបញ្ជាក់ថា នៅក្នុងសៀវភៅទ្វារទសមាសមាននិយាយអំពីពិធីបុណ្យខ្លែង ហើយពិធីនេះខាងមន្ទីរវប្បធម៌ក៏បានធ្វើជារៀងរាល់ឆ្នាំលើកលែងតែក្នុងអំឡុងពេលមានជំងឺកូវីដ១៩ ទេដែលអាក់ខាង។ នៅក្នុងអក្សរសិល្ប៍ខ្មែររឿងធនញ្ញជ័យក៏មាននិយាយអំពីខ្លែងឯក ដែលធនញ្ញជ័យបានរួចចេញពីគុកក៏ដោយសារខ្លែងឯក នៅក្នុងរឿងព្រេងខ្មែរ នាងកែវណាម៉ាធីតាមុខសេះ ក៏មាននិយាយអំពីខ្លែងឯក ហើយនាងកែវណាម៉ាបានជួបគូគាប់ក៏ដោយសារខ្លែង តើវាមានចង្រៃឯណា? វាជាមង្គល វាជាសេរីភាព”។ “យុវជន ដើម្បីវប្បធម៌ជាតិ” គឺជាប្រធានបទនៃទិវាវប្បធម៌ជាតិ លើកទី២៦ ។ ការជ្រើសរើសយកប្រធានបទនេះ គឺរដ្ឋាភិបាលជំរុញឲ្យយុវជនចូលរួមអនុវត្តកាន់តែសកម្មដើម្បីលើកកម្ពស់ការអភិរក្ស និងអភិវឌ្ឍវប្បធម៌ជាតិ ក៏ដូចជាវប្បធម៌ចំរុះនៅកម្ពុជា។ ទិវាវប្បធម៌ជាតិ ក៏ជាឱកាសបំផុសនូវមនសិការស្រឡាញ់សិល្បៈវប្បធម៌ ទំនៀមទម្លាប់ ប្រពៃណី និងកេរដំណែលដូនតាជាច្រើនទៀត ។
អភិបាលរងខេត្តសៀមរាប លោក យុន លីនណេ ក្នុងនាមជាប្រធាននៃកិច្ចប្រជុំត្រៀមទិវាវប្បធម៌ជាតិនេះ បានសម្តែងនូវការគាំទ្រចំពោះការលើកឡើង របស់ប្រធានមន្ទីរវប្បធម៌ និងវិចិត្រសិល្បៈ។ លោកថាការរំលេចនូវអត្ថន័យខ្លែងឯក និងការបដិសេធមិនឲ្យមានការផ្សព្វផ្សាយ និងលក់គ្រឿងស្រវឹង ពិតជាមានន័យជ្រាលជ្រៅបំផុត ហើយវប្បធម៌របស់ប្រទេសជាតិមួយអាចរុងរឿងទៅបានក៏ដោយ ការចូលរួមពីយើងទាំងអស់គ្នា ជាពិសេសយុវជនបន្តវេន។ លោក យុន លីនណេ៖ វប្បធម៌រលត់ ជាតិក៏រលាយដែរ ដូច្នេះការថែរក្សា លើកស្ទួយវប្បធម៌ជារឿងសំខាន់បំផុតរបស់យើងទាំងអស់គ្នា ជាពិសេសខេត្តសៀមរាបតែម្តង ដែលមរតកវប្បធម៌ដ៏សំបូរបែបនៅក្នុងខេត្តមួយនេះ កំពុងទាក់ទាញអ្នកទេសចរឲ្យមកកម្សាន្តយ៉ាងច្រើនផងដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
