គ្រាប់មីន និងសំណល់ជាតិផ្ទុះពីសង្រ្គាម នៅតែបន្តគំរាមកំហែងដល់អាយុជីវិតប្រជាជន រារាំងការអភិវឌ្ឍន៍ និងរំខានដល់សន្តិភាព ព្រមទាំងជារបាំងដល់ការរីកចម្រើននៃសហគមន៍ និងការរស់ឡើងវិញនៃប្រជាជាតិ តែយ៉ាងណាក៏កម្ពុជា នៅតែប្ដេជ្ញាចិត្តប្រែក្លាយទៅជាប្រទសដែលគ្មានមីន នៅឆ្នាំ២០២៥។
នេះបើតាមការលើកឡើងរបស់ ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ា ឆ្នាំ២០២៤ ក្នុងឱកាសប្រារព្ភទិវាអន្តរជាតិយល់ដឹងអំពីមីន នាក្រុងសៀមរាប នារសៀលថ្ងៃទី៤ ខែមេសា ឆ្នាំ២០២៤នេះ ដោយមានការចូលរួមពីតំណាងស្ថានទូតប្រចាំកម្ពុជា តំណាងដៃគូអភិវឌ្ឍន៍ ប្រតិបត្តិករជាតិ-អន្តរជាតិ វិស័យឯកជន និងភាគីពាក់ព័ន្ធជាច្រើនរូប។
ព័ត៌មានជាតិ ថ្មីៗ
ទេសរដ្ឋមន្រ្តី លី ធុជ មានប្រសាសន៍ថា ទិវាអន្តរជាតិយល់ដឹងអំពីមីនសម្រាប់ឆ្នាំ២០២៤នេះ ប្រព្រឹត្តិទៅក្រោមប្រធានបទ “ការពារជីវិត កសាងសន្តិភាព” ក្នុងគោលបំណងរំលឹកអំពីសារសំខាន់ និងលើកកម្ពស់ការយល់ដឹងអំពីការគំរាមដែលបង្កឡើងដោយគ្រាប់មីន និងសំណល់ជាតិផ្ទុះពីសង្រ្គាម មកលើប្រជាជនស្លូតត្រង់នៅទូទាំងពិភពលោក។ ទិវាអន្តរជាតិនេះដែរ ក៏ជាការរំលឹកពីកាតព្វកិច្ចរួម ដើម្បីការពារក្តីសុបិនរបស់មនុស្សជំនាន់ក្រោយអាចរស់នៅប្រកបដោយសុវត្ថិភាព តាមរយៈការប្តេជ្ញាចិត្តរួម ដើម្បីធានាឱ្យពិភពលោកគ្មានការគំរាមដែលបណ្តាលមកពីគ្រាប់មីន។ ជាមួយគ្នានេះ ការប្រារព្ធទិវាអន្តរជាតិនេះ បង្កប់នូវស្មារតីនៃសាមគ្គីភាព និងក្តីមេត្តាជាសកល ដើម្បីរួមចំណែកដល់សកម្មភាពមនុស្សធម៌ និងឆ្លើយតបគ្រប់ជ្រុងជ្រោយរបស់សហគមន៍អន្តរជាតិលើបញ្ហាមីន និងសំណល់ជាតិផ្ទុះពីសង្រ្គាម។
ទេសរដ្ឋមន្រ្តី លី ធុជ បានបញ្ជាក់ថា កម្ពុជាក្រោមការដឹកនាំប្រកបដោយចក្ខុវិស័យរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បាននាំឱ្យប្រទេសកម្ពុជាទទួលបានជោគជ័យក្នុងការដោះស្រាយបញ្ហាប្រឈមដែលបង្កឡើងដោយសារមីន និងសំណល់ជាតិផ្ទុះពីសង្រ្គាម។ កម្ពុជាក្នុងនាមជាប្រធានអនុសញ្ញាអូតាវ៉ាឆ្នាំ២០២៤ បានបង្ហាញពីគំរូនៃការតស៊ូជាសកលប្រឆាំងនឹងការគំរាមកំហែងនៃគ្រាប់មីន។ កិច្ចប្រជុំកំពូលសៀមរាប-អង្គរ មិនមែនគ្រាន់តែជាកិច្ចប្រជុំប៉ុណ្ណោះទេ វាគឺជាសញ្ញានៃក្តីសង្ឃឹម ដែលបង្ហាញពីការប្តេជ្ញាចិត្តរបស់កម្ពុជា និងបណ្ដាអ្នកពាក់ព័ន្ធ ក្នុងការដើរតួនាទីយ៉ាងសំខាន់ចូលរួមជាផ្នែកមួយដ៏ចាំបាច់ឈានទៅសម្រេចនូវទស្សនវិស័យរបស់កម្ពុជាដែលបានដាក់ចេញនូវគោលដៅច្បាស់លាស់ក្នុងការដោះស្រាយបញ្ហាមីនឲ្យអស់ក្នុងឆ្នាំ២០២៥។
ជាមួយគ្នានោះ អនុប្រធានទី១ ជោគជ័យដ៏ធំធេងរបស់កម្ពុជា គឺគិតមកទល់ពេលនេះយើងមានខេត្តចំនួន១៥ហើយ ដែលត្រូវបានប្រកាសថាជាខេត្តដែលគ្មានមីន នៅនៅចុងឆ្នាំ២០២៤ និងមានរហូតដល់១៨ខេត្ត ហើយនៅខេត្តមួយចំនួនទៀតនឹងត្រូវពន្លឿនបោសសម្អាតជាបន្តបន្ទាប៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
