“សង្ក្រាន្ដវិទ្យាល័យ” គឺជាការប្រមូលផ្ដុំនូវប្រពៃណី វប្បធម៌ និងអរិយធម៌ខ្មែរ បង្ហាញដល់យុវជនខ្មែរជំនាន់ក្រោយ បានស្គាល់កាន់តែច្បាស់នូវវប្បធម៌ ប្រពៃណីរបស់ខ្លួន និងចេះចូលរួមអភិរក្ស និងថែរក្សាទុកឱ្យគង់វង្ស។ នេះបើតាមការលើកឡើងរបស់លោក អាន លឹមខេង នាយកវិទ្យាល័យចំណេះទូទៅ និងបច្ចេកទសពួក ស្រុកពួក ខេត្តសៀមរាប។
ចាប់ពីថ្ងៃទី៦ ដល់ទី៨ ខែមេសា ឆ្នាំ២០២៤ខាងមុខនេះ គណៈគ្រប់គ្រង លោកគ្រូអ្នកគ្រូ និងសិស្សានុសិស្សានៃវិទ្យាល័យចំណេះទូទៅ និងបច្ចេកទេសពួក នឹងរៀបចំកម្មវិធី “សង្ក្រាន្ដវិទ្យាល័យ” ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ និងដើម្បីអភិរក្សប្រពៃណីវបប្បធម៌ ព្រមទាំងបង្កើតការការជួបជុំសប្បាយរីករាយដល់សិស្សានុសិស្ស និងប្រជាពលរដ្ឋផងដែរ។
លោក អាន លឹមខេង បានឱ្យដឹងថា “សង្ក្រាន្ដវិទ្យាល័យ” រយៈពេលបីថ្ងៃនេះ នឹងមានកម្មវិធីកំសាន្តជាច្រើនដូចជា៖ ការល្បែងប្រជាប្រិយខ្មែរជាច្រើនទម្រង់មាន ល្បែងវាយក្បម ទាញព្រាត់ បោះអង្គុយ រាំវង្ស រាំក្បាច់ សារ៉ាវាន់ ឡាំឡាវជាដើម ដែលជាប្រពៃណីវប្បធម៌របស់ខ្មែរ កម្មវិធីប្រឡងចម្រៀង ក្បាច់គុនល្បុគតោ ការតាំងពិព័រណ៌ស្ដង់ម្ហូបអារហារ បង្ហែមដែលជារបស់ខ្មែរធ្វើឡើងដោយស្នារដៃសិស្សានុសិស្សផងដែរ។ ចំពោះការបង្កើត “សង្ក្រាន្ដវិទ្យាល័យ” គឺជាការបង្កើតការជួបជុំសិស្សានុសិស្ស ប្រជាពលរដ្ឋ រួមនឹងសាធារណៈជូនទូទៅ ដែលរស់នៅក្នុងប្រទេសជាតិមានសុខសន្ដិភាពពេញបរិបូរណ៍។
ប្អូនៗសិស្សានុសិស្សនៃវិទ្យាល័យចំណេះទូទៅ និងបច្ចេកទសពួក ពួកគាត់បានបង្ហាញនូវក្ដីរីករាយដែលគណៈគ្រប់គ្រង លោកគ្រូអ្នកគ្រូ បានរៀបចំកម្មវិធី “សង្ក្រាន្ដវិទ្យាល័យ” នេះឡើង។ ពួកគាត់ថា ការរៀបចំបង្កើតកម្មវិធីវិ“សង្ក្រាន្ដវិទ្យាល័យ” គឺការគាស់រំលើងនូវប្រពៃណីវប្បធម៌ខ្មែរ មកបង្ហាញដល់សាធារណៈជននេះ ជាពិសេសយុវជនជំនាន់ក្រោយៗ ឱ្យពួកគាត់យល់ដឹងកាន់តែច្បាស់ពីវប្បធម៌ ប្រពៃណីខ្មែរ ហើយចេះចូលរួមអភិរក្ស និងថែរក្សាទុកឱ្យគង់វង្ស។ ពួកគាត់ក៏បានសំណូមពរដល់គណៈគ្រប់គ្រង លោកគ្រូអ្នកគ្រូ សូមឲ្យមានការរៀបចំកម្មវិធីនេះនៅឆ្នាំក្រោយៗទៀត ព្រោះវាក៏ជាឱកាសជួយឲ្យបានជួបជុំជាមួយអតីតសិស្សដែលធ្លាប់រៀននៅសាលាជាមួយគ្នា ជាពិសេសបានចូលរួមគាំគ្រនូវវប្បធម៌ប្រពៃណីខ្មែរដែលមានតាំងពីអតីតាកាលមកផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
